我是一個學界的灰姑娘: 10. 恐怖嘅大白鯊

「余太妳地呢d野有d用，我幫妳地整整佢」
 
偉叔係車到拎工具箱出黎，利用我地搵返黎嘅舊電器入邊d零件，慢慢整好把風扇同埋盞燈
 
佢將盞燈夾係我床邊個櫃仔，而風扇佢就拉一拉條線，駁去個usb電制到
 
「好，妳而家可以係床上用呢盞白光燈黎睇書，妳舊果盞唔太光，可以賣左去。我再幫妳整左把風扇，妳訓果時有得涼，而且個風扇唔係用好多電」
 
偉叔第一日見我，就已經幫左我咁多
 




「唔…呢塊木板有冇用?」
 
「冇架…我都諗緊佢有咩用」
 
偉叔叔敲一敲「唔…都好實淨，又冇刺」
 
佢又再次幫我整一整d野
 
然後偉叔好快咁幫我整左張床檯俾我
 




「咁樣妳就可以係床上有檯用黎睇書」
 
「真係唔該哂你呀偉叔」
 
「唔…果個雪櫃仔唔用得?」
 
「果個係我地拎返黎，已經冇用」
 
偉叔再幫我地拆左舊銅出黎俾我地拎去賣
 




佢好似幫我屋企大改動咁，經過一陣，我地屋企有好多賣唔出嘅野，偉叔幫我地清左或者改到成為有用嘅野
 
我地屋企又有多d位放其他野
 
「 好，咁樣妳地會舒服好多」
 
「唔該哂你呀偉叔」
 
「同學，校長非常睇重妳，妳要俾心機讀書。將來有咩事，都可以黎搵我」
 
「知道!!」
 
偉叔返左學校之後，我著上套校服，雖然係二手校服，但係仲好新淨，好啱我著
 
我而家唯一一樣野，就係想快D開學




 
暑假完之前，我自己去無印到買左D文具，因為夠平，又可以換芯，仲搵個好普通嘅淨色書包去準備開學
 
至於我果個俾英華趕出校嘅同學嘛…
 
唔…聽小學老師講返，佢地投訴到教育局到，但係孔校長自己一個人去同人對抗
 
所以佢係俾教育局派左去東區某D學校到，當然同佢心儀學校有一段距離
 
9月1 日，鬧鐘一響起，我就拍熄佢
 
媽媽幫我梳好頭髮，再扎好對孖辮
 
著起中學校服，踏出家門
 




媽媽當日係遲左少少返工
 
「家琪，大個女啦，要乖乖地知嘛」
 
「知啦媽媽」
 
好少可我同媽媽會係茶餐廳到食早餐
 
媽媽送左我上小巴後，就到我自己一個返學
 
一樣去到總站，落車後我慢慢行返學校
 
沿途開始有我私家車送同校同學返學，亦有同學搭巴士返學
 
究竟鯊魚係咩一回事呢?我真係冇頭緒




 
去到校門，我重遇訓導主任Miss Cheung
 
當時佢嘅煞氣好強勁，係佢後面已經不下10位師姐俾佢罰企係到
 
我慢慢跟住人群行，大家都好靜好靜
 
突然有個師姐叫一叫我
 
「同學，妳中一新生呀?」
 
「係呀」
 
「妳唔好行咁快，我地通常一大群人一齊返學」
 




「點解嘅?」
 
「學校門口有大白鯊」
 
「大白鯊?」我的確好好奇
 
「細聲少少呀…大白鯊即係….佢…」個師姐指一指訓導主任
 
「佢係我地學校訓導主任，張詩敏，佢係校長嘅獨生女，仲係我地大師姐。佢咁耐以黎，未試過放棄任何獵物，所以妳要乖乖地，跟大隊一齊入去」
 
「知…知道」
 
雖然我係註冊果日已經見識過Miss Cheung嘅煞氣，但估唔到佢係咁心狠手辣….如果俾佢咬中，我可能會流血不止
 
正當我跟住d師姐入校門果時，Miss Cheung嘅雷達好似探測到我存在
 
「余家琪!!!!!!」佢背住我叫我個名
 
「係!!!!」我真係俾佢嚇到企定定