美好世界的沉思者/ADVANCING (重製): 15. ADVANCE
日子一日一日咁過，我始終都未鼓起勇氣去搵返佢，而佢亦都冇搵我。其實我知道我係唔應該因為啲咁小嘅事而發脾氣。
佢亦講得好啱，成件事根本就好小事，入去啫，又唔係做啲咩，而且都有佢陪住我，冇需要驚，冇需要怕羞。
但我始終都因為自尊因為面子嘅問題冇去聯絡佢，每日都一直等住佢嘅消息，每日都覺得「今日冇搵，聽日一定會搵」，好明顯結果唔係。
呢幾日我都冇同我班朋友一齊玩，佢地都話「玩咗咁耐，係時候都要為考試準備」。唔知係真，定係係嬲咗我，嬲我聖誕節個日放飛機。第二日佢地問係我嘅時候，我都有講「臨時有啲事要做」，信唔信就唔知。
時間嚟到30號，已經第五日，都仲係冇任何消息，對上一次聊天嘅時間仲停留係25號。或者...或者我真係要...放低一切。
「對唔住，我知道我做錯咗，係當刻我就即刻後悔。我沉思過後，知道我唔應該因為咁小事就發脾氣，而你都講得好啱，成件事都其實係小事，我嘅反應實咗太大。希望你可以原諒我。另外聽日唔知你有冇時間，如果可以嘅話我想約你。」我用咗幾秒先㩒傳送制。
然後就熄機訓覺。因為我想逃避，可能佢會已讀不回，可能佢會唔原諒我，可能佢會封鎖我，可能...可能...我都唔知...我只係害怕面對。
—————————————————
去到第二日，31號嘅當日。
我梳洗完食埋午餐之後就戰戰兢兢咁開返部手機。講真個句，我驚，我驚...如果冇訊息嘅話，應該就係佢已讀；如果有，咁都起碼都叫有啲機會，佢都仲肯理我。
「叮咚～」咦？有訊息通知聲，咁即係...
我拎返轉部手機去前面睇...
「好呀，聽日見。」
竟然...
見到呢個訊息我即刻換好晒衫落去等佢。
「等咗好耐呀？」唔知等咗幾耐，佢終於都出現，我垛亦都再次見面。
「唔係呀...」
「多謝你肯嚟...」
「…」
「我...知我做錯，我亦都好後悔，對唔住。」
「…」 「…」次後我地兩個都冇出聲。
「咁跟住呢？約我出嚟就係講呢啲？」
「希望你可以原諒我...」
「...咁...我都有錯嘅～我應該要尊重你，唔應該強迫你做啲你唔鍾意嘅野，對唔住...」
「唔...唔係！你冇錯！係我錯...」
「哼～大家都有做得唔好嘅地方，經歷過今次大家都成長咗，以後唔好喇～」
「多謝...」
「咁...我走喇～」
「下…等陣...」
「嗯？」
「今日...我想同你一齊倒數...」
「去睇套戲先啦～而先仲早～」講完佢就拉住我隻手行。
太好喇，結果唔係我想像之中咁。而係，美好結局。
—————————————————
我地首先就去咗睇套以聖誕為題材嘅愛情電影。然後就去咗我一早訂咗位嘅壽司店食野，呢間壽司係網上好高人氣，好多人都讚。最後我地就去咗海旁度欣賞對岸嘅燈飾，一路等12點嘅來臨。
去到最尾一個鐘，海上面同埋灣仔個面都開始每隔一個時間發射煙花上天空。在場嘅所有人無不攞出手機影低佢再擺上網，而阿雯都一樣，佢都有影到煙花。去到最尾一分鐘，對岸大廈外面屏幕出現倒數數字，等市民可以跟住數字一齊倒數。
去到最尾10秒，我哋全場所有人都一齊大嗌。
「10！」
「9！」
「8！」
「7！」
「6！」
「5！」
「4！」
「3！」
「2！」
「1！」
「0！」
「新年快樂！」「Happy New Year！」同時海上邊同埋灣仔開始連續不斷咁發射煙花，而我同阿雯就留係度睇晒先走，有時就影吓相、拍下片咁，又或者會用煙花嚟做背景自拍。
等到放晒煙花，現場啲人都開始陸續離開，我哋都慢慢行去搭巴士返屋企。
「你新一年有咩願望呀？」行行吓阿雯突然問我。
「吓？願望？」講到願望我真係冇認真思考過。
「嗯！我想拍拖呀～你呢？」
「咁...我都想拍拖。」
「抄人架！」
「我都想拍架～」
「咁你加油啦～其實可能有個人一直係度等緊你呢～」
「你都可能有人等緊你架！」講完我都相視而笑。
我想拍拖，我想同你拍拖；有人等緊你，係我等緊你...
—————————————————
短短嘅個幾兩個禮拜假咁就完咗，返到去上多一個禮拜堂就要考試喇，時間真係過得好快～好似比起往年快咗好多～
呢一個禮拜我哋每一日每一堂都係係度溫書複習，老師就揀一啲重點部分去溫，仲會俾啲雞精我地溫。
總共就要考10幾日，中英數通聆聽同埋一啲選修科。
基本上每一科我都好有信心，有信心唔係可以攞高分，只係有信心合格。而今次中文同通識我信心都大咗，見到啲題目都有頭緒同埋都知點答。
「點呀，識唔識呀？」考晒之後阿雯佢就問我。
「ok啦～合格都得嘅～」
「咁你呢？」
「嗯...當然得啦！」
「俾你嚇死！見你好似想喊咁仲以為你交白卷添～」
「點會呀？！我係數學唔掂啫～但俾你教完，合格都得嘅我諗。」
「合格咋？！唉～真係晒我心機。」
「我唔係呀？！教咗你中文通識咁耐都只係ok！」
「你呀，聽日唔好遲呀！」
「嗯～我會早到架喇～」
「我聽日唔會陪你去，我會陪我班好姊妹去，你唔好唔嚟呀～」
「係喇～」
聽日係咩日子？聽日係1月14日，亦即係阿雯嘅生日派對，早係一月頭我哋就已經傾好咗點樣慶祝，除咗我同埋壽星女阿雯，仲有我個4個朋友同埋阿雯嘅一啲姊妹，大概十幾個人去。
而我都係早幾日放學之後去咗買生日禮物俾佢，亦都預備咗啲嘢，準備係聽日同佢講。