美好世界的沉思者/ADVANCING (重製): 2. 驚天的重生
呢個禮拜日日都係咁樣過，每日都係度打機，食垃圾食物，煲劇，瞓覺，完全就係一個宅男嘅生活。
「喂！聽日最後一日喇喎。」
「冇講啦，破壞晒我心情。」
「你要廢我冇理由唔俾嘅。」
打完機食完飯我就即刻攞我啲功課出嚟做。咁耐冇郁過，個書包都已經鋪晒塵。
用咗2個幾鐘終於做晒，順便執埋書包，睇吓我下年升邊班。
5C
「你地下年升邊班呀？」
我即刻訊息我班朋友問佢地下年升邊班。
我食完飯沖完涼都已經12點幾1點鐘，所以我就即刻瞓覺。
正所謂，開心嘅時間過得特別快，又係時候講拜拜，今日就係最後一日嘅假期。
起咗身就碌下手機，睇下啲訊息咁。
「5C呀。」「我哋個個都5C。」「原班升。」「問人咩班之前要先報上自己咩班。」
我班朋友個個都5C，咁即係我哋5個又可以同一班。
「嘩，正呀，我哋5個又可以一齊喇。」講完仲加咗兩個側頭笑喊emoji，之後我就放低部手機去沖涼。
沖完我就煮咗碗飯，再係雪櫃攞阿媽整定俾我嘅餸一齊食。
食完飯就落街打波。
但我唔係打籃波，唔係打足波羽毛波個啲嘢。
我係打保齡球。碌ling。
保齡球可以自己一個打，又可以同朋友一齊打，互相切磋下。冇朋友嘅朋友，就可以自私打。
「唔該，打兩個鐘，1條lane，要多對鞋，40號。」
「13號lane。」
「唔該。」講完我就攞咗對鞋去13號lane準備打碌ling，先換上對碌ling專用鞋，然後再輸入啲基本資料。
球道嘅盡頭隨即就見到十個球樽隨隨降下，然後我就攞咗個15磅嘅波擲我嘅第一球。
「碰」球樽應聲倒下。
場上仍然趷立不倒嘅樽仲有4，7號。
「可惜，差兩隻。」雖然我把口咁講，但係我日日掛住係屋企做廢青，咁耐冇打我個人都幾滿意。
呢兩個樽唔難打嘅，如果𣈴得準嘅話。
等到個15磅波返嚟之後，我即刻拎起，做返同剛先一樣嘅動作。
係個波就嚟到達目的地之前，竟然係4號樽前碌過，落坑。
一直咁樣打咗幾局，冇講話全中，連一次補中都冇出現過，睇嚟要勤加練習先得。
而且打咗個幾鐘，隻右手開始攰，推球都冇乜力，握球都差咁啲，所以表現越嚟越差，落坑嘅次數越嚟越多。
呢個時候，我隔離條lane，14號lane嚟咗位新客人。
我好奇望一望，但佢係我右前方，所以剩係望到佢嘅背影。
著住一條短褲仔，完全突顯出佢纖廋嘅美腿，白雪雪，吹彈可破嘅肌膚，冇多餘嘅肥肉。再望上啲，纖腰、白白嘅雙手，幼細嘅雙臂，令人彷彿會質疑佢係咪可以拎得起保齡球。
但，這些機會......唉，算啦，都唔關我事，繼續打。
「噠！咚𠾐𠾐𠾐......」向前擺嘅時候，個波由我隻手滑咗出去，冼溝。
拇指關節位傳嚟陣陣刺痛，睇一睇，原來損咗，睇嚟真係攰喇。
「嘻嘻」右手邊傳嚟咗笑聲，彷彿係係度嘲笑我一樣。真係好瘀。
我望過去睇吓究竟係邊個笑鳩我。
原來係頭先條女。
再望多陣，嘩。
竟然係一個禮拜前嘅個個幫我俾會員卡攞折扣嘅個個靚女。
佢烏低身攞波，愕高個頭望上嚟個時，我再次見到個張清秀嘅臉孔，水汪汪嘅大眼睛。
個一刻，我哋雙眼對上咗。
佢望咗我一眼之後就冇再理我，但仍然甜甜咁笑著，感覺佢嘅笑容能夠溶化世界萬物。
佢攞住個保齡球向住球道行過去，到犯規線之前就起勢掉咗個波出去，成個動作一啲都唔似打保齡球，好明顯係新手。
但結果竟然係全倒？！
「做咩呀，變態佬，又望住人，打波啦。」佢拎住頭望過嚟見到我仲望住佢就話。
咁我至醒起身我真係一個變態佬，第二次眼甘甘望住人。
我攞返起個15磅嘅保齡球，掉出去。
但可能宜家我成個腦都係個女仔，隻右手又攰，結果只係換嚟再一次嘅冼溝。
「識唔識打架，有姿勢無實際。」佢見到我打到咁就響到串我。
「睇住啦。」
講完佢就再一次掉保齡球，個波向住1，3號樽前進。
「碰！」球樽應聲而倒，但今次並沒有全倒，只係打中6個樽。
「睇到未呀～」
「嘩，多謝晒喎，中咗6個樽咁多。」
「好過你吖～冼溝！」
我呢個打咗咁耐保齡球嘅人竟然被個新手串，真係唔掂。
我冇可能咁失威，我一於轉用左手掉波，雖然力度冇右手咁好，亦冇特登練過，但應該都好過用隻又攰又傷咗嘅右手去掉。
今次我轉用一個輕啲嘅保齡球，13磅，因為左手始終都冇右手咁大力。
打出一個曲球，向住1，2號樽前進。
「碰！」
響聲過後，只有7號樽趷立不倒在場。
等到個波返到嚟之後，我攞起個波都擲多一次，擲嘅唔再係曲球，而係直球，徑直向住7號樽前進。
「Spare!」補中！
「See?」出現咗補中之後，我即刻望住個女仔，睇吓佢有咩反應。
「係有返兩下散手個喎。」
「你左撇架？」
「唔係呀，右撇架。」
「咁你又用左手掉？」
「我隻右手掉咗1個鐘，已經攰喇。」
「咁你都幾勁架喎，左右手掉都得。」
「係架！」
「你都勁吖，新手嚟講。」
做人唔好咁串好啲，人哋差都要話勁，況且......
人哋仲要係個靚女。
「你又知？」
「睇你啲姿勢都知啦。」
「我玩得個幾月咋，個陣時覺得打保齡球好型，咁咪想打下玩下囉。」
「使唔使我教下呀？」
「嗯...好呀。」
然之後我就一直執佢嘅動作，淨係呢啲都教咗成半個鐘，教到我條lane過咗鐘。
「嘩，好難呀。」
「打多啲其實ok架喇。」
「我條lane差唔多夠鐘喇。」
「你個條lane呢？」
「過咗啦。」
「唔好意思呀～要你教我搞到你冇得打～」
「唔緊要啦，反正我都打咗好耐都有少少攰。」
「咁...拜拜喇～有機會再見～」
—————————————————
諗呢個係我人生中第一次同個陌生女仔接觸咁耐，好彩冇口窒窒啫。
個女仔唔單止靚，身形完美，性格仲好nice好爽朗，同佢相處好高興好舒服。返到去要同班朋友晒下命先得。
「變態佬！」
行行吓突然聽到有人大嗌，好奇心驅使下我拎轉頭望下究竟邊個係變態佬。
唔拎由止可，一拎就發現係頭先個女仔叫我，搞到我俾成條街啲人望住，當正我真係變態佬。
「又唔等埋人！」
「做咩咁叫我呀？」
「咁你真係變態吖嘛，成日都眼甘甘望住靚女。」
「咁...都係你靚先望啫。」
「咁緊係啦～」
「係喇，你食咗飯未？」
「未呀，做咩呀？」
「當係多謝你教我...一齊食啦～」
「咁客氣呀，多謝晒喎。」
「不過我唔熟呢度有咩食，你帶路吖。」
「無問題，跟我嚟。」
講完我就帶咗佢去一間茶餐廳度食。
入咗去卡座坐低咗之後我就攞咗個餐牌俾佢睇。
「唔該......」
「有冇咩推薦呀？」
「滑蛋牛肉飯吖，我覺得幾正。」
「咁兩個啦，我飲熱朱古力。」
我哋嗌咗嘢之後就攞侍應攞咗杯熱水再浸咗兩隻羹落去。
「嘩，幫我浸埋咁好嘅。」
「舉手之勞啫。」
啲飲同嘢飲到咗之後，我哋就一路食一路傾計。
過程中知道咗佢叫Catrina，而佢都知道我唔係叫變態佬而係叫雲建賢，而我哋都係同齡，都係16歲。
然後原來佢係新搬過嚟，因為佢之前住嘅地方俾個業主收返間屋，所以就住咗嚟呢度，而學校都轉埋。
而咁啱佢住嘅地方同我一樣屋苑，但我住第二座，佢就第五座。
食完個飯我哋就踏上歸家嘅路途。
「你真係冇介紹錯，係真係幾好味。」
「話晒我都食咗咁多年，信我冇死啦。」
「知你勁喇！」
行到去分岔路個時，我鼓起勇氣叫住咗佢。
「Catrina!」
「嗯？」估唔到佢連回眸一望都咁迷人。
「你...我...」
「吞吞吐吐做咩呀，快啲講啦。」
「你可唔可以俾你電話號碼我呀？」我一輪嘴講咗出嚟。
「嘻。」佢聽到之後笑咗出嚟。
「電話號碼咋嘛。」
佢講完就行過嚟，趷高腳，係我耳邊講嘢。
個刻我好緊張，心跳得好快，面紅耳赤。
佢嘅鼻息亦搞到我耳仔好痕。
「999呀。」
下？
「第二次見就問人攞電話，真係大膽呀你。」
「下次再見先啦。」
講完佢就捉起我隻手握咗個手。
「用握手補償番俾你啦，開心返啦。」講完佢就掉頭走去。
但行咗冇耐佢就停低咗。
「下個禮拜六3:00見啦，碌ling呀。」講完佢就繼續行。
先係緊張，然後失落，再上返高峰。短短幾分鐘，情緒就彷如過山車般上上落落。
我懷住興奮嘅心情就返咗屋企。
返到去，我即刻係手機日曆度記低下星期嘅約會。
約會？嘩，第一次約會，仲要係俾女仔主動約。
同時我亦同我班朋友晒命，講返我遇到個靚女，仲約埋會再見面。
沖完涼，我依然情緒高漲，心跳急速，可能係沖咗熱水涼，或者係關Catrina事。
但轉眼間，醒起我嘅假期得返幾粒鐘，心情就跌返落去，聽日就要返學。
真係慘，兩個月嘅假期轉眼間就完咗，眨吓眼就完咗。
最後確認咗書包執好咗，確定係5C冇睇錯，校服ok，對皮鞋冇問題，同埋學校位置，我就上床瞓。
瞓之前仲睇咗吓手機。
「圖定老母？」「我入到嚟.jpg」「你識到條女？我同你講吖，我結咗婚喇～」「講結婚過咗火。」
好明顯班朋友係唔信我講，覺得我係講大話。
冇法啦，唯有下個禮拜諗法子影張相俾佢哋睇。
隨即我就進入咗夢鄉。