美好世界的沉思者/ADVANCING (重製): 4. 火焰
返到屋企，我即刻瞓返個覺補補眠，瞓到去夜晚先至起身。
睇返手機先至發現阿雯send咗幾個訊息俾我。
「我係阿雯呀。」
「一唔一齊食飯呀？」
「？」
「瞓咗？」
「算啦，我自己食。」
「sor呀，我返到屋企太攰瞓咗呀。」我即刻send返個訊息俾佢。
我食完晚飯之後就同我班朋友一齊打下機。
打完之後我即刻自己簽晒啲回條通告佢再沖涼。冇錯，自己簽。但係係阿媽俾我先自己簽，因為我係自己一個住，但有時阿媽都會嚟我屋企打掃同攞嘢食俾我。
呢個禮拜因為日日都放半晝，所以每日都係返學hea下，都冇點上過堂，放學返屋企都係打機，食，同瞓。
去到星期六，起身個陣已經係晏晝3點鐘。 一打開手機先發覺，弊！原來今日約咗阿雯。 我即刻以最快速度沖涼洗面吹頭換衫著鞋。
「鈴鈴鈴鈴鈴……」手機響咗起身。
「喂邊位？」
「你係邊呀?」係阿雯打過嚟。
「er…...我轉個街口就到。」
「你係咪仲係屋企呀？」
「緊係唔係啦，真係出咗嚟喇。」
「咁好啦，等緊你架。」
原來已經3:30，我落到去即刻上咗架的士飛過去。
「Sor呀，遲咗。」
「知唔知我等咗你幾耐呀。」
「8個字。」我去到個到已經3點8。
「第一次約女仔就遲到。」
「…...你啱啱先起身啦一定，褲鏈都未拉呀。」
我聽到即刻望向自己褲浪位置，唔係吖，拉咗呀。
「嘻，傻仔，自己有冇拉都唔知。」
「笑返咪好囉，唔嬲我啦。」
「嬲架，所以你去延長時間啦，得返幾個字唔夠打呀。」
「收到！」 我即刻去延長一個鐘再借埋對鞋就返去阿雯度，一過去就見到佢打咗個全倒。
「勁喎！全倒！」
「緊係啦，我勁吖嘛～」
「我呢個學生真係勤力又有天份，不過應該係我教得好，嚴師出高徒。」
「你邊度嚴啫，日日係度打機，遲早就俾我超越你喇～」
「你又知？」
「你啲朋友講架，你唔好唔知你日日都咁遲返，我哋又咁早返，我知道你好多嘢喇～」
「咁我咪赤裸裸俾你睇晒？」
「變態！」
「要唔要賭吖？」
「點賭？」
「如果碌ling我贏咗你嘅話，你就要聽我話一年。」
「一年咁耐？！」
「唔夠膽呀？唔好唔記得我仲係新手嚟，仲要係俾你教架～」
「好吖！咁如果我贏咗嘅話，你就...點好呢？」
「你想點就點！」
「好！我贏咗就慢慢諗下要咩好！」
「好！開始啦！」
輪流打咗一局之後，138比150。
輸嘅...係我。點會？
「點會......」
「我......我......我冇食飯啫，食咗飯實贏你架！」
「賴地硬呀？」
「有人唔認輸，係度蝦女仔，灰～」
「邊有呀......唉～好喇好喇，我輸喇。聽你話一年囉！有幾耐啫。」
「你話架！咁我哋去食飯先啦！」
「食咩我話事！」 之後佢就帶咗我去將軍澳度食韓燒。
「嘩，正呀，我想食好耐架喇，但一直都冇人陪我食。」
「咁我咪攞咗你嘅第一次？嘩！我嘅榮幸！」
「變態！」
其實輸都好似唔錯，好似咁，輸咗有得同佢兩個人出街，製造只屬於我哋兩個嘅回條，人生中多咗我哋兩個獨處嘅時間。
—————————————————
食完飯我哋就係個商場度周圍行。
途中佢好似前世未行過街咁，全程都係度擔天望地，左望右望咁。
「睇吓你吖，成個細路女咁，第一次行街呀？」我見到佢咁樣就講笑串下佢。
「係呀。」
「下？！」真係估唔到係真。
「講笑咋！咁單純架～」
「成日都響度講笑，好好笑呀～」
就係佢四圍望觀賞緊呢個商場嘅時候，眼見前面有幾個男人掛住吹水唔睇路就嚟撞到之際遇，我一手捉住佢隻手，拉咗佢入我嘅懷中。
「小心啲呀！差啲撞到喇！」
「唔...唔該...」
過咗幾秒，先醒覺到我哋宜家個動作同相擁冇分別，我先至放手後退幾步，大家塊面都係紅晒。
「唔...唔好意思。」 大家都冇出聲，唔敢對望。 我哋一直維持住呢個狀態行到巴士站，上到車，揀咗個坐位就坐低咗。
大家都戴住耳機聽歌，閉目養神。 聽聽下，膀頭被樣嘢壓住，我擘大眼望一望。 發現阿雯佢攰到瞓著覺，仲唔覺意瞓咗落我膀頭。
個刻我攞出手機幫佢影咗張自拍照就沉迷於欣賞相中嘅佢。
睇嚟我真係好中意佢，但係... 佢又鐘唔鐘意我呢？ 佢呢啲女神，我呢種毒撚，真係有可能咩？ 我會唔會太過有自信？算啦，或者一直維持住呢個狀態都幾唔錯。
「起身喇，到喇。起身喇～～～～～～」
「嗯？」佢睡眼惺忪，卒住眼咁醒。
「到屋企喇，要返屋企喇。」
「嗯～」
「星期一見啦。」
「好！拜拜～」 我哋又再一次係分岔路離別。
去到星期一，今日係第一日返全日，即係話每堂嘅時間會變長咗，食完飯仲要繼續上堂，係極眼瞓嘅情況下。
「你又咁遲返嘅？我唔係叫咗你早啲返咩。」我坐低咗，係我隔離嘅阿雯就即刻煩我。
「係咩？冇睇訊息喎～」
佢俾咗個眼神坐我另一邊嘅威威就即刻講。 「你尋晚一定又好夜瞓啦，睇吓你對熊貓眼，又打晒喊路咁。」
講返先，宜家個位調咗，我同阿雯都調前咗一個位，而威威同傑仔就坐我左後方嘅兩個位，而至於阿霆佢哋兩個就坐我同阿雯後面。
「哎呀，傑仔呀，我哋唔好打機咯，就嚟考試喇因為～」
「下？」傑仔好明顯唔知咩事就下咗聲。
「學業重要呀！」威威一路講一路就俾眼色傑仔。
「呀！係呀係呀！唔打唔打！」 你班友真係當我盲個喎，啲戲咁鬼屎。
「喇～冇話我殘忍，我俾你宜家瞓一陣，因間上堂就唔好瞓喇。」
「冇玩啦～得幾個字咁少～」
「咁你唔好瞓喇～」
「呀，唔好唔記得你應承咗我要聽我講架。」佢仲要特登加多句。
「Woo hoo～～～」阿霆佢哋聽到呢句之後就即刻起哄。
「唉～知喇...」 就係咁，每日我上堂都冇瞓過覺，每日都打少咗機，每日都早咗返嚟。
一直去到十月份。
「各位，仲有一個月唔夠就mid-term test喇，大家記得加油。」Miss Cheng一大早就係度發表偉論，鬼唔知咩，而且mid-term test又唔係佔好多分，考試先努力都唔遲啦。」