美好世界的沉思者/ADVANCING (重製): 12. 聯動間奏

唱完之後所有人都係度歡呼，每個人都好想知究竟個個人係邊個，包括我。

知道咗阿雯佢係呢間學校有鐘意嘅人個陣，真係有啲開心又有啲傷心。開心嘅係有機會係我，唔開心嘅係，條件比我好嘅大有人在，靚仔過我，高過我，叻過我嘅都有，就咁睇係我嘅機會就唔大，不過...除咗我哋呢班嘅男仔，佢仲同邊啲男仔有來往呢？

表演晒之後，老師又表演埋就嚟到宣布得獎名單嘅時候。

「宜家有請羅Sir幫我哋頒發其他組別嘅季軍。」
「攞到季軍嘅係...5A班嘅...5B班嘅...同埋5C班嘅...！」

聽到主持人嘅口中講出我哋講名個刻，世界好似停頓咗，難以置信我哋可以有獎攞！我哋12個人全部都擘大個口得個窿。擘完我哋就錯錯愕愕咁上台攞獎兼影相。





最後我哋除咗攞到其他組別季軍之外，仲攞到最佳合作獎，而阿雯就攞到歌唱組別最佳台風獎。

「應承咗你，我做到咗喇！我哋雖然攞唔到冠軍，但係都有個季軍同合作獎。」

「得啦～攞到獎已經好好架喇。」

「嗯！」
「不過...點解你參加咗比賽都唔同我講嘅？」





「呢個...係一個驚喜嚟！」

「多口問句吖，你...講嘅個個人係邊個呀？」

「咩邊個呀？」

「就係你頭先係台上面話送隻歌俾人，送俾邊個呀？」

「秘密！」
「保持神秘感呀！」





「唔講就算～」

我哋班嗌咗炸雞，pizza同埋有一啲薯片腸仔薯仔咁，飲品方面就有各類汽水同茶。成日就係食，玩，影，傾，就咁就完咗。接住而嚟嘅就係寒假，然後就考試。

「終於有假放，大好喇～」食完嘢志偉就摸住個肚講。

「係呀，今次要玩返夠本！」傑仔講。

「咁你地嚟唔好放飛機呀！我唔食飛機餐架！」呢個時候我行咗過嚟講。

「你就唔好放飛機呀！」呢個時候佢地四個異口同聲一齊講。

「仲玩？要考試喎～」突然係我隔離嘅阿雯講咗句。





我地五個人即刻冇晒癮，真係好掃興。

「返去lu～」威威講完我地就正式返去放假。

走咗之後，我同阿雯就同我班朋友分開走咗。

「咁早返去你有咩做呀？」行係我隔離嘅阿雯問我。

「冇呀，應該都係瞓個晏覺先，起身就正式開始過我嘅聖誕新年囉。」

「唔溫書架？」

「er…溫！緊係溫啦！一定溫。」講就咁講，但可能都係幾日溫一次，每次溫得一粒鐘，仲要淨係溫數學。

「既然你返到去又唔溫書又冇嘢做...不如碌ling吖，我哋好耐冇一齊玩過喇。」因為呢兩個月我哋都忙住準備表演嘅事，相信阿雯亦都係，莫講話一齊玩，我連自己一個打都冇。





「好吖！」

去到個時發現條條lane都有人，冇晒位，所以我哋要打就要等，而且係我嘅前面仲有好多人係度等緊，可能因為佢哋都開始放假，所以咁得閒咁多時間嚟打保齡球。最後我哋都冇等，走咗。

「唉～咁多人架嘅～」

「唔緊要啦～下次再打過囉！」

「宜家又冇嘢做，附近又冇嘢行。」

「嗯...我諗到，我帶你去一個地方！」

講完我就帶咗佢上咗架的士前往目的地。





「邊度嚟架？咁多人嘅？」

「呢度係南豐紗廠，入面好多cafe呀工作坊咁樣，仲有好多打卡熱點架，好多人都響度影相。」

「好細心喎～知我鐘意影相。」

我同阿雯就行咗入去南豐紗廠入面周圍行吓，發現都有好多人係度放狗，而阿雯見到啲狗仔就發晒癲，行過去踎低摸佢哋，又影佢哋。

「你好鐘意狗架？」

「係呀！不過係狗仔，大狗好似好惡咁～」

「咁你有冇養狗架？」

「冇呀～因為我同爸爸一齊住，我每日又要返學，佢又返工，都冇咁多時間照顧度狗仔，又唔想佢成日自己一個係屋企咁悶咁寂寞。」




「但有得養，我想養八哥，好得意好可愛！」

「但係好樣衰個喎八哥～」

「我覺得cute呀！哼！」

除咗玩狗之外，我哋仲去咗睇展覽，可能我唔係一個文青，我都冇咩興趣，又唔理解佢想表達啲咩嘢。但相反阿雯佢就睇得好入神，每一個展覽都睇咗好耐。

睇完之後我哋終於去打卡，佢幫我影嘅相就好完美，但我幫佢影嘅就...勉強可以接受。其實起初係不堪入目，係一路影一路受到阿雯嘅教導先有啲進步，但距離阿雯嘅級數真係連車尾燈都睇唔到。

最後我哋食咗個晚飯，買咗兩杯手搖杯加一個甜品，坐低係個度慢慢嘆。睇住佢好甜咁慢慢食完我哋就搭巴士返屋企。

「係喎，你22號得唔得閒，有冇人約呀？」

「冇呀，做咩呀？」

「咁我個日就約定你架喇！」

「好呀！冇問題！」

返到去，阿雯都再一次傳咗個訊息俾我提我。