美好世界的沉思者/ADVANCING (重製): 6. 變化

首先第一日測嘅係中文，中文差嘅我當然係唔識做，唯有靠撞同埋靠直覺，後面嘅文言文部分就差唔多空晒，因為根本就睇唔明。

每個測驗考試完咗之後對答案係每個學生都會做嘅，我哋班都會，而我都會。

「點呀？你哋識唔識呀？」考完之後我哋一行人就去咗食飯，而阿雯就同班女仔一齊食。

「ok啦，篇文比較易。」

「我就唔得喇，中文我就最弱嘅，預咗僅僅合格咋。」我好冇信心咁講。





「合格？會唔會太高分？」

「其實呢，我中文未肥過架～」

「乾炒牛河，星洲炒米，豬扒飯兩個，蝦仁炒蛋。」 啲飯到咗，我哋就開動，唔再講嘢，費事噴飯。

第二日考英文，英文都係我比較有信心嘅一科。而相反我啲朋友就都幾差，睇唔明，聽唔明，唔識講。

第三日係數學，然之後第四日係通識，再之後就兩科選修科。





考晒執緊嘢準備走個陣發現阿雯伏咗係枱唔郁。 「做咩呀？好多唔識呀？」 佢點咗點頭。

「唔緊要啦～測驗嚟啫，考試努力啲得架喇～」 佢冇任何反應。

「食唔食飯呀？請你食喇。」聽到呢句佢就即刻抬起頭。

「食咩呀？」

「你想食咩就咩啦！」





「抹茶館！」

「快啲執嘢啦咁。」佢即刻快快手執嘢走。
「喂！今日你哋自己食啦。」我拎轉頭同班朋友交代吓。

「唉，得架喇！明架喇！重色輕友呀！」佢哋一路走一路重複「重色輕友」呢四個字，我真係冇佢哋咁好氣。

山長水遠搭車去寶琳就係食個抹茶館。
「嘩～個炸雞同個溫泉蛋好正好好食呀！」 而我就嗌咗個饅魚丼飯。
「我可唔可以嗌多個甜品呀？」

「仲食？肥死你呀！」

「我好肥咩？」講住佢摸摸自己塊面。





「唔肥呀，不過肥咗肯定都係咁靚女架啦！仲肥嘟嘟好可愛添～」

「咁我叫架喇～」 等佢食埋個甜品之後我哋就一齊行書局，全程都係得佢係度睇書我就冇睇。

「唔使睇喇，想做數就問阿Sir攞，佢大把呀。」我攞起佢手上本書擺返上架。
「其實你唔使咁唔開心啦，短短兩個月間，我睇得出你數學叻咗，雖然都係唔及我。」

「你又知？」

「你之前成日問數，之後就問少好多，啲功課都錯少咗。」

「咁留意我嘅？」

「哼！靚女緊係留意架啦！」





「把口咁甜......」講完佢就自己行咗去第二度。

以前，我嘅日常交往對象都係我個四個朋友，你出現咗之後，生活上產生咗好大變化。

由以前甚少同女仔交流嘅我變到宜家經常同你交流，由以前上堂只係瞓覺去到宜家唔瞓覺，雖然都唔會聽書，由以前唔敢同靚女講咁多嘢去到宜家同你呢個靚女對答如流。 只係兩個月就變化咁大，睇嚟你對我影響真係好大。

「快啲啦！仲企響度，走喇～」佢企起門口望住我望住佢發呆。

「嚟喇！」