美好世界的沉思者/ADVANCING (重製): 5. 調節
即使每一日上堂都冇瞓覺，冇發白日夢，但係根本上堂個陣我都冇聽書。
正當我係櫃桶耷低頭打手機遊戲個時，突然就有隻手搶走咗我部手機。
即刻淆晒底，好驚咁慢慢拎轉頭望過去，死啦，我唔想被人沒收手機呀。
「老師行緊過嚟喇，仲打。」阿雯收埋我部手機同我講。
等到個老師行到最尾再行返出去個時，我即刻問返阿雯攞返部機。 「得啦，俾返我啦。」
「唔得喎，放學先啦～」 一聽到即刻耷晒頭，個人冇嚟神氣。
「就嚟測驗啦，仲掛住玩，你成績好好咩？」
我拎一拎頭。
「咁咪係囉～」
雖然成日我都冇玩手機冇瞓覺，但唔通我真係會聽書咩？不過冇嘢做時間真係覺得漫長咗。
數學係我最叻嘅科，而個阿Sir亦都好好人，佢都好清楚我數學好掂，所以我做晒啲功課之後我都唔做嘢，佢都好少理我。
但我身邊嘅阿雯就正好相反，每堂都會舉手問阿Sir，搞到阿Sir要周圍行嚟行去真係衰。
「點呀，邊度唔識呀？」
「呢度囉，不過阿Sir教咗我喇～」
「以後有唔識咪問我囉，唔好煩呀Sir喇～」
「有個勁人係你側邊又唔問，晒料。」
「下嘛？咁......呢題點做呀？」佢搵咗宜家教緊個一課最尾個練習入面最難個題，隔離仲打咗幾粒星。
「一早就做咗啦。」我講完就攞咗我本書俾佢睇。
「勁喎！」
「知我咩料啦！」
「咁......我諗到喇。」佢面上帶住自信嘅笑容。
「你教我數學英文，我教你中文通識。」
「下？！」
「冇下喇，就咁話！今日放學唔好走呀！」
中文同通識一直都係我最唔鍾意嘅科，亦都係我最唔掂嘅科。
轉眼間就放學。
「喂！腎仔，走喇。」威威佢哋執晒書包同我講。
「Er...…我......有嘢做......你哋走先啦。」我向阿雯個方向側頭。
「哦～明嘅明嘅！唔阻你哋兩個喇，拜拜！」
就係咁，每日放學都要留低係度溫書，一溫就溫成個幾兩個鐘，但一直都係得佢問我嘢，我好少問。
「今日我要參加課外活動呀，溫唔到喇。」嚟到星期三，每個星期三都有課外活動，運動學會或者制服團隊。
「咩活動呀？」
「童軍呀，我係師兄嚟，我要去教班細架。」
「咁我跟埋你去吖，得唔得呀？」
「你唔返屋企？」
「返到去咪又係得我一個，好悶架～你當陪下我啦～」
「咁好啦。」
教班細嘅真係好辛苦，又懶散又唔正經但又要參加。或者我係可以唔去嘅，但本身童軍就冇咩師兄師姐，咪當係去幫下老師手囉，個老師又唔係童軍出身。
今堂教佢哋嘅係步操，步操係最難，要一直操腳操手冇得停，動作又要標準，手要直要舉高到膀頭咁高，腳又要90度高。不過佢哋算係好架喇，有冷氣嘆，辛苦極有限啦。
「差唔多喇，放佢哋break啦。」老師望望隻錶行過嚟我身邊同我講。
「嗯。」
講完我都埋去休息下。
「點呀？會唔會悶親你呀？」我望住阿雯講。
「唔會吖～第一次見你罵人。」
「而且頭先我都去咗同隔離啲人傾計。」
「你唔好誤會呀，我唔罵人架～係佢哋咁樣我先喝下佢哋咋。」
「遲啲我畢業都要有人幫老師手架，得佢一個唔掂架。」
「但係......人哋都未必肯再嚟架。」
「我知呀，所以我都唔知點算。算啦，遲啲先再諗。」 放完break因為老師叫我唞吓，宜家就由第二個師姐接替我，而我就同阿雯同埋一邊，佢就溫書，我就睇手機。
「腎仔！」 應聲我望向隔離，係隔離紅十字嘅人，叫做詩姐。
「做咩呀，唔使做呀？」
「真係唔使呀！所以好悶囉～」紅十字個邊同我哋一樣有第二個師姐教緊班細。
「你知唔知呢，頭先有個師弟走過嚟同我講話佢好開心。」
「做咩呀？」
「佢話好彩冇入童軍咋，佢見到你咁惡，罵人罵得好勁好驚你。」
我都唔知點講好，個個人淨係睇到我呢面或者真係會誤會我驚我，每次都只好笑而不語。 「我唔係咁架。」
「我知～第一日識你咩。」
「不過我唔係嚟搵你架，我搵阿雯。」
「咁我哋走喇！」阿雯放低咗本書就跟咗詩姐走，只留下我一個。
我就去幫另一個師姐手訓練班童軍，執下啲動作個啲嘢。 好快，今日嘅課外活動時間都差唔多，同佢哋講埋下一堂嘅嘢就俾佢哋走。而同時阿雯同詩姐都返到嚟。
「去咗邊呀？」
「唔講你知！」佢哋一齊講出嚟，神同步！講完佢哋就相視而笑。 之後我哋就同詩姐分道揚鑣，各自回家。
係車上面嘅時候。
「你幾時生日架？」阿雯拎轉頭問我。
「我？12月22號囉。」
「22號......摩羯座喎。我都摩羯座，我1月14號。」
「1月咁慘呀，要考試喎～」
「係喎，唉......」
「咁你個陣要送份禮物俾我哄我開心架。」
「嘩！咁樣呃禮物呀...」
「好啦好啦，到時送份大禮俾你！」
「講咗架！唔好反口呀！」
「勾埋手指尾信我喇掛～」我舉起隻手指尾。
「反口就殺咗你！」
「仲有，返到屋企記得溫書呀。」
「得啦～」
「係喎，你物理同生物掂唔掂架？」
「都......掂嘅......我諗，我係之前間中學都係揀呢兩科嘅～」
「掂就最好啦，幾驚你唔識～」
「不過你有咩唔識都可以問我嘅，我唔單止數學勁，物理都勁架！」
「嗯～知喇～」
好快，就到月底，意味住得返唔夠一個星期就mid-term test，全班人都明顯變得與以往不同，每個人都好努力溫書，包括我個4個朋友，但並唔包掂我。