我是一個學界的灰姑娘: 20. 係學校宿舍暫住

程機長先車左林醫生返診所，果時診所已經有病人等緊
 
然後再車我返學校拎書包同接埋大白鯊後再返北角
 
「程機長…你可以係呢到泊…」
 
「傻女，我以前係寶馬山讀過兩年書，呢到我熟過妳」
 
「係…」
 




泊好部車後，我地一齊行去我屋企
 
其實要程機長行呢D地方，我有D唔好意思。但係佢竟然有另一面…..
 
經過我賣野間回收舗時，佢帶住我地走左入去，個老闆見佢…竟然

「三隻手!!!」
 
「風哥….咩事要你黎我地到呀?」
 




「我聽講呢，有對母女經常黎賣野架喎」
 
「姓余果對母女嘛，係呀，有咩問題?」
 
「個女係我老婆同個妹嘅學生，你明未?」程機長四周圍望下回收舖
 
個老闆好似有D驚咁望住Miss Lam同Miss Cheung
 
「三隻手你係唔係恰我個學生?洗唔洗我同暗花哥講?」Miss Cheung笑住咁講
 




「明…明哂….阿嫂同詩敏姐嘅學生…風哥同詩敏姐叫到，我明哂，唔好打擾暗花哥啦」
 
「明就好啦，祝你好生意呀」Miss Cheung仍然微笑緊
 
程機長俾左幾千蚊老闆
 
「買D野俾個仔啦，讀書洗費多」
 
「多謝風哥」
 
我地繼續行去我屋企，終於我忍唔住問
 
「程機長….頭先….」
 
「哦，我以前社團果時，兄弟收嘅靚，佢地從左良架啦。不過做生意，都要同舊公司打下交道咁」




 
「但係Miss Cheung…」
 
「果時?我叫佢阿哥架嘛，細個成日跟佢周圍玩，所以咪識到佢以前社團d朋友，佢地成班當我妹妹咁睇。D細嘅咪叫我詩敏姐囉。不過我冇入會架」
 
我係估唔到妳冇入會都咁惡者…
 
「你地仲提你以前D野!?」
 
「講下故仔俾D師妹知者」
 
「咁你唔講未來戰士?仲有係反串著長衫果次呢」
 
「好啦，咪再提呀」
 




我帶住佢地返入屋企
 
「Natalie，過幾日妳媽媽可以出院，到時妳同佢搭的士返屋企休息下」
 
「知道Miss Lam…麻煩哂妳地啦…」
 
「妳得12歲，唔可以自己留係屋企。妳而家執D行李，我帶妳返學校宿舍留宿幾日」
 
「但係Miss Lam….」
 
「妳媽咪留院，校長同我就係妳臨時監護人，所以妳要返學校留宿。我通知左偉叔，佢幫妳準備好間房架啦」
 
「知道….」
 
係我想執d書果時，Miss Lam叫停左我。呢幾日我唔帶書都冇問題，佢會同其他老師交代




 
於是，我又坐住程機長部車返學校
 
去到駐校工友宿舍，偉叔已經為我準備好B房
 
我一打開房門，房內有張床同書檯，仲有衣櫃之類
 
「家琪妳可以放心係到暫住，Miss Lam幫妳準備好哂所有野」
 
「唔該哂偉叔」
 
「如果有事就黎A房叫我，再唔係就過工場」
 
「知道啦」
 




我地學校駐校工友偉叔真係十項全能，由水電到木工，到機械都難佢唔到

佢果日幫我洗完套校服，再晾起
 
「唔?偉叔你唔洗咁幫我啦，我自己洗衫就得」
 
「而家放左學，我就係妳臨時監護人，校長吩咐低我要好好照顧妳幾日」
 
「不過…」
 
「妳放心啦，我有好多野都識做」
 
「偉叔…你唔洗返屋企?」
 
「呵，我無兒無女，太太過左身好多年，宿舍咪我屋企囉」
 
「對唔住…我唔知你…」
 
偉叔笑一笑「傻女，唔洗同我道歉。我自己一個人已經慣左，得閒我去進修下又一日」
 
「偉叔你仲讀緊書?」
 
「呵，我以前會考英文同數學都有C架，我可能叻過哂妳地。我舊年先係大學讀完part time degree」
 
偉叔果然深不可測

第二日係課室，大家都好擔心媽咪
 
「Auntie咩事呀?冇大礙嘛?」
 
「感冒加上太辛勞者，休息幾日就可以出院架啦」
 
「咁Natalie妳而家自己一個係屋企?怕唔怕呀?」
 
「校長安排左我黎學校宿舍住幾日呀，Miss Lam話我唔可以自己一個人係屋企」
 
幾日後，Miss Lam陪我去到醫院接媽媽返屋企
 
當佢離開我屋企後
 
「女呀….妳有機會真係好好報答Miss Lam一家，佢咁照顧妳」
 
「知啦…我會，媽媽妳休息下啦」
 
「得啦….我過兩日就返工」
 
「醫生要妳休息下呀」
 
「總之媽媽冇咁易輸嘅，妳放心啦」
 
有時我真係講唔過媽媽
 
然後，到左五點左右，有人撳我地房門鐘
 
包租婆?我地剛先交左租喎
 
「係!」
 
我一打開門，就感覺到好重嘅氣
 
係校長….Miss Cheung同Miss Lam….
 
光明左右使連同星戰黑帝黎我屋企做咩?
 
May the force will be with me now