我是一個學界的灰姑娘: 21. 校長親自登門

「校….校校校….校長….」我萬萬都估唔到校長會黎我屋企
 
媽媽一聽到校長黎到，立即坐起身
 
但校長好快就扶媽媽坐好
 
「余太，妳坐好先」
 
「校長，點好意思要妳落黎北角…」
 




「呵呵，我以前黎得多，Miss Lam個先生，係我契仔。佢讀書果陣一個月同人打架俾人拉上北角警署至少兩次，有邊次唔係我黎保釋佢?」
 
「呀…校長…我地屋企冇咩可以招呼到妳…」
 
「唔緊要，我係黎探下余太妳。同埋有D野想問妳意見」
 
「我有野幫到校長?」
 
「嗯。余太妳係做清潔係唔係?」
 




「冇錯，開唔足工嘅話，我會去地盤做雜工幫補下」
 
「我仲知道，妳同家琪會執野去賣」
 
「係呀….如果唔係，我地連屋都冇得住」
 
校長望一望Miss Lam「雪凝」
 
「係!奶奶!余太，我過左身嘅老爺奶奶父母…呀..即係我先生爺爺麻麻，佢地係西區有間屋。如果妳地想嘅話，我先生話可以俾妳地住，我地唔會收妳地租金」
 




Miss Lam開左個好好嘅條件出黎，不過以媽媽性格，一定會反對
 
不出我所料，媽媽立即反對
 
「Miss Lam，我地兩母女點可以突然住左人地長輩間屋呢，咁樣實屬不孝」
 
校長好似早就知道媽媽會反對
 
「余太，妳真係好似家琪小學校長所講，唔想白食白做。雖然妳同先生係新移民，但係永遠用雙手去養大家琪，我好欣賞妳地」
 
「過獎啦校長，我唔想好似d同鄉咁，一黎到就伸手要乜要物」
 
「咁樣啦余太，其實我仲有個建議，或者妳可以考慮下」
 
「係校長」




 
「我地學校有一個職工空缺」
 
「校長…妳想請我去家琪學校到返工?會唔會有d…」
 
「唔洗怕尷尬，當年我個女咪又係黎學校返學搞事。而家雪凝個女咪又係一樣，唔需要尷尬。而且，我仲係要求妳做駐校職工」
 
「校長，駐校唔係有偉叔啦咩?」
 
「呵呵，冇錯家琪，而家駐校有偉叔，不過基於安全關係，我打算增加一名駐校職工。當然，佢地唔洗做保安工作，夜晚所有事會交俾保安負責」
 
「校長….即係….妳要我同媽媽…住係學校入邊?」
 
「冇錯，而且，我唔會收妳地租金」
 




「但係校長…唔收租...」
 
「我地職員已經為學校工作，學校係需要提供宿舍同埋其他生活需要」
 
「但係校長…要妳專登為我地而增加人手….」
 
「余太，家琪會係我地學校其中一個最有前途嘅學生，我眼光唔會錯。當年我一手就將我新抱兩姊妹捉左入學校，事實證明我冇睇錯人。所以為左家琪同余太妳，我會幫到底」
 
媽媽聽到眼淚直流
 
「所有合約，我已經準備好，招募廣告我都登左。妳地唔需要怕要同其他人爭，我地已經搵左舊生幫手，去乎合校董會要求」
 
「咁就…麻煩哂校長妳地啦….」
 
「所以余太妳好好休息下，下個月我準備好哂所有野，就會安排人手幫妳搬屋」




 
「多…多謝妳校長…..」
 
「唔緊要，不過家琪，我有一個條件」
 
「係!!」
 
「妳需要之後每一次考試需要有80分以上，同埋成績唔可以跌出全級頭五名，做唔做到?」
 
「得…..我一定得!!」