我是一個學界的灰姑娘: 11. 我係F.1E班學生

Miss Cheung雙手撓住咁行過黎我到，其他師姐都嚇到散開
 
「妳上次註冊之後冇咩點食野呀?」Miss Cheung係我身上四圍望
 
的確…我係開始減肥
 
「係….係呀Miss Cheung，我之前肥左少少….所以…」
 
我咁樣講，Miss Cheung就開始對我訓話
 




「妳邊忽肥?妳呢套校服係小敏嘅舊校服，妳而家仲有鬆，咁都叫肥?」
 
「係….」
 
「我媽咪對妳好有期望，所以妳要好好地對自己」
 
「係…知道….」
 
「返上課室!唔好再俾我知道妳係到減肥!!」
 




「係….」
 
估唔到就連減緊肥都俾Miss Cheung一眼睇出
 
行到去壁報到睇自己班別，我唔洗好似其他人咁左搵右搵
 
我姓余，Y字頭，一定係最尾。不出我所料，我係最尾果個
 
F.1E….慢慢行去自己課室，當時已經有同學坐左係到
 




於是我去返我最鍾意坐嘅位，老師檯前果個位
 
我個屁股剛掂到張椅，椅都未坐暖又聽到D師姐好緊張咁走過
 
「紅旗!紅旗!!有鯊魚!!!」
 
過一分鐘，又見到Miss Cheung游過
 
係我腦中，傳出左大白鯊嘅音樂
 
「燈燈….燈燈….燈燈….燈燈….燈燈燈燈……」
 
其他師姐一聽到大白鯊就雞走狗走，有d師姐仲手上拎住噴嘅染髮劑走入黎避難
 
可惜….佢地因為個頭太黑，俾Miss Cheung一眼睇出，捉左去洗頭




 
當Miss Cheung游走之後，大家就係課室乖乖地等班主任黎
 
班主任一入黎果時，令我眼前一亮
 
「大家好，我係妳地今年班主任，林雪凝，Miss Jessie Lam歡迎大家加入我地英華女校，我相信黎得呢到讀嘅學生，都可以話係最top嘅女仔。希望大家可以儘快適應中學生活，如果有咩困難，歡迎大家隨時搵我。請問大家有冇問題?」
 
可能大家都係唔同小學升上黎，所以大家都有d怕羞
 
然後，有同學舉手
 
「Miss Lam，我想問…每朝係咪都有訓導老師係校門等我地架…」
 
Miss Lam聽到後笑一笑
 




「當然啦，大家都應該見過我地個訓導主任張詩敏老師，Miss Jasmine Cheung。大家要記住，唔好得罪Miss Cheung，佢同我一樣，都係英華舊生，而且….佢仲係我地校長嘅獨生女」
 
「下!!!!校長個女!?」
 
「我同大家講啦，係我仍然係學生果時，校長係訓導主任，當年我地仲要扎孖辮返學。Miss Cheung第一日返學就差d因為條辮而俾校長記過。所以我話俾大家知，校長係極為睇重校風同大家嘅校服，就算係佢個女佢都唔會放過。」
 
「知道!!」
 
Miss Lam之後就帶我地去禮堂準備開學禮
 
不過未去到禮堂，我地成班已經見到Miss Cheung撓實雙手，係佢果班嘅課室到行黎行去。佢負責嘅F.3D非常安靜，睇黎大家都怕左佢呢條大白鯊
 
我抬頭一望3D嘅課室牌
 
見到係3D隔離，仲有張鯊魚旗嘅貼紙貼左係到，話俾大家知係訓導主任負責嘅班別




 
各班同學魚貫咁行去禮堂，準備開學禮
 
同唱校歌同埋祈禱
 
然後就到校長發言，都不外乎要努力學習之類
 
開學禮完畢，大家返到課室拎通告之類，第一日就咁過左