我是一個學界的灰姑娘: 35. 第一次去Miss Lam屋企

我夢想係做醫生，所以我揀左理科班
 
第一日….我又遇上呢條海洋生物
 
最慘就係….佢又教我英文…..更慘嘅係…佢會係我呢三年黎嘅班主任
 
大白鯊!!!
 
好彩Miss Lam係教我Bio，我俾呢兩位老師連續教6年
 




「唔?媽咪妳今晚去演唱會?」
 
媽媽專登黎我課室同我講
 
「係呀，不過我會煮定飯俾妳」
 
「唔洗啦，我自己搞掂啦，妳唔好咁夜返呀」
 
「得啦，校長搵我，妳都唔好咁夜返屋企呀」
 




係果日嘅放學後，我準備搭車去買野食
 
「家琪?妳今晚出街?」
 
「Miss Lam?我媽咪今晚去街，冇人煮飯，所以我咪落西營盤食飯算數」
 
「咁不如妳去我到食飯啦」
 
「去…Miss Lam妳屋企?方便?」
 




「唔緊要啦，等埋Miss Cheung就一齊行啦，妳一個女仔食街邊野邊好架」
 
「知道..」咁大個女第一次去老師屋企食飯
 
我地三個去搭車，期間Miss Lam打俾佢二仔叫佢買野
 
去到堅尼地城，我跟住Miss Lam行，佢地住嘅屋苑幾大下
 
搭第一次lift，去到平台，再要行去佢地果座，再搭多次lift先到Miss Lam屋企
 
Miss Lam係住38樓，Miss Cheung住32樓，佢地屋企距離只有五層樓
 
「Natalie，妳唔洗客氣喎，而家得我個細仔同Miss Cheung個女係屋企」
 
「打…打擾哂…」




 
我除左對鞋，換左Miss Lam俾我嘅睡拖入屋，一入去，就見到Miss Lam個細仔同埋Miss Cheung個獨生女係到做功課
 
「媽咪!!」「契媽!!」
 
「你地有冇乖乖地做功課呀?」
 
「唔…數學有d唔識」小妹妹鼓成泡腮
 
「阿哥又唔教我」
 
「妳係要我幫妳做，唔係要我教妳」
 
「你幫下我好難為你咩!?」
 




「唔幫!」
 
「㗅………」
 
大白鯊個女…真係好似佢
 
「慧思呀，呢個姐姐係妳媽咪果班嘅學生，佢可以教妳數學」
 
「真嘅姐姐?」
 
「係呀，我教妳啦」
 
「哼!我有姐姐教我，你返去睇你嘅書啦!」
 
就連脾氣都咁似Miss Cheung




 
我自己都拎左功課出黎做
 
「Charlotte妳好叻女喎」
 
「洗乜講，我似媽咪」
 
「妳會唔會黎我地學校讀中學?」
 
「唔會囉!我好多同學都揀返真光，我都會讀返中學部」
 
卡嚓開門聲，入黎嘅係小敏姐姐
 
「咦?家琪?」
 




「小敏姐」
 
「妳係到幫慧思補習?」
 
「唔係呀…媽咪今晚出街…我冇飯食…所以…」
 
「所以媽咪就叫妳黎食飯呢?」
 
「嗯」
 
「咁妳一陣慢慢欣賞下啦」
 
「欣賞?」
 
「我細佬去緊買乳鴿，一陣妳會見到鯊魚爭食嘅情況」
 
換返屋企衫嘅小敏姐姐拎埋功課出黎一齊溫書
 
然後就到Miss Lam個二仔返到，佢一入門口，就望到我對鞋
 
「家姐妳帶左同學返黎呀?」
 
「係媽咪帶左學生返黎，佢係姑姐果班」
 
「哦…」
 
佢一入屋就拎左d野入廚房俾Miss Lam，之後好快返入房
 
我同佢視線對望左一眼，個心突然間好用力跳左一下，就好似俾針拮左一下咁樣
 
佢好似Miss Lam，但係又有一種講唔出嘅感覺