我是一個學界的灰姑娘: 160. 我的畢業致謝詞

「家琪妳有冇邊個要多謝架?」MC俾枝咪我
 
「我…第一個一定要多謝媽咪，冇佢咁辛苦照顧我，我冇可能有今日咁多獎狀。佢永遠以我呢個獨生女為先，唔理自己健康，仲母兼父職養大我。我地住北角果時，佢為左養大我呢個麻煩女，寧願自己辛苦，放工後去執野賣，都唔俾我幫佢手。佢想我乖乖地留係屋企好好讀書，但係我偏偏就係要幫手」
 
果時我眼中已經有眼淚
 
「我地果時生活真係好辛苦。其他同學放假去飲茶、去迪士尼玩、去海洋公園，每一個節日、新年、聖誕，其他同學都玩得好開心。而我就陪媽媽係橫街小巷執野去賣，就係為左賺多幾蚊去生活」
 
「以前我曾經冇飯食，只可以食麵包皮充饑，係麵包皮。媽咪果陣賺唔夠錢，但係佢依然去諗方法煮一餐飯俾我帶返學校食，就係為左我唔好唔開心」
 




「相比起我自己，我媽咪犧牲更多，所以我好多謝我媽咪咁多年黎對我嘅照顧」
 
「之後要多謝我係天堂嘅爸爸，係佢病重果時，佢仲帶我去公園玩，仍然賺錢養大我，我知道…佢今日有黎到…佢係臨離開，仲要我唔好唔開心，將來要好好照顧媽媽，好好讀書，入間好好嘅中學同大學，嫁俾個錫我嘅男仔」的確，媽咪同偉叔身邊有一位預留左俾爸爸嘅位，上邊放左爸爸經常戴嘅帽
 
「我仲要多謝我繼父偉叔，冇你照顧我同媽咪，我地都唔會有今日。我第一日係學校註冊後，你就車我地返屋企，仲幫我地屋企好快咁改裝，目的係俾我呢個學生有個舒服少少嘅環境生活。到我地搬左黎宿舍，你一直好好照顧我地兩母女。多謝你照顧我媽咪下半生，俾佢有個依靠」
 
「妳仲想多謝邊位老師呢?」
 
「仲有Miss Cheung同Miss Lam。佢地一個係校長獨生女、一個係校長契仔新抱，但係佢地完全冇架子，除左我之外，對每一個同學都一視同仁，非常用心咁教導我地每一個。佢地仲送左套好靚嘅衫同鞋俾我去媽咪同偉叔婚禮。Miss Cheung仲送左個Celine袋俾我，我會好好珍惜佢架」
 




「仲有呢?」
 
「下….仲有多謝我一班同學，同埋其他三位護法….特別係虎鯊小敏姐…妳由我F.1果時已經開始照顧我呢個小妹妹，直到妳畢業後，仍然咁掛住我嘅情況，好多謝妳」我面紅紅咁望住台下
 
「校長批准妳做一d事，妳洗唔洗係到多謝埋佢呢?」
 
我吸一啖氣
 
「我要多謝…一個人，佢係我6年級果時，扶我媽媽去林醫生診所，仲幫我抹眼淚。我係F.4開始時重遇佢，我地…呢幾年一齊支持大家，因為我同佢有相同嘅目標。佢唔嫌我蠢、成個細路女性格，有時仲會發脾氣。但係佢依然咁照顧我，多謝你」
 




「佢叫咩名呀?」
 
「呀…」
 
「我地學校有個童話，佢爸爸當年畢業典禮上向佢媽媽求婚。自此之後，有拖拍嘅優異生同學，都會係畢業呢一個環節多謝對方。歷年黎，只有兩位大師姐咁樣多謝人地，今日兩位都在場，兩位大師姐當時嘅男朋友，今日都做左佢地先生，妳…應該會做第三位喎」
 
「唔好啦…今日好多人係到」
 
「唔怕啦，妳拎到優異成績，唔係靠佢媽咪同姑姐，而係靠自己實力架嘛」
 
台下同級同學都一齊起哄
 
「喂!!Natalie!!!俾個名份佢啦」
 
「唔好怕羞啦!!!全校都知架啦!!!」




 
大家不斷起哄…所以我就..
 
「我要多謝嘅，係我男朋友…」
 
一講男朋友三個字，所有同學都尖叫
 
「佢三年黎陪我溫書，教我唔識嘅野。仲搵佢學校排球隊黎幫我地練波。佢係我地排球隊前隊長嘅細佬，生物科主任Miss Lam嘅二仔， 訓導主任Miss Cheung個侄仔…我地校長個孫仔。英皇書院嘅Ethan，程浩揚」
 
然後住場大叫，包括大白鯊同小鯊魚
 
「我可以係到保證，Miss Lam同Miss Cheung完全冇放水俾我。因為Miss Lam個大女，程詩敏姐姐，係屋企搵足6年，都搵唔到Miss Lam出嘅卷」
 
「Ethan，多謝你咁照顧我呢個咁任性嘅女仔。即使你今日冇好似你爸爸當年咁樣。但係我識到你，係我人生中最大福氣，多謝你」
 




我嘅畢業典禮，冇求婚環節出現，但係永久擁有獎杯對我黎講，更加有意義