我是一個學界的灰姑娘: 33. 小敏姐的你問我答(2)

「咁校長呢?妳爸爸係佢契仔喎」
 
「果時Miss Cheung都生左個女嘛，校長每日一探完佢就立即去睇下媽咪。佢地兩個都係隔離間房者」
 
「咁所以妳媽咪就咁錫細佬啦?」
 
「真係當佢心肝寶貝咁睇，唔捨得打佢咁」
 
「咁佢係屋企咪好惡囉」
 




「咁又唔係喎，佢又乖乖地好聽我地兩姊弟話」
 
「好難得喎」
 
「其實佢最聽呢，係Miss Cheung個女話」
 
「校長個孫女?」
 
「係呀，佢地兩個生日相差……8日」
 




「咁妳有冇唔開心呀?媽咪錫哂細佬」
 
「咁又冇喎」
 
「原因呢?」
 
「我爸爸錫到我燶喎，我永遠有爸爸係到保護我」
 
「咁佢算唔算寵妳呢?」
 




小敏姐諗一諗「都唔算嘅」
 
小敏姐咁講之後，Miss Lam拎起枝咪
 
「咩唔算呀!?」
 
大家一齊望住Miss Lam
 
「係Miss Lam，妳先生有幾寵Jasmine呢?」
 
「平時呢…佢三姊弟嘅零用錢都係我俾嘅。不過每次佢爸爸飛完長途呢，返到屋企總係俾d零用錢佢」
 
小敏姐係台上個樣變得好開心
 
「不過媽咪妳都偷偷地塞d零用錢俾細佬喎，妳唔好以為我唔知喎」




 
大家聽到咁樣，就全場拍手
 
「咦?點解妳會知嘅?」MC追問
 
「哦，有時呢，我會見我細佬同Charlotte…即係Miss Cheung個女去玩。通常佢地去親玩呢，沙律總係有小禮物買返屋企」
 
「即係…妳細佬送俾佢嘅?」
 
「九成都係架啦」
 
「估唔到Miss Cheung個女咁吸引喎」
 
「佢紮起對孖辮真係好得意架」
 




「咁妳大果個細佬呢?」
 
「佢?佢唔洗擔心架喎，佢經常係英皇到做生意架喎」
 
「有咩生意咁呢?」
 
「平時如果有救命功課，或者隔離班借書借野，收費唔平。遇上罰抄書或者校規就更加貴。如果長假期之後，一份做好哂嘅功課，係賣到好高價錢。」
 
「嘩!妳細佬好識賺錢喎」
 
「當然啦，最賺得錢呢，係賺爸爸同姑丈姨丈錢」
 
「點賺法呢?」
 
「有時，爸爸會激嬲媽咪，姑丈…即係Miss Cheung個先生會激嬲佢。孖女個爸爸又會激親我阿姨，係果個時間，要我細佬幫手諗計氹返d老婆呢，收費唔平」




 
「點解呢?」
 
「妳估收買台下對孖女平架?佢地收好貴架。Miss Cheung個女收費就平d。妳知啦，判上判呢d野，係麻煩d」
 
「最嚴重果次係咩呢?」
 
「有次，爸爸唔記得結婚紀念日，仲走左去飛日本。果日媽咪知道呢，就嬲到爆咁滯」
 
「Miss Lam發嬲呀?可唔可以示範一次黎睇呀??」
 
「唔…咁樣架：你有冇搞錯呀!!!結婚紀念日你都可以唔記得?你有冇良心架!?我小學9歲開始鍾意你，等你等到我17歲先同你拍拖!!之後24歲果年就嫁左俾你啦，到而家幾多年呀!!!你估留係屋企好舒服架!?係唔係同我出去一晚都咁辛苦你呀?!你好呀!!!我都唔知點解小學果時會開始鍾意你架!!你係澳洲果55星期我就擔心足咁耐!!!你話你丫!!有冇良心丫!!!屋企又唔理!!!個女D功課又係我睇!!兩個仔又係我照顧哂!!!!咁囉」

 
小敏姐真係扮到好似， 同時大白鯊係到不停咁笑