我是一個學界的灰姑娘: 26. 開始俾人叫做姐姐

「呀….柏玲….柏瑩…妳地唔好轟炸我先…一陣俾婆婆見到又鬧架啦」
 
「知道!!」x2
 
「阿姨、姨丈」
 
「點呀小敏，家姐話妳打排球好叻喎」
 
「唔係，只係d隊員幫到我手者」
 




「屋企兩個細佬有冇唔聽話呀?」
 
「細果個一向都好乖，只不過日日都痴住慧思。大果個就日日打機玩模型，成個毒男咁」
 
「辛苦妳呢個家姐啦」
 
「妳地兩姊妹，入唔入排球隊呀?」
 
「唔入!」x2
 




「點解呀!?」
 
「我地唔鍾意著條短褲周圍走」x2
 
「小敏呀，婆婆話要佢兩個入羽毛球隊，負責雙打」
 
「冇錯!!」x2
 
「咁我熱烈期待妳地啦」
 




「小敏妳呢個Prefect leader今日唔洗幫手嘅?」
 
「我負責叫d細嘅做野者…..Natalie!!!!」
 
小敏姐姐用獅哮功叫我
 
「係…小敏姐姐….」
 
「阿姨，媽咪叫妳去公公到拎果d野呢?」
 
「呀…係…老公!!!!」
 
大師姐係佢先生手上拎左d野
 
「睇睇先下…老公你睇啦都係」




 
佢先生接手黎睇
 
「止痛消炎、感冒、咳水，紅色唔眼瞓，黑色呢枝大昏迷」
 
雪晴姨姨個先生遞D藥俾我
 
「呢D藥妳同媽咪都可以食」
 
唔?佢識我?
 
「係…請問….」
 
小敏姐姐一邊俾兩個表妹煩住，一邊陪我
 




「佢係我做藥劑師嘅姨丈，有時妳地D藥唔係公公俾妳，係姨丈幫妳開」
 
「麻…麻煩哂你啦叔叔…」
 
姨姨聽到之後就行到我面前
 
「小敏，妳唔介紹妳同學俾我識?」
 
「阿姨，佢係婆婆睇中嘅學生，佢媽媽係我地工友，而家佢地住係學校宿舍。佢地係公公嘅病人。而且，家琪當初入學時，有公公嘅推薦信俾婆婆」
 
雪晴姨姨望清楚我「妹妹，妳係咪低頭溫書睇書架?」
 
「唔?冇錯呀」
 
「條頸係咪好攰呢?」




 
「最近比較攰，但係郁下又冇咩事」
 
「過黎俾我摸下條頸丫」
 
「係」
 
我依照雪晴姨姨嘅說話坐係椅上邊，佢用手撳下我條頸，到左某一個位有少少痛
 
「呢個位痛嘛?」
 
「少少」
 
佢再撳落D
 




「呢到呢?」
 
「痛!!!」真係差D淚水都流哂出黎
 
雪晴姨姨拍一拍我膊頭
 
「家琪，妳係由細都低頭睇書?」
 
「嗯…細個屋企窮…冇錢配眼鏡….」
 
「阿姨，佢爸爸好似我爺爺咁，好早走左，不過佢屋企比較…」
 
「得啦小敏，我知架啦，如果唔係嘅話公公又點會咁照顧佢地。家琪妳坐好先」
 
「係…」
 
雪晴姨姨走去我身後，雙手捉住我條頸，向上一拉
 
我條頸同時有一聲好響
 
拍!!!拍!!!拍!!!
 
「妳睇下會唔會舒服D?」
 
我左右郁條頸，的確係鬆左好多
 
「唔…唔該妳呀大師姐」
 
「未得架，我幫妳拉鬆左條頸咋，妳頸椎有少少反弓，暫時唔洗做手術，不過仲要做物理治療」
 
「呀…咁呀…」
 
姨姨遞左張咭片俾我
 
「妳約個時間，唔洗轉介信，妳去呢間診所話搵我就得」
 
「係…知道」
 
「妳係家姐學生，係我爸爸病人，我都會好好照顧妳」
 
「麻煩哂姨姨」
 
「乖女，咁我對孖女就都要麻煩妳同小敏啦」
 
「知道!!」
 
「柏玲!柏瑩!過黎!!」
 
「知道媽咪!!!」x2
 
兩姊妹企係我面前，真係分唔到邊個打邊個
 
「柏玲係家姐，Frederica。柏瑩係妹妹，Elizabeth。呢個姐姐叫余家琪，Natalie，佢係姨媽d學生，妳地唔好蝦佢呀，佢會照顧妳地」
 
「知道!!Natalie姐姐妳好」x2
 
估唔到，我都開始俾人叫姐姐…