美好世界的沉思者/ADVANCING (重製): 17. 無「間」之愛
我哋同詩姐佢哋講完之後，就一齊係雪櫃度拎個蛋糕出嚟，然後熄晒啲燈淨係留返枱個邊嘅燈開住，同時都叫咗阿雯佢哋過嚟聚集開始今日嘅主題。
個蛋糕因為我係冇份準備，所以個真身我係到宜家先至見到，呢個蛋糕係白色嘅，側邊就用咗啲粉紅色忌廉唧咗啲好似絲帶嘅裝飾圍住成個蛋糕；而蛋糕嘅面同樣都係用粉紅色忌廉唧咗一個花嘅形狀，再加咗啲水滴咗啲裝飾，側邊就有塊白色嘅牌寫住「Catrina Happy Birthday」，然後中間就插住一枝點著咗嘅蠟燭。
「1，2，3！Catrina 生日快樂！Happy Birthday！」琳琳數完一二三我哋就一齊同阿雯一齊講生日快樂，然後一齊唱中文版加英文版嘅生日歌。
「多謝你哋呀！我好開心好感動呀！」
「許願吹蠟燭啦！」阿雯雙手合十咪埋雙眼係心中默默講出佢嘅願望，跟住擘大眼一口氣吹熄蠟燭。
「我哋仲準備咗生日禮物俾你架！」琳琳講完就同阿霆同埋傑仔一齊去攞一早擺係側邊嘅所有人準備嘅生日禮物過嚟擺係張枱。
「嘩～有咁多份，開邊份先好呀？！」佢一路摸索住每一份禮物，一路觀察住我哋每個人嘅表情。
「咁～就呢份啦！」我首先就揀咗份用黑色大盒裝住嘅禮物。
「呢份邊個架？！」
「我哋架。」阿霆係一邊舉起手講。
「係我哋4個人一齊準備架，但唔包腎仔架，呢份禮物佢冇份架起！」班友仔竟然自私準備唔預我？！
「你哋自私準備唔搵埋我？好嘢！」
「咩呀！我哋有問你架！係你話買咗咋～」吓？買咗？等我回憶下先。
—————————————————
就係前日考通識個日。
終於考完喇，我唔掂個一科，終於可以唞吓喇，聆聽又唔使溫，執書包放學去食飯先。
「腎仔，要唔要一齊買禮物俾阿雯？」食緊飯個陣，志偉問我。
禮物？我一早買咗啦，等你哋咩？
「我買咗喇～你哋自己買啦～」
—————————————————
係喎，佢哋有問，但係因為我買咗就拒絕咗佢哋。
「sor，一時醒唔起。」
「睇吓你哋班男仔買咗啲咩先～」佢慢慢打開個盒，只見入面擺住咗4樣嘢，爽膚水、精華、面霜同埋眼霜。
「我哋本身諗住買化妝品嘅...但又唔知買邊款好，咁就買咗護膚品囉～」
「唔緊要呀！啱晒我！好啱我用呀！」阿雯笑住同佢哋講。
開禮物嘅過程我都唔詳細講，有人送咗連身裙俾佢，有人送高踭涼鞋，有人送咗香氛等等。
「最後一份喇，呢份應該就係阿賢架啦！」阿雯眼仔碌碌咁望住我講。
阿雯佢小心翼翼，慢慢咁打開個袋攞裝係入面嘅嘢出嚟。
側邊嘅人睇到份嘢都忍唔住吓咗出聲，擘大個口得個窿咁。份禮物就係一個kuromi水晶擺設。
—————————————————
就係幾個月前，有次我陪阿雯佢去行街，見到玩具反斗城阿雯就好開心咁衝咗入去。
雖然我哋行晒成間鋪頭都冇買到任何嘢，但係我留意到阿雯行kuromi嘅公仔玩具個時係用時間用得最耐，對眼仲發晒光咁,1我就知道佢係極度鍾意。
雖然坊間有好多商品，有袋呀有衫褲鞋襪咁，但係如果真係著住揹住出街都幾尷尬，所以我就揀咗個實用性零嘅水晶擺設，可以裝飾屋企。
—————————————————
「你送啲咁嘅嘢呀？齋擺係度冇用個喎！」呢個反應其實我都預估到。
「仲衰過送杯～」
「唔係呀！我好鍾意呀！」
「反正我屋企都冇咩擺設，攞嚟裝飾屋企都幾好吖！呢樣嘢就係我嘅第一樣收藏品！水晶嘅裝飾品又優雅又高貴，都幾唔錯吖！」就係啲人都踩呢份禮物嘅同時，阿雯就向所有人表示佢好鍾意呢份禮物。
「...點話點好啦！分蛋糕食喇我哋！」側邊有個人講咗句野化解呢個僵局。
「多謝你。」就係大家食緊蛋糕嘅時候我走過去阿雯身邊同佢講。
「多咩謝呀？」
「哦～份禮物？」
「嗯。不過...你點知我鍾意架？」我就講返幾個月前嘅事。
「唉呀～呢啲咁嘅嘢俾你知道添，好醜呀！」
「唔會呀，咁每個人都有自己嘅喜好，而喜好係冇分年紀同性別，冇必要因為旁人嘅目光就隱藏自己嘅呢份愛好，又或者強迫自己唔鍾意。」
「每個人都係獨一無二，唔好做人哋眼中嘅你，做自己所想嘅自己。」
「嘩～突然講埋啲正經嘢嘅？不過...我知架啦！」
「係喎～你唔係唔食甜嘢咩，做咩食蛋糕呀？」佢望一望我手上嘅紙碟上嘅蛋糕。
「見係你生日我先俾面食少少咋～俾著其他人？哼！」
「所以你應該感到榮幸呀！」我講笑咁同佢講。
「嘩！我真係好榮幸呀！」
食完蛋糕之後我哋就搵咗個店員幫我哋所有人一齊係波波池度影相就執嘢離開。
離開咗之後我哋分開晒返去，我同阿雯仲有娟姨就一齊搭巴士返屋企，途中我都一直被忽視，佢哋兩個就密密傾。
「好啦～返學再見啦！拜拜！」
「拜拜！」
「頭先你係咪好悶呀？」我哋同娟姨拜拜咗就一齊踏上歸家的路途。
「吓？唔係呀。」
「得我哋兩個係度傾，你點會唔悶吖～」
「我宜家陪返你喇！」
「今日係咪好開心呀？！」
「嗯！有好多禮物！又影咗好多相呀！」
「其實仲有一份你未拎架。」
「吓？咩呀？！我漏嘢呀？！唉呀！呢啲你哋嘅心意嚟架！」
「唔係呀，阿雯。」我企起度拖咗佢嘅雙手。
「嗯...由一開始我哋見到面，我就已認定咗你，已經對你一見鍾情。雖然同你只係短短識咗幾個月，但係每一日同你一齊歡笑一齊哭，對你嘅感情就每一日加深。雖然我有時會激嬲你，令到你唔開心，悶悶不樂，但你到最後都原諒咗我。」
「係識你之前，我都只係一個廢青一個毒撚，但識咗你之後，我感覺到我上進咗，由之前唔會早返學去到宜家會早返；由之前上堂發夢瞓覺去到唔瞓覺再去到會聽書會做嘢；由唔溫書去到得我一個都會自動自覺溫書。呢一切都係由識咗你之後先發生先轉變，發現你真係對我嚟講好重
要。」
「記唔記得係聖誕假嘅時候，係我生日個日？個日係我人生中第一次有人幫我慶祝生日，我真係好開心，你亦都好花心思去計劃當日嘅行程，份禮物都係你親自整嘅～我真正明白，我好愛你，好想永遠同你一齊，永不分開。」
「係倒數個日，我講過我想拍拖，係真嘅。我想同你拍拖。
「溫靖雯，我愛你，可唔可以做我女朋友？」
講到呢到，佢已經淚流滿面。
「你知唔知...我...等咗好耐喇。」
「我等你講呢句野等咗好耐啦！」
「等咗咁耐，仲於等到喇！聽咗你講咁多，我真係好感動！」
「雲建賢！我都愛你！我願意做你女朋友！」
講完呢句，我哋都望住對方，再緊緊抱住大家，好似怕對方會離開自己一樣。
「呢份禮物，我收到喇！袋住咗喇！我嘅人生中，呢份禮物係最好！比任何嘢更好！我絕對唔會掉架！」
「咁...仲有一份。」
「頭先本身想攞出嚟，但見到你哋咁，嚇到我唔敢俾你。」
「咩嚟㗎？」
「開嚟睇下。」我係衫袋攞出咗一個盒俾佢。
佢懷住又驚又喜嘅心情打開個盒，入面放住嘅一條銀色嘅頸鏈。
呢條頸鏈並冇乜嘢特別，就係上面扣住一個心心。
「你睇吓個心嘅後面。」佢聽到就反轉個心嚟睇，上面刻住咗「W♡C」。
「W就係代表我，雲；而C就係你，Catrina。」
「本身我諗住買條靚啲嘅手鍊或者頸鏈，有啲裝飾係上面，但...個啲未必有位刻字，手鍊返學又要著外套遮住。」
「而且...我知道比起外觀，比起價值，你更著重於心意...所以...我就揀咗條普通嘅頸鍊，再刻字。」
「嗯！你真係好了解我想要啲咩！果然冇令我失望！」
「我幫你戴起佢。」我攞起咗條鏈，行去佢後面，幫佢戴起咗。
「我好鍾意呀！」佢捉住條鏈嘅心心部分講。
「返去喇！」我拖起佢隻手一齊行去分岔路。
「不過...你真係好蠢呀！我一直俾咗咁多暗示你都唔知道！」
「你知唔知今日係咩日子呀？」
「我生日囉！」
「固之然係啦，但同時都係Diary Day，日記情人節，即係一月嘅情人節。呢日情侶雙方會互贈記錄一年嘅愛情事嘅日記俾大家。」
「至於單身嘅...就會用日記寫低表白嘅計劃，或者實行計劃，去表白。」
「係就係幾有心思，但係就要我等咁耐，你唔乖呀！」
「咁你鍾唔鍾意先？」
「鍾意呀！」佢挨咗落我度。
「咁我地今日就係第一日，正式開始我哋嘅關係！」
「嗯！」
講完我哋就合埋眼相吻大家。良久，我哋先捨得分開，然後離開大家返各自嘅屋企。
當然我冇啦，我緊係望住佢，等佢消失於我眼眸之中先會走。
「呀賢！」行到一半佢停低，拎轉頭望住我。
「記得好好珍惜我呀！頭先個個...係我嘅第一次嚟架。」
「返去喇！變態佬，唔好再望住我呀！」
「嗯！」呢個唔單止係你嘅第一次，仲係我嘅第一次。