美好世界的沉思者/ADVANCING (重製): 13. 福音
去到22號起身嘅時候打開手機就見到勁多通知，全部都係啲人同我講生日快樂同埋講埋啲感性野。我逐個逐個多謝晒佢哋之後就梳洗換衫。
我一早就預備好要著嘅衫，都係一身黑色，搭件大衣，因為我見今日都幾凍。然後就出門口。
今日我當然都係預早去到等咗，等人永遠都係最悶，我就攞部手機出嚟㩒下聽下歌。
「啪！」無啦啦有人拍咗我膀頭一下，搞到我嚇咗嚇。
「喂！著到咁，等人呀？」原來係娟姨，佢咁啱經過見到我就撩我傾計。
「嚇死人咩？係呀～我等緊人呀。咁你又係度做咩呀？」
「我住響度咁我會係度好出奇咩？」
「不過...你今日生日，生日快樂喎！」
「…哼！講呢啲...」
「玩得開心啲喇，拜拜！」
佢走咗之後，好快阿雯都嚟咗。
「唔好意思呀，遲咗少少。」
我眼前嘅阿雯佢今日零舍唔同，首先佢著咗件粉紅色嘅外套，入面著咗件灰色嘅背心，下身就搭咗條黑色短裙，再加多對黑色絲襪，但仍然睇到佢對長腿嘅優美曲線，然之後再落啲，係對黑色嘅高踭鞋。唔記得咗講，佢仲揹咗個細細地嘅袋。上返去個頭度，佢今日仲突登化咗個妝，淡淡地唔太濃，係佢面上為佢增添咗幾分姿色。
就係因為佢嘅裝扮，平時唔會見到，我亦都未曾見過，所以就話阿雯佢今日零舍唔同。
「我係咪好靚呀今日？」
「吓？呀...嗯，好靚，同平時嘅你好唔同，今日好特別。」
「我都知架啦～見你望咗咁耐，變態佬！」
「行喇～好凍呀～」
「你食咗嘢未呀？要唔要一齊食？」
「食咗喇～你未咩？」
「我都食咗，問吓你啫～」
「…咁就行啦！我計劃好今日要做啲咩架喇～」
之後我哋就搭巴士去中環，到咗之後就轉搭山頂纜車上山頂。
「你唔知呀，今次呢，係我第一次搭山頂纜車咋。」就係途中，佢望住窗出邊同我講。
「咁你覺得點呀？」
「好普通啫，又冇咩景睇。」
「上到去就有架喇～」
「真嘅？好想快啲上到去呀！」
坐咗兩個字之後，我哋就落咗車去觀景台度鳥瞰成個香港。當然啦，山頂係旅遊景點嚟，宜家又係假期，多人就當然嘅～
「真係好靚呀，望到晒成個香港架！」
香港就緊係靚啦，但係你企埋係隔離，佢過主啦～
「我幫你影相吖！」
「得唔得架？」
「放心啦！信我！企過去啦！」
我攞出我部手機出嚟對住佢，叫佢擺唔同嘅pose，一連影咗好多張，咁就有得俾佢慢慢揀。
「點呀？得呢。」影住佢就埋嚟睇相。
「係喎，得喎，無啦啦又會進步咗咁多嘅？」
「秘密！」
「古古怪怪咁～」
我之後用我部手機影，就係除咗為阿雯留倩影之外，我都可以留低佢俾自己做個紀念同日後慢慢欣賞。
「跟住到我啦！嚟，企埋去我幫你影。」影住之後我哋又一齊用維港嘅景色做背景一齊自拍咗幾張。
影晒相又用咗望遠鏡睇渾晒香港每一忽，我哋就落咗去行商場，行完之後就去蠟像館睇蠟像。
我就唔係太好呢味野，不過啲大師工匠係勁嘅，真係做得好神似！而阿雯好似睇得好開心咁，而且原來阿雯真係識得好多世界明星，歐美、韓國、香港嘅都識唔少。
「係喎～其實你今日做咩特登帶我嚟山頂嘅？」
「我見呢度好靚，又好多嘢玩就揀咗呢度！」
「我哋快啲去下一個地方喇！」
「邊度呀？」
佢拖起我隻手帶咗我行咗一陣，我哋就到咗一個歐陸式建築風格嘅地方。
「就係呢度喇，山頂花園呀！」
「呢度呢，好靚架，又可以打卡，又可以野餐，又啱情侶拍拖嚟...」阿雯佢越講越細聲。
「咩話？」
「冇呀，我哋周圍行吓影吓相啦！」
我開始覺得今次嘅約會其實係阿雯佢自己想嚟打卡...
行得越高，氣溫就越低，阿雯都已經凍到係咁震，對手仲撓手係胸口前。
「你好凍呀？」
「吓？唔...唔係呀。」
「仲話唔係，講嘢都震晒咁。」
「咁...」呢個時候我腦海中萌生咗個好大膽嘅諗法，但太大膽太進取，我即刻再諗一個冇咁勁嘅做法。
我拖住佢隻手，然後兩隻手一齊插入我啲衫袋度。呢個做法唔會太激進，又未到反感嘅地步，但又可以達到自己嘅目的。
「…！」阿雯見到之後先係一下愕然再望住我，然後就半聲不響咁跟住我一齊望住個天。
好快，天上就發出淡淡嘅紅光，代表住日落嘅來臨，黃昏嘅時刻，夜幕嘅序章。
「係紅霞呀～」佢望住紅紅嘅天空發出感嘆。
「嗯...真係好靚...」我亦都望住呢片天空附和佢。
直至到整個日落完全沒落，天空漸漸變藍，我哋就起行離開呢個山頂花園。
「阿賢呀，不如我哋去食晚飯咯。」
「餓喇？成日掛住食。」
「咩喎，我晏就食咗好少咋。」
「咁行啦，去食嘢喇！」
「咁食咩呀？」
「食咩？你冇準備到？」
「其實有嘅...不過...玩到過晒鍾，個booking應該都冇咗...」佢帶住尷尷尬尬嘅語氣講。
「唔緊要！跟我嚟！」
然後我就帶咗佢去一間食多國菜嘅嘅餐廳食飯，侍應帶咗我哋坐室外嘅一張枱，係個度可以飽覽維港景色。
「呢度啲嘢好貴喎～」阿雯望咗下個menu就講。
「唔好睇價錢，想食咩就嗌，我請！」
「吓？」
「我幫你揀啦。」我見到佢咁就攞走咗佢嘅menu再舉手叫。
「要個肉眼排要黑椒汁，羊排要燒烤汁，要多個薯條，野飲就espersso...你飲咩呀？」
「er…一樣吖。」
「係咁多。」
侍應收返個menu之後就走咗。
「你睇吓啱唔啱食，唔啱再叫啦。」
「唔使喇...啱呀...」
「不過唔好意思呀，明明係你生日都要你請。」
「唔緊要啦。」
傾咗一陣之後，嘢食同嘢飲都到咗，同樣，相機食先。美食配美景配美人，真係絕配呀！
食完賣咗單之後，我哋就上返去觀景台睇夜景。
「夜景真係別有一番風味呀。同晏晝嘅味道並唔一樣。」
一片漆黑中，城市中嘅光芒尤似黑夜中嘅星光，香港嘅夜景真係名不虛傳，怪唔得咁多遊客都慕名而來啦，我身為香港人，都係第一次睇。
「阿賢，最後喇。」
「咩最後呀？」
阿雯隨即係佢嘅細袋度攞咗一盒嘢出嚟。
「送俾你架，你開嚟睇吓。」
我帶點疑惑接過個盒，再慢慢打開，入面放住嘅係一隻手錶。
「做咩無啦啦送野俾我呀？仲要送手錶？」
「今日你生日嘛～我一直都有記住架～」
「同埋...隻錶係我特登親手去整架，顏色配搭都係我自己揀架，仲咗個底刻住嘅嘢。」
聽到我就攞起隻錶反轉佢，錶底刻嘅係WKY&WCM。
「希望你第時睇返隻錶會記得我地之間嘅友誼，我地共處嘅時光。」
「多謝你，我好鐘意呢份禮物。」
「返去喇，天氣都好凍～」
我地落返執就搭巴士搭歸，然後一齊返去。
「拜拜。」當行到去分岔路，我地就道別離去。
「阿賢。」阿雯係背後叫停咗我。
「嗯？」我拎轉身，望住佢。
「你...有冇嘢講呀？」
「…嗯...有！」
「...多謝你...我今日好開心，好多謝你俾咗個我人生中最正嘅生日我！」
「...嗯...唔...唔使...」
「記得溫書呀！拜拜！」佢聽到之後，神情落幕，講咗兩句就回頭離去。
而我，亦都回頭離去。