美好世界的沉思者/ADVANCING (重製): 19. 再見

返學派完卷之後轉眼間就放新年假。放新年假相信大家最開心都係逗利是，而好多人往往都會俾老豆老母呃走咗啲利是，大家都攞唔返。

而我就唔會特登去逗利是，唔係我啲父母會呃走佢，而係我唔想為咗個少少錢就山長水遠咁去親戚屋企拜年又唔想應酬佢哋。

新年期間個個人都去咗拜年，包括阿雯，所以基本上每日我都係自己一個係屋企對住4面牆。

當然年三十晚個日我都係有返到去爸爸媽媽度一齊食團年飯。

係上去之前我就特登去超市買咗啲水果上去，我都係隨隨便便揀幾個望落覺得靚嘅就擺落袋，完全就係唔識買水果。





上到去就撳鐘等爸爸開門俾我。

「爸，我買咗啲水果上嚟俾你哋。」

「咁快上咗嚟呀？坐陣先啦，未有咁快食得呀。」

我擺低咗啲水果就坐低咗喺梳化玩手機。

「點呀？考試點呀？」





「咪都係咁～」

「咁即係唔掂啦～又話想做醫生～」
「過多一年就DSE喇，唔好再咁懶呀，努力啲讀書知唔知呀。」

「得啦～」

「讀唔成書冇用架～出到嚟社會輸人成截，被人睇唔起架～係～讀得唔好可以再讀過，但咪遲人幾年囉～」

我真係唔明，點解一定要規定一個人要做啲咩？點解一定要18歲畢業入大學，大學畢業出嚟就要做嘢，要搏升職加薪，30歲就要上樓買車結婚生仔？呢啲嘢邊個規定嘅呢？我想點咪點囉，唔得架？要做啱晒先野先叫做成功？





過多陣就開枱食飯。

「係呀媽，你唔使再整啲餸攞過嚟喇。」

「點解呀？你識煮咩？」

「係呀～我自己搞得掂啦！」

「係喎呀仔，你聽日有冇嘢做呀？」

「...有！」一聽到佢咁講就知想我去埋拜年，緊係即刻拒絕啦！

「咁就啱喇～聽日同我地一齊去拜年。」





「？！我都話我有野做咯，仲拜？！」

「你有野做咪都係係屋企訓覺～唔好成日留係屋企喇～會臭架～」

「唉～隨便你！我食飽喇！」

食完野我就返咗屋企，然後聽日再去佢地屋企。

—————————————————

「叮咚～」

「嚟喇呀仔～」

唉～難得有假放想訓耐啲都唔得，要一早就嚟應酬。





「曉彤嚟咗，你地咁耐冇見都好掛住大家架喇。」曉彤？邊個呀？

佢講完我就入去，一眼就見我阿爸，然後仲有兩個大人一男一女，仲有個女仔。

「賢～」佢叫住我個名就衝過嚟攬住我。

「！」我對於佢呢個咁突如其來嘅舉動感到驚嚇。
「小姐...小姐...小姐！」

我呢一嗌終於成功令到佢鬆手退後幾步。

「我～好似唔識你架喎～」

「佢係你小學個時嘅朋友嚟架～唔好咁樣對人啦～話晒你地都由細玩到大～」呢個時候我老母插把口埋嚟。





「咁都唔怪得佢嘅～咁耐冇見，唔記得好正常啫～」然後另一個女人都講。

「等陣！當你地啱！我地係識，但都唔係由細玩到大啦！大咗都冇再玩！」

「唉～得喇得啦喇！嚟，利利是是，你地出去玩下重新認識返啦～去玩啦～」個女人行咗埋嚟俾塞咗封利是俾我，再俾咗幾張銀紙俾我。然後我見到我老豆攞咗副麻雀出嚟。唉～