美好世界的沉思者/ADVANCING (重製): 14. 實罪
返到去都因為太攰嘅關係，我沖咗個涼就上床訓覺。
之後呢兩日我都係同得班朋友相約係召喚峽谷度見，無法啦～都冇女～
「大家！雖然聽日係聖誕節，但大家都要記得嚟呢度見面！」傑仔講。
「但我聽日約咗人喎～」呢個時候智偉講。
「明白嘅～咁我地四個聽日再見啦～晚安！」
講完之後我就熄機準備去訓覺。
「叮叮叮叮叮～」正當我我啱啱訓咗冇耐，手機突然響起嚟。
「喂～」
「阿賢？」
對面傳嚟阿雯嘅悅耳動聽聲音，我成個人即刻醒神晒！
「阿雯？咁夜嘅？」
「冇呀～晏晝send咗訊息俾你但見你冇睇，咪打俾你囉～」
「哦～唔好意思，今日...出咗去～」應該就係今日全日都掛住打機冇睇到添～
「咁...你有啲咩事呀？」
「聽日聖誕節...你冇約人呀可？」
「我點會有人約啫～好得閒呀我～聽日...」其實就一早約咗我嘅朋友。不過，而家都變得唔重要。
「咁聽日晏晝樓下見啦～」
「晏晝？好呀！」
「聽日見啦！晚安～」
此刻嘅我心情非常激動，非常興奮！又有得同阿雯出街喇～
不過，朋友個邊...算啦！求其搵個理由甩底啦～
—————————————————
「我到咗喇～」我向住企係我前面嘅女仔講。
「又遲～」 佢拎轉身對住我講。
「唔好意思，訓晏咗。」
「唔好再講喇，行喇～」
「行？你又知去邊？」
「…」
「行啦～」講住我就繞住我隻手行。
「做咩無啦啦約我嘅？」
「我想出街嘛～又想人陪，咪約你囉～同埋...聖誕節，唔好又留係屋企啦～」
「咁你都啱嘅～不過...聖誕節周街都好閃，留係屋企始終都好啲嘅～」
「所以咪叫你出嚟囉～一齊閃親好過得我一個。」
行下行下我地就行到去保齡球場。講起保齡球，我都已經幾個月冇打，因為要測驗所以冇打，然後因為突然間要表演，又冇時間打，就一直去到而家，希望今日有得打啦～
而結果亦都如我所料，現場因為聖誕節嘅關係係太多人打緊，所以如果我地要打都要等好耐。我地就果斷放棄，去商場到行街。一去到之後，阿雯好似一早就有晒目標咁行去時裝店度睇衫。而好明顯，我就當然係要陪住佢，又要俾意見，又冇其他野可以做。雖然話對象係阿雯，但都真係好悶～
果不其然佢真係差唔多試晒所有衫仲不停問我一模一樣嘅問題，「呢件靚唔靚？」。而我俾佢嘅答案當然都係千篇一律，「靚。」。
行咗幾間賣衫嘅店舖之後，我哋就去咗間賣女裝內衣褲嘅地方。
「你做咩企響度呀？」
「我係度等你。」
「一齊入去啦～你唔係怕羞呀？好少事咋喎～有咩好尷尬呀？」
「唔啦～」
「…你知唔知你應承過我啲咩架？！」一聽到佢呢個問題我就知佢想點。
「好～我入囉～」
「乖～」
而入到去，理所當然地佢都有問我「靚唔靚呀」「鍾意唔款」「要唔要蕾絲」咁樣。而家成間鋪頭相信淨係得我一個雄性生物，其他全部都係雌性生物，個場面可想而知係有幾尷尬。
—————————————————
之後我就同咗佢去咗尖沙咀食飯。
「我上網搵咗個地方食飯架啦～仲book埋位～」 落咗車之後佢就帶咗我去咗間韓國餐廳。
「唔該，book咗2位，温小姐。」
「温小姐兩位...係！跟我嚟。」
坐低咗之後個店家就俾咗個餐牌我地睇。
「食咩呀？」
「我諗好要咩喇～你呢？」
「…嗯。」我睇咗一陣之後就嗯咗聲。
可能因為今日係聖誕節好多人，所以我地點嘅食物好耐先到。我試咗少少發覺個湯都非常好飲，餃子都煎得好香口好脆，佢真係好識揀。
食完之後，我哋就頂住大大個肚行街，因為聖誕節嘅關係，所以周街都有好多人，而且絕大多數都係一對對，有啲就係一街人，但就冇一個人嘅行街，可能唔想因為出一次街對眼就盲咗。之前我都同佢哋一樣，聖誕節、情人節呢啲咁嘅喜慶節日我都係留係屋企做廢青。
轉眼間我哋就行到去海港城。
每年聖誕節海港城都會有聖誕活動，有打卡位，有燈飾睇，有嘢買。亦因為咁，海港城嘅門口推滿咗好多人係度打卡。
今年海港城嘅門口布置成一個玩具熊嘅店舖，側邊有隻好巨型嘅熊啤啤係度，成間玩具店都係度閃閃發光，亦都播放住應節嘅幸福聖誕歌曲，亦都係第一個打卡點。
阿雯係遠處見到隻熊就即刻飛奔過去。而我哋都企響度等人哋影完先至行過去影。
「1！2！咔嚓！」
「再嚟一張！1！2！咔嚓！」
「到你喇！過去啦！」
「我唔影喇，冇興趣。」
「咁好啦～」
係出面影完相我哋就入去商場取暖，因為出面真係好凍，而且係正海邊有啲海風吹埋嚟就更凍。
之後我地上到去一個聖誕燈飾花園，有多種各款各樣嘅打卡點。打晒卡之後我哋就望住維港兩岸嘅夜景，聽住現場嘅音樂表演，聽人唱聖誕歌。
聖誕歌其實係好搵錢，而世界上最搵錢嘅歌就係聖誕歌。
聽晒表演我哋就離開海港城，行去海邊睇對岸嘅燈飾。
「好靚呀～」我望住阿雯係度講
「嗯。」
「你係咪有咩心事呀？」突然佢問咗我一個咁嘅問題。
「冇呀。」
「咁點解你成日答我都答得咁冇靈魂嘅？」
「係咩？唔係呀。」
「…」
「對唔住呀～今日係我唔好，冇顧到你感受就拉你入去，唔好嬲啦～」
「都話冇事咯！」
「…」
「…對唔住...」
「吹風吹到凍晒喇...返去喇...」
佢講完就就轉身離去，而我都跟住佢一齊走，上車，搭車，落車，返去，直到去分岔路，我地都冇講過一句說話。
其實我講完嘅當刻就即刻驚覺到我做錯咗，講錯野，但睇嚟佢非常唔開心。而家...或者唔好講啲咩好啲，無謂唔小心又講錯野搞到件事惡化。