我是一個學界的灰姑娘: 159. 校長為我發言

「各位家長、同學，我地今個學年嘅F.6優異生，佢破左歷年紀錄。二十多年前，我地生物科科主任，林雪凝老師同佢妹妹，林雪晴女士，仲有我個野蠻女，訓導主任張詩敏老師係會考高考年代，連續7年成為優異生。到左今日，我地學校都出左一位F.1-6都成為優異生嘅同學，雖然佢同兩位大師姐嘅成績不分上下，但係…佢做到一樣野。佢係我地學校排球隊最需要時，挺身而出，佢為我地學校，連續6年奪取左學界女排總冠軍。係學校排球隊青黃不接時期，佢唔單止努力讀書，仲放左好多時間去排球隊上。大家俾D掌聲，我地駐校工友美姐嘅獨生女、偉叔嘅繼女，余家琪同學，Natalie!!!!」
 
估唔到校長會咁樣介紹我出場，果一刻我真係好怕羞，所以孖女走黎拉我出場
 
「行啦表嫂!!!Ethan表哥一家都有黎睇妳架」x2
 
佢地兩個仲要係咪附近講，搞到d同學更加興奮
 
因為在場有好多Ethan嘅 fans
 




我係校長手上接過優異生獎狀，果時我真係有眼淚流出
 
「各位，Natalie係一個好孝順佢媽媽嘅學生。佢雙親係新移民，但係佢地兩個自食其力，寧願住天台屋，都唔拎政府一分一毫，直到家琪係香港出世。好不幸，係家琪三年級果時，佢爸爸因病離開左佢地母女，當時佢地由天台屋搬到劏房，生活艱苦。美姐除左清潔，仲會去執紙皮同爛鐵去賣，佢嘅毅力令到我好佩服佢。係家琪小學6年級果時，美姐係街到病倒，家琪唔顧自己前途，為左媽媽而去便利店偷藥，仲俾警察捉到」
 
講到呢到，大家好驚，想知我發生咩事
 
「然後，佢遇止佢人生中影響佢最大嘅一家人。當日佢遇上左Miss Lam嘅爸爸，林紹雄醫生。林醫生唔止幫家琪俾左便利店嘅錢，仲免費幫美姐睇症。之後林醫生托Miss Lam將家琪資料俾左我地學校。我睇過哂之後，就決定收佢讀中學。而我知道佢屋企情況後，亦請埋佢媽咪黎做駐校校工，俾佢地住係宿舍。家琪係一個好善良嘅同學，佢F.1果時俾同學集體欺凌，但係佢仲幫全班同學求情，求我唔好記同學大過。佢嘅善良係值得大家學習。佢嘅格言，我都決定將佢列入校訓之中。以後每一張學生證、每一本手冊，都會印有家琪嘅格言。」
 
校長展示出我地下年新學生證同手冊，除左我地校訓「寸陰是惜」之外，仲加多左一句
 




“A simple act of caring creates an endless ripple that comes back to you。”
 
小小善行激起無限漣漪，那會回到你身上
 
「呢句，就係我地學校最新校訓」
 
大家都企起身鼓掌
 
「另外，我地仲有個獎，要由家琪妳拎」
 




我仲有獎?然後我身後出現左排球隊同埋著住校服嘅小敏姐
 
佢…肥左
 
校長拎起一個大盾牌同大獎杯
 
「因為我地連續6年稱霸學界女排，所以學界體育聯會決定將呢個獎杯，永遠送俾我地學校!!!嘩…好重架」
 
然後我同小敏姐一齊舉起獎杯。真係好似皇家馬德里贏歐聯咁樣，成班女仔高舉獎杯