美好世界的沉思者/ADVANCING (重製): 7. 重複

個試就考完，我地當然就係回復正常，打返機碌返ling。

「各位召喚師，好耐冇見！歡迎返嚟召喚峽谷！」傑仔係個咪度講。

「唔好咁中二啦～」阿霆講。
「係喎，就快聖誕聯歡會喇，你哋參唔參加呀？」阿霆講。

佢講嘅唔係聖誕聯歡會，而係聖誕聯歡會入面嘅才藝表演，通常啲人都會唱歌跳舞，有啲人會彈唱，有啲會夾band咁樣。

首先會有個初賽，每個或者每組參賽者都會表演一段仔先，然後啲老師就會做評判，決定邊個可以係聖誕聯歡會個日上台表演。





「做咩呀？叫我地上去做小丑呀？」
「你咁靚仔就話做咩都得啫，我地點樣呀？上去冇人睇架～」

「當陪下我囉～最後兩年喇，唔想留返啲回憶咩？」

「唉～好喇好喇，但......表演啲咩先？」

「我諗過架喇！我地就表演跳唱！咪會分初賽同聯歡會當日嘅～兩日兩隻歌。而歌我都一早揀好咗，就係Mirror嘅歌......」





然後我地就一直傾個表演，但當然都不忘打機啦～而之後放學我地都留係學校度傾同埋練習。

「你哋練緊才藝表演呀？」阿雯問我。

「係呀！我哋諗住跳唱Mirror嘅Reflection呀。」

「嘩～又跳又唱，好勁喎！」

「你真係......講呢啲！」





「睇吓你吖～讚你兩句就面紅，真係好cute呀！」
「加油呀！要入到決賽係聖誕聯歡會當日表演呀！」

「多謝。」
「係呀，之後我哋應該每日都要練舞唱歌，你唔使等我架喇，你可以返去先。」

「嗯......我諗吓啦～」

「我怕你辛苦咋～又要等我，我又陪唔到你，伯你悶親咋～」

「有得睇你哋練習喎～唔緊要啦！」

之後每日放咗學我哋一班人都會練習，星期六日都去咗啲舞蹈室練，日以繼夜夜以繼日咁不停練。

係測完驗一個星期多啲之後，成績終於都出咗，有人嘅心情係一日內又起又跌再起；有人冇開心過；但係就冇人全日都開心。





「唉，我數學考得真係好差。」阿雯係側邊揸住張數學卷係度唉聲嘆氣。

「睇過...唔係吖～ok呀！都有65分！」

「65都叫好？！」

「好～你睇吓，其實你錯嘅都係啲比較難比較迂迴曲折嘅題目啫，呢啲題其實做多啲得架喇～」
「短短1個月都唔係有好多時間俾你慢慢練，所以呢......你勤力啲ok架啦～」

「咁你呢？你中文同通識點呀？」

「都唔錯呀～」

「...…果然真係冇溫......又唔合格......」佢係我枱面攞咗我份卷嚟睇




「堂堂都唔聽書！堂上個啲測驗又唔做又交白卷！」

「冇嬲啦～我都應承咗你考試會考好啲啦！」

「係只好講呀。仲有呀，食晏個陣請我食飯食甜品，當係你唔聽我講激嬲我嘅賠償。」佢撓住雙手擺係胸前扮嬲。

「咁都得？！唉～好喇好喇，你話咩就咩啦～」

「抵錫。」講完佢細細力拍咗我塊面兩下。

明明係喺度嘲弄我，但係我竟然會心微笑，打從心底展露出嚟嘅笑容。

晏晝我賣甩咗我班豬加之後我就同阿雯去食飯。

係門口等咗幾分鐘位就入得去，坐低之後睇咗陣menu我就嗌咗個麵同杯咖啡，而阿雯就嗌咗個拌麵同柚子茶再加個雪糕心太軟。





「你食咁多嘢都唔肥，真係好嘢。」

「你冇聽過咩，女人有兩個胃架嘛～」

我好快食完之後就望住佢係度食個心太軟，食相都係咁好睇，所以我就攞咗部手機出嚟影低佢。

「做咩影我呀？」

「冇呀，記錄低人間美景啫～」

「哼～」

好快佢就食埋個心太軟，當我準備俾錢個時咁啱見到阿個嘴邊留有一啲心太軟嘅痕跡。





「咪住。」我見停咗佢之後就攞咗張紙巾出嚟幫佢抹嘴。
「污糟咗。」

「唔該......」

食完我哋就返返學校上下晝嘅堂。

因為我需要練舞練歌，所以就放咗學就留咗係學校，而阿雯就同咗佢嘅朋友一齊走先。

好彩嘅係我哋12個人入面有啲人本身跳舞就好有天份，所以佢哋自己嘅舞好快練好，宜家就只係練走位配合，到時動作就可以一致，唔會有人快咗慢咗，又唔會發生碰撞事件。

當我哋自認已經練得唔錯，睇返練習時拍嘅片之後，發現大家動作都一致，過程間都冇人撞人事件發生。之後就係唱歌部分。

因為事前我哋已經分配好晒每個人嘅位置，每個人都會自己練咗先。而宜家就係大家一齊唱，聽下大家唱成點，俾啲意見。而最後就兩樣嘢，跳舞加唱歌一齊再練，就咁樣練多個禮拜。

轉眼間，聽日就已經係我哋嘅初賽日，亦都係3日初賽嘅最後一日，聽日總共有12組出場，而我哋係第8組出場。換言之，今日係最後一日練習。

返到屋企都自己再練多幾次隻舞同歌，然後就沖涼訓覺，養足精神！