我是一個學界的灰姑娘: 27. 四大護法、大內侍衛

「大表姐呀!!!二表哥呢?佢有冇黎呀?」x2
 
「佢冇呀!!佢係英皇陪同學打波，做咩呀?妳地好想見佢?」
 
「係呀!」x2
 
「妳地企好先，家琪，妳分唔分到佢地兩個?」
 
我好用心咁睇一睇
 




佢地兩個唯一分別，就係對孖辮
 
柏玲係用粉紅色，而柏瑩係用粉藍色
 
「又幾細心喎」x2
 
「好啦，我地去搵婆婆啦，唔好阻住表姐啦」
 
「拜拜表姐，星期六晚見」x2
 




送走左對孖女之後，小敏姐姐鬆一口氣
 
「小敏姐姐妳好攰?」
 
「妳試下俾佢兩個轟炸丫，點會唔攰」
 
「佢地同時鍾意妳細佬?」我好奇咁問
 
「丫~咁都俾妳發現到。係呀，佢兩個都鍾意我細佬」
 




「佢有咩好呀?」
 
「唔知呀，夠正義掛，可能夠毒。睇真d妳都幾啱佢口味」
 
「點…點會…我邊可能…」
 
「唔好咁緊張喎，少女時代，拍下拖好正常」
 
從F.2學年開始，我聯同小敏姐姐，同埋柏玲柏瑩，被稱為校長嘅四大護法
 
我更被稱為大內侍衛，因為我住係學校宿舍
 
星期六，我跟住雪晴姨姨俾我嘅咭片Book左時間，就去佢診所
 
去到時，雪晴姨姨就俾左指示，話我係林醫生轉過黎，唔洗轉介信




 
我依照姨姨吩咐，帶左件幼帶背心去，方便佢治療
 
「嗯…家琪，妳好左d架啦，不過都係要俾我醫下先得」
 
「麻煩哂妳啦Karen姨姨」
 
「唔洗咁客氣，妳應該…冇Jasmine咁怕痛架呵?」
 
「小敏姐姐?」
 
「呀…..講慣左…唔係小敏….我講果個係…」
 
「Miss Cheung?我唔知佢怕唔怕痛呀…」
 




雪晴姨姨陰陰咀咁笑
 
「妳唔好睇Jasmine平時係學校咁惡，其實佢好細路女」
 
「點…點會呢….」
 
「佢又怕痛，又怕打針，又鍾意食零食，又唔飲湯，又懶，餐餐飯都上我家姐到食，估唔到呢」
 
「但係佢應該…..唔…」
 
「佢係老公面前好小鳥依人架，佢14歲果年就同老公拍拖」
 
「1….14歲!?而家Miss Cheung見學生拍拖都想咬死人咁滯喎」
 
「應該係話，佢14歲果年爭輸俾我家姐」




 
「校長嘅左右護法爭男朋友?!」我聽到之後眼都突出黎
 
「係呀，妳想知道多d八掛事，我會再講妳知」
 
我除低件t shirt趴係床到俾姨姨檢查，佢睇完我張x-ray片後摸一摸我條頸
 
「嗯…問題唔太大，唔洗打衝擊波。但係要拔罐同針下，妳怕唔怕?」
 
「嗯?冇問題呀，不過物理治療都會咁架咩?」
 
「而家乜都會試架啦」
 
首先姨姨幫我係背到吸左幾個罐，再係頸同膊頭落針
 




「照妳咁樣，黎幾次就冇問題啦」
 
「唔該哂姨姨」
 
「妳算易處理啦，休息下啦」
 
「知道」
 
搞完拔罐同針灸，姨姨再一次幫我拉頸同推胸椎
 
每一下都係啪啪聲、咯咯聲，然後我就去左用機拉頸，每一下都係咯咯聲
 
但係俾姨姨處理完之後，的確係舒服好多