我是一個學界的灰姑娘: 126. 刺身做早餐

我第一次去搭新幹線，因為今日我地會去大宮嘅鐵路博物館
 
一入到去，有好多鐵路放左係到做展覽
 
仲有蒸汽火車
 
我見到有部模擬火車遊戲，我坐左埋去
 
個遊戲係需要工作人員教我玩
 




但係我又唔識日文，佢英文又有限公司
 
但係我都聽得明佢講咩
 
佢教我慢慢渣蒸汽火車
 
“嗚!!!!嗚!!!!!”氣笛響起，我真係好似以前渣火車嘅司機咁
 
浩翹佢地係後邊睇我渣火車
 




「嘩…女人渣(火)車呀」
 
Ethan兩兄弟係好鍾意鐵路，呢一點同佢地爸爸係一樣，所以佢地都買左唔少紀念品
 
係果一晚，Ethan出奇地又冇要求同我親密，原因係第二朝早嘅節目
 
我地去到豐洲漁市場，品嚐下新鮮購買嘅鮮魚刺身
 
我咁大個女都係第一次朝早食刺身
 




今次又係機長帶路
 
我問一問Ethan「點解機長咁熟路嘅?」
 
「哦！有時爸爸係日本Stay behind嘅話，佢會同埋d同事一齊黎食野，一大班人不停搵野食，所以咁熟路，有d舖頭老細都認得佢添啦」
 
「喂喂，其實呢…你爸爸都係正常男人丫…佢stay behind果陣會唔會呢….呀…你明我講咩啦」
 
Ethan諗一諗「我都唔清楚，不過應該唔會嘅，佢同媽咪好恩愛」
 
「咁你呢?」
 
「我可以對天發誓，會」
 
真係俾佢激死我啦!!!




 
機長帶我地去一間小店到，佢同店長嘰嘰喳喳咁用日文溝通
 
估唔到佢係識日文
 
「估唔到妳大師兄識講日文呢?」Miss Lam係我身邊出現
 
「係..係呀…佢真係好叻」
 
「當年我同佢去大阪，知佢自學日文都嚇一嚇。明明小學果時成績差到暈升左band 5學校，然後反黑組幫佢搞轉校，之後就大爆發考到全級第一同8A，入黎我地英華做女校男生。妳永遠估唔到佢下一步會點做」
 
「Miss Lam呀…我F.1時聽講過，妳先生做事好瘋狂..佢係畢業典禮果時…」
 
「係呀，佢係畢業典禮果時向我求婚，果時我地拍拖大約年半，當年我18歲佢19歲」
 




「佢仲有咩事跡?」
 
「佢呀?哈!多囉，試過反串著長衫返學囉」
 
「佢..做咩咁做呀?」
 
「果陣屋企冇人照顧佢，佢又懶得熨校服，果時嘅訓導主任..即係校長咪成日話佢囉。果時話『你唔熨校服就好似D女同學咁著長衫返學』。點知佢真係走去問D比較又高又大份嘅同學借長衫著返學」
 
「男…男仔著長衫?」我真係諗唔到當時情況係點
 
「校長真係俾佢激到彈起，佢仲要唔打底，係到大聲講非常舒服非常涼。之後Miss Cheung又玩埋一份，著男仔校服返學」
 
「Miss Cheung喎…佢又係玩到好癲架?」
 
「佢地兩兄妹可以聯手打贏籃球隊，有咩佢地兩個係做唔出?」




 
「但係Miss Cheung果時…同機長….」我有d尷尬望住Miss Lam
 
「係呀，佢地拍過兩年拖，當時Miss Cheung個先生係人地身邊等」
 
「但係妳唔介意?」
 
「每個人都會有過去，如果我咩都介意，我仲點嫁俾呢個大細路?」Miss Lam真係好溫柔
 
「咁機長仲有咩反斗事跡呀?」
 
「佢?有次係學校成個未來戰士咁，拎住海綿子彈玩具槍追住我同學不停開槍。最後俾校長罰佢企係操場，掛住塊牌，寫住『我抵死，我以後唔再蝦女同學』」
 
果然我地學校嘅女校男生，冇一個係正常…