我是一個學界的灰姑娘: 22. 再見劏房生活

然後，校長再叫大白鯊拎出幾本英文書俾我
 
「詩敏話過妳好鍾意睇書，所以我跟妳英文程度，買左呢堆書俾妳，妳做返個report俾我，係俾我。妳係今個學年完成佢就得」
 
「知…知道校長」
 
「余太，如果妳有唔舒服可以同我講，我會帶妳去搵我爸爸。如果手腳有痛，我會陪妳搵我妹妹，佢係物理治療師，我妹夫係藥劑師，我地一家人都幫到妳地」
 
「麻煩哂妳啦Miss Lam，如果可以，我真係想將家琪嫁俾妳個仔」
 




「媽…媽咪呀!!!」我面紅紅咁對住其他人
 
Miss Lam笑笑口咁講「我個細仔俾Miss Cheung個女mark左啦。家琪妳想嘅，我介紹個二仔妳識都得」
 
諗到小敏姐姐凶狠程度，佢兩個細佬都應該唔差得去邊
 
雖然…我見過Miss Lam個仔，其實佢地三姊弟都好似Miss Lam
 
所以佢兩個仔，都係男生女相，有d女性溫柔，但未至於去到東方不敗嘅地步
 




「唔…唔洗啦Miss Lam…」
 
「傻女，妳好好照顧媽咪先啦」
 
「知道啦」
 
就係咁樣，媽媽係一個月後，加入左英華女校
 
媽媽正式返工之前，我地兩個去到學校駐校職工宿舍到睇
 




我同媽媽將會住係連接學校主樓嘅一間屋仔，有窗戶，而且仲有海景
 
間房分A同B兩間房，兩房會共用大廳同廚房
 
大廳有電視、餐檯、雪櫃等共用物品
 
而窗外就有位置晾衫，或者可以用焗衫器焗乾D衫
 
至於私人衫褲，就可以晾係自己房嘅洗手間兼浴室
 
房內，有書檯、書架、檯燈同衣櫃
 
至於床，就換左張碌架床。所以依舊我瞓返上格
 
偉叔仲專登幫媽媽係下格整個拉簾，方便我夜晚溫書時佢可以瞓覺




 
可能係緣份關係，偉叔同我一樣，都係姓余
 
所以我地關係就更加親密
 
係媽媽正式返工前，我地要由劏房搬黎學校
 
大家都好唔捨得
 
幫我手搬屋嘅，有Miss Cheung嘅先生
 
大白鯊….真係好鍾意蝦佢先生
 
所有野搬到學校後，就由我一班同學接手
 




佢地講出一樣野，我冇諗過
 
「Natalie妳而家唔洗怕遲到啦」
 
「咁當然!」
 
「但係妳放左學都留係學校到喎，如果妳鍾意…妳可以畢業前都唔踏出校門半步」
 
係喎，咁我同坐監有咩分別呀?
 
「我地洗唔洗定時定候拎D野黎探妳呀?」
 
「妳地以為我坐監咩!?我都可以去街架!!」
 
「但係，妳夜晚點入學校呀?」




 
「咪撳門鐘，或者由停車場入囉」
 
「Natalie，而家冇人夠妳屋企咁大啦」
 
「妳地估我真係會當學校係我屋企咩」
 
自從同媽媽住係學校宿舍之後，媽媽冇之前咁辛勞，身體仲好左
 
以前永遠都係我係佢前面跳跳扎扎，而家….唉…..佢每朝早可以好似以前咁五點半起身
 
以前佢就趕返工，而家呢?佢就起身晨運，係我地個操場拉筋跳繩
 
而我就仍然係床上瞓覺，所以….我而家體重開始重過媽媽
 




不過我天生有少少baby fat
 
每日7點，偉叔會準時開校門，而媽媽就會準備定點名簿之類
 
而家學校都用學生證拍咭點名，但係入到課室仲要老師用傳統方法點一次
 
我嘅早餐由以前係北角麵包舗豬仔包，變成媽媽煮嘅早餐
 
我每朝早，都係最早返到課室果個
 
因為我習慣左幫媽媽手工作，如果唔俾我做，我會好唔慣
 
我放學時間，係3點半
 
所以我想嘅話，3點31分我就可以返到宿舍，但係通常我會同幾個同學一齊留低溫書做功課
 
有時仲會睇下排球隊練習。因為小敏姐姐，係有好多師妹暗戀佢架!!!但係點睇小敏姐姐都唔似TB
 
於是，我鼓起勇氣去問佢