美好世界的沉思者/ADVANCING (重製): 3. 命運
「叮叮叮叮叮～」
鬧鐘響起，我睡眼惺忪咁係床邊攞係部手機熄咗佢，然後即刻合返埋眼，真係好想再瞓多陣。
好彩我較個鬧鐘較得早，因為我好驚自己會聽唔到個鬧鐘，等佢響好耐應該點都醒到。
我訓咗係床度現咗陣手機就落床，換校服，食早餐，再刷牙。
我睇住個巴士app計下個時間，計到啱啱好，等到夠鐘先落去搭車。
搭車嘅過程中，我戴住藍牙耳機，聽住歌。
「下次唔好再咁遲喇，等到臨閂門先返嚟。」企係門口嘅訓導主任望住入緊門口嘅我哋講。
入到去去小賣部買咗枝水去埋個廁所先上課室。
「乜咁遲架，遲到呀？」
入到班房係後面搵咗個空位坐低，前面條友就拎轉頭同我講。
「遲你個頭，買嘢加去廁所啫。」
前面條友就係我4個朋友其中一個，叫威威，陳振威。佢好矮，得160，個人冇咩特別，成績平平，運動平平，樣貌平平，咩都係平平。
「你班友仲好講，一開學就要我自己一個坐，你哋就兩個兩個坐。」
「點都要有個人犧牲架嘛，鬼叫你最遲咩。」我右前方，第二個朋友拎轉頭搭嗲，佢就係傑仔，全名趙樂傑。高高地，幾好樣。
「點呀，做晒功課未呀？」
「做晒啦。」
「睇死你啲MC又係亂做架啦，一條斜線咁落，盲嘅都知你亂做架啦。」
一講到呢點，四條友一齊係度嘲笑我，斜線咁落真係同老師講到明我係亂做。
「唔使淆啦，暑期功課佢又唔會認真睇啫。」
隨即一個女人就係門口行咗入嚟行到去老師枱嘅位置。
「好，靜一靜。」
「你哋大部分人都識我架喇，我姓鄭，教你哋英文嘅。」
「頭先因為有啲事所以遲咗上嚟。」
呢個Miss Cheng已經教咗我哋5個四年，所以我哋對佢都好熟悉，佢亦都好好人。
雖則平時問佢幾歲，佢都特登唔講，但睇佢個樣應該都係20後。
「今日好趕呀，呢個禮拜都只係返半晝。」
「首先呢我哋處理一下班務，然後就去禮堂聽嘢，然後就返嚟放個break，好快就放學架喇。」
「首先呢，今年我年我哋會個插班生。」講完佢就向門口方向招一招手示意出面嘅人入嚟。
同時，全班人不分男女都好興奮，個個都好期待係男神女神。
「喂！正喎，希望係條靚女啦。」威威講。
「靚又點啫，你架？寫咗你名架？」
「仲有呀，啲女俾阿霆溝晒啦，你？算啦。」傑仔係隔離插把口。
阿霆，韓耀霆。都係我四個豬狗嘅其中一個。佢係全班嘅男神，全級嘅男神，以及全校嘅男神，即係校草，184高，大隻，fit，運動健將。
生到咁高都仲要坐咁前，激氣！
「冇玩啦，我都唔想拍拖。」坐係傑仔前面嘅阿霆講。
「咁多女都不為所動？你咩構造架？」最後一個朋友，志偉，張志偉，份人鳩鳩地，已經有一個拍咗2年拖嘅女朋友。
我就冇任何興趣，全班都係一般貨色，年年都有插班生，但都係得啖笑，唔通呢個我都要期待？而且期望越大，失望越大。
插班生呢個時候照老師嘅意思入咗嚟，然後企響黑板面前面向全班。
呢刻我見到呢個插班生之後我打咗個突。
而佢都咁啱見到我，個刻我哋對上咗眼，佢先係愕然，跟住嘅係一抹微笑。
「大家好，我叫温靖雯。你哋可以叫我Catrina，請多多指教。」講完佢就45度鞠躬。
「好！咁......Catrina你就坐係......賢仔隔離啦。」Miss Cheng指住我隔離個位同Catrina講。
「賢仔，新同學有咩唔識你就幫下佢啦。」
「下？......呀......哦......」
「好，咁我哋宜家派通告先，攞返去簽聽日交返嚟...」
「原來你係度讀架？」坐低咗之後佢就同我講。
「係呀，我都唔知你轉過嚟呢度同我一齊讀啦。」
「一嚟就講晒俾你知咩？變態佬！」
「不過我哋真係有緣，成日都見到。」
「哼！係喇！最開心係你喇！」
派晒啲咩之後，我哋就排晒隊去禮堂聽嘢，因為一開始都仲未編個隊出嚟，所以都係跟號數排，而Catrina因為係新嚟嘅關係，號數係最後，排隊自然就排最後。
但我哋邊會咁乖架，緊係同friend坐，所以我哋5個就一齊排。
「你就正啦，同到個靚女一齊坐。」係禮堂個陣，傑仔坐我右邊，阿霆就坐我左邊。
「你哋唔掉低我咪有得同佢坐囉。自己攞嚟嘅。」
「不過你哋識架？一嚟就咁好傾嘅。」
「講咗啦！係你哋唔信我啫。」
「咁你應該意志堅定啲嘛～多番強調，咁咪會信囉！」
「……」
聽完班老師主任校長講嘢之後，我哋就返班房。
「好喇，宜家放break，一陣繼續處理班務。」Miss Cheng講完就走咗。
「食咩呀一陣間？」威威問。
「照舊？」傑仔講。
「照咩舊呀？！食過咁多間舊舊舊舊乜啫！」我聽到即刻屌佢。
「海南雞呀！」傑仔話。
「得！」
「咁你同阿霆佢哋講啦。」
「你啲friend呀？」阿雯講。
「係呀，我班豬朋狗友。」
「講咩呀你？！」
「靚女你好，我係傑仔。」講完伸咗隻手出嚟扮握手實質就抽水。
佢哋逐個逐個介紹完之後，我哋5條友就一齊去交水費。
返到嚟就見到一大班隔離班嘅男仔圍住我哋門口。
「乜料呀？有人除衫呀？」
我行過去問咗其中一個人。
「呢班有個插班生，好靚女架！」
佢哋一定係講緊阿雯。
我哋搵到個位入去就返埋位。
「嘩，你睇吓，個個都係嚟睇你架。」
「你攞景定贈興呀？仲講。」
「不過你一陣係直接返屋企定食埋飯先呀？」
「食埋先。」
「我聽到呢，你哋頭先話去食海南雞喎，預埋我吖。」
「靚女叫實得架。」傑仔一聽到即刻拎轉頭講，嚇到我哋兩個都縮一縮。
好不幸仲俾班朋友知道我同阿雯嘅相識。
「嘩～真係變態嚟架。」
「睇你平時唔聲唔聲，真係嚇人一驚喎～」成個食飯過程一路俾佢哋笑我。
食完之後我哋6個人就分開，我同阿雯一齊返，佢哋4個就另一邊。
「係喎，你啱啱搬嚟，識唔識搭車？」
「識呀，搭的士囉，今朝都你搭的士返學。」聽到我真係笑咗出聲。
「笑咩喎，的士唔係車呀？」
「係係，你啱。不過呢巴士都有嘅。」
「咁你就搭呢架，搭兩個字就到架喇。」
一講架車就到咗我哋就上咗上層搵位坐低，佢坐入面，我坐出面。
「今日呢，禮堂個度呀，我隔離坐咗個男仔，佢係咁騷擾我，好煩呀。」
「咁你點呀？」
「緊係冇理佢啦，但佢真係好鬼煩。」
「咁......你同我哋班啲女仔坐囉，佢哋好nice，咁又有人同你傾計又唔會俾人騷擾。」
「咁好啦～」
行到分岔路。
「聽日見啦。」我講完就掉頭走向自己住嘅大廈。
「賢仔。」
「…...做咩？」
「多謝你。」
「多咩謝呀？」
「多謝你陪咗我咁多，啱啱嚟到我都驚自己會識唔到人。」
「哼，講呢啲。」
「仲有呀，攞你部手機嚟吖。」
講完我就行過去攞咗部手機俾佢。
「做咩呀？」
見到佢㩒㩒㩒，佢部手機就響咗。
「我手機號碼呀～」
「係咁啦，拜拜！」
佢頭也不回就走咗，而我望住手機上嘅號碼笑咗笑就返去我屋企。