我是一個學界的灰姑娘: 176. 我地去澳洲啦

我地結婚後一個月，我地一齊係醫院離職。我地同小敏姐夫婦同校長一齊返澳洲
 
我同浩揚先過去，然後到媽咪同偉叔
 
我地拎住行李，係候機室到等
 
「家琪，妳真係唔後悔?」校長係我身邊坐低
 
「婆婆?我一D都唔後悔，就算過到澳洲要考過哂D試我都冇問題」
 




「傻女」校長摸一摸我個頭
 
夠鐘上飛機，我地6個人一齊登機，估唔到，我地坐嘅係…
 
「頭等?」我係第二次坐頭等機位，咁即係今程嘅機長係…
 
「daddy」我係駕駛艙門外叫左一聲
 
「家琪，好好享受下啦」
 




「但係…頭等…」
 
「我幫妳地upgarde，舒舒服服咁過澳洲啦」
 
「多謝daddy」
 
我地坐係頭等到，我仍然拎出小說黎睇
 
「妳仲係冇變喎，每次搭飛機妳都係睇書」
 




「邊有每次呀…」
 
「第一次同妳去日本啦，之後同妳去台灣又係，去歐洲果次都係，上次同妳搭西伯利亞鐵路又係，妳唔悶架咩?」
 
我微笑對住Ethan「你次次都係帶我去，你唔悶咩?」
 
「唔悶架」
 
飛機起飛，我坐過daddy幾次飛機，每一次佢都係好安全咁起飛同降落
 
不過有一兩次佢真係遇到危險
 
係一次黑雨下，佢要迫降
 
一次8號風球剛掛，果時佢已經進入香港範圍，風切變係香港機場其中一個危險




 
更有一次，佢駕駛航班由美國飛返香港時，係日本上空時機件故障出煙，要緊急迫降日本關西機場
 
每一次奶奶同姑姐一家人都緊張到飛起
 
最嚴重果次我都留埋係屋企陪佢地
 
不過daddy技術又真係好好，而且判決一流
 
有一次有乘客由英國返港途中昏迷，佢唔等機上醫生決定，立即轉飛聖彼德堡，佢唔理公司損失幾多燃油，目的只係為左拯救一個生命
 
所以daddy工作同我本質可以話係差唔多
 
Ethan講過當年林醫生想叫daddy去讀醫科，但係佢最後都係揀做飛機師
 




移民後，我同Ethan應該好少機會去旅行，始終做醫生係比較忙
 
我地諗過不如開間小診所就算，但係咁又令自己技術冇進步
 
所以我地都係決定揀返大醫院
 
經過9小時飛行，我地去到雪梨上空
 
我望出去窗外，係雪梨歌劇院同埋跨海大橋
 
呢到將會係我同Ethan嘅新居同新戰場
 
飛機降落後，daddy送我地落機，陪我地返校長屋企
 
我一入屋…




 
仲大過佢係香港間屋…而且仲平過香港果間
 
我地暫時住係校長屋企
 
「家琪妳地可以係到長住喎」
 
「唔好啦婆婆，妳都唔悶成日擔心我地架嘛」
 
「妳真係好瞭解我」
 
如果我地係校長屋企長住，佢一定會好擔心我地生活，所以我地幾個都決定搬出去住
 
一到埗後一星期左右，我地同小敏姐立即搵屋。而且我地都準備向醫院報到
 




「洗唔洗住返小敏姐妳附近?」
 
「婆婆同公公都係同一區，我地都揀返呢到囉」
 
「唔….我冇咩問題」
 
「呢到好多香港移民住，大家有個照應都好呀」
 
 
結果，我地係Chatswood買左間屋係校長同公公屋企附近，而且果到仲有d華埠超市
 
我同Ethan都好鍾意間屋，坐南向北，Ethan好快買左部車
 
我地一齊為我地新居添置傢俱，仲預留左間房俾將來嘅小朋友
 
我係屋內，將我套校服掛出黎，因為我太鍾意套校服
 
安頓好之後，我同Ethan正式返工。我被安排左去婦產科到實習，而Ethan，佢揀左心臟外科之餘，仲同上司申請去急症室，加考取飛行醫生執照
 
半年後，小敏姐黎到我醫院