美好世界的沉思者/ADVANCING (重製): 11. 進行曲/詠嘆調
又回到瘋狂練習嘅時間，每日放學，返到屋企，星期六日都不停練習。
但因為一月就要考試，所以係練習嘅同時，亦都不忘要去兼顧學業，努力溫書。而我更因為應承咗阿雯我考試會努力溫書，考到好成績，所以我都唔可以偷懶。
「你練習還練習，仲有一個月咋距離考試，你都唔可以因為練習而忽略咗，知唔知呀。」
所以每個禮拜都會抽兩日出嚟，放學唔係練習，就係同阿雯去圖書館度溫書。
雖然我覺得我中文通識都已經冇得救，但係每次溫書個時我都會做到個樣出嚟。但講真個句都唔係真係咁識做，出到嚟個成績麻麻。
但係每次做完阿雯都會教返我做錯嘅個啲係咩題型，有咩方法可以容易啲搵到答案，再砌個答案出嚟。
至於通識...唉，背得幾多得幾多啦，盡背啦。
至於數學同埋英文就係我嘅強項，老實講，我實在唔知有咩好溫。
而數學我冇咩好講，我實在太～勁喇！就係上堂個時勤力咗，做多咗題，但啲題都係個阿Sir私人醒俾我，特別難，仲難過書個啲。而個阿Sir當然就係驚訝我竟然會突然發奮圖強，以往嘅我吊兒郎當，上堂都唔做嘢。
而我亦都keep住教阿雯數學，同時都有一齊溫物理同生物。
好快，真係好快，光陰似箭，日月如梭，過多幾日就係聖誕聯歡會。
「唔好話我唔俾機會，宜家我就俾個機會你，呢幾日我唔迫你溫書啦，你去練習啦！」
「真嘅？！」
「睇你開心到咁吖，好唔想溫書呀？！」
「唔係，我想！」溫書當然係冇人想，但有得同你一齊溫書，我就每日都想。
「有代價架！你唔可以空手而回，要攞到獎，最好就贏個冠軍返嚟俾我！」
「呢個基本啦！」
最後呢幾日，我哋一行12人加把勁練習，今次就唔係跳唱返初賽個首歌，而係新一首，所以都幾唔容易。
嚟到才藝表演當日，我好早就起咗身。而其他人相繼都起咗身，每個人都係個群組上面打咗句加油，除咗係講自己起咗身，同時都係鼓勵自己，鼓勵大家，為12個人打氣！
今日大家都襯晒衫，大家都係著最普通嘅黑白色衫，我著咗件黑件連帽衛衣，下身就一條黑色嘅skinny，再加對米色運動鞋。
而阿雯就著咗件啡色嘅長袖冷衫，下身加條灰色格仔及膝裙，啡色襪，黑色布鞋。
「你哋襯衫dress code呀？」
「係呀，大家都係黑白色。」
「今日記得加油！」
「多謝晒。」
等咗幾個字，我哋12個人因為要表演所以要去準備吓先。
臨出門口，班主任Miss Cheng同全班都向我哋講咗聲加油！向哋講咗聲多謝之後我哋就走咗。
今日總共有15組參加者表演，而我哋就係第七組。同樣我哋先去一個地方集合，等到有人通知之後我哋就跟住佢去行後門上後台。
當到我哋出場個時，學生司儀就介紹我哋，而我哋就企向紅幕後面準備。
女：「Ronald？你做咩著咁少呀？」
男：「聽講跟住落嚟呢組佢哋表演嘅歌聽完成個人會好熱晒，咁咪除晒衫囉。」
「焫焫焫焫焫焫著，嘩，我自己唱咗句都熱晒喇。」
女：「你唱到咁就唔好唱啦，請返跟住落嚟呢組表演啦。」
「跟住有請5A班嘅...5B班嘅...同埋5C班嘅...總共12人跳唱曲目，Ignited。」
佢哋行返去後台之後，紅幕亦都慢慢拉開，台下亦傳來歡呼聲。
音樂響起，正式開始。
—————————————————
表演完畢，紅幕拉上，我哋亦都返去後門從後門離開禮堂。
「嘩～完咗喇！超緊張呀頭先！」
「被咁多人望住真係第一次呀！」
「頭先我好似有個位置錯呀點算呀？！」落到去之後我哋12個都鬆一口氣，然後就一路慢慢行返去禮堂一路傾。
雖然頭先個禮堂好黑，但唔知點解我好似見唔到阿雯坐咗喺邊。算啦，可能真係太黑，又要係咁郁，成個腦又都係ignited嘅舞步同歌詞。
從正門返到上禮堂我哋就搵咗個位坐低咗做觀眾，睇其他組別嘅表演。
中六嘅畢業前最後紀念，跳機械舞、wave個啲都有，裏面都有好多我識嘅人，我都一一為佢哋歡呼，為佢哋自豪，為佢哋鼓掌。
「嘩～真係精神呀！呢隊人第時一定係rubberband第二代呀！」事關上一組佢哋夾band唱咗rubberband嘅未來見，一個vocal、一個結他、一個bass同埋一個鼓，而且亦都唱得非常神似。
「冇錯呀！時間過得真係快，精彩嘅表演嚟度最後一場喇～」
「唔好唔開心，嚟緊嘅呢一位佢帶咗隻情歌嚟，仲自彈自唱，好似係送俾人架！」講到呢句，台下一片哄動，個個都好想知邊個咁大膽，佢又係想送俾邊個。
「咁就事不宜遲！即刻請佢出嚟啦～我哋有請5C班嘅温靖雯，為我哋唱出Lover！」
阿雯佢竟然有參加到聖誕才藝比賽？！仲要成功入到決賽！點解佢唔同我講嘅？！
但係坐係我側邊嘅人好似一早知道咁，不停係度叫囂歡呼，帶動現場氣氛。
即係話，得我一早一個唔知？！
我帶住訝異嘅表情望住緩緩拉開嘅紅幕，中間企住一個身材窈窕，曲線優美，樣貌清秀，天使下凡般嘅女仔攞住枝結他企係支mic stand前面。
冇錯，佢真係阿雯，真係我哋班嘅阿雯，坐我隔離嘅阿雯，我鐘意嘅阿雯，一齊溫書、碌ling、行街嘅阿雯。
「今日呢首歌，我想送俾一個人，希望你收到，明白我嘅意思，知道我講緊你，唔好懞盛盛。」等到紅幕完全拉開，阿雯用咪講咗句，之後佢就正式開始自彈自唱。