我是一個學界的灰姑娘: 6. 成功獲派第一志願

自從我戴左眼鏡後，上堂睇野清楚好多，成績更上一層樓
 
我將考第二果個同學拋棄超過10分以上
 
到左準備揀中學嘅日子，我同媽咪係到商量
 
「妳唔係一直想讀間好D嘅女校咩?近屋企嘅咪嘉諾撒，係鰂魚涌，好近」
 
我再係到睇其他學校資料
 




灣仔區….大坑真光…聖保祿
 
我再睇再睇，去到中西區
 
見到呢兩間女校
 
聖士提反女子中學
 
英華女學校
 




我腦中諗返起大姐姐
 
我覺得佢係我人生中會佔有好重要嘅地位
 
所以，我係揀學校表上填左第一志願; 英華女學校
 
媽咪係我身邊睇我揀左學校之後
 
「家琪，妳鍾意讀呢間?」
 




「嗯，媽咪妳唔覺得長衫好襯我咩?」
 
「咁妳個身型又幾襯嘅」
 
係我第二日返到學校，我就交表俾班主任
 
佢都覺得我揀學校揀得唔錯
 
小六嘅呈分試，我用盡九牛二虎之力去應試
 
我唔似其他有家底嘅同學，可以請補習先生
 
我只可以靠自己一步一步咁行落去
 
過程真係好辛苦




 
No pain no gain
 
終於我辛苦左咁多年，係升中派位果一日終於有回報
 
余家琪 ; 英華女學校  Yu Ka Kei ; Ying Wah Girls’ School
 
見到自己派到入第一志願，我立即攬住媽媽，開心到喊出黎
 
因為我辛苦咁耐，終於有回報啦
 
係我中一新生註冊當日，媽媽專登請假同我一齊去
 
我同媽媽一齊搭車
 




半山區…..呢到將會係我返學地方….我將來要係到買屋俾媽媽住
 
落車之後，我地仲要行10分鐘左右，先去到英華女校
 
我抬頭一望
 
真係好大好靚，入得去註冊嘅學生，都係有錢人
 
媽媽應該知我心入邊諗乜野
 
「行啦家琪，妳係用妳能力考到呢間學校架嘛」
 
「嗯」
 
媽媽拖住我行入去禮堂準備註冊




 
係禮堂內，有一個女士，應該係校工係到清潔
 
不過佢又唔識用吸塵機，同埋清潔手勢好生手
 
於是我行埋佢身邊
 
「吸塵機係咁用架」
 
我係佢面前示範點用吸塵機
 
「仲有，用百潔巾用陰力就可以起左地上D污積」
 
我好耐心咁教果位校工做野，佢亦都係到上下打量我
 




「妹妹妳又會識嘅?」
 
「係我媽媽教我，佢係office幫人清潔」
 
果位校工恍然大悟
 
「即係妳家底冇咁好?」
 
「可以咁講，不過我係用實力考入黎」
 
「妳今日黎中一新生註冊?」
 
「係呀，我媽媽專登請假陪我黎」
 
「嗯….妳一定好錫妳媽媽」
 
「係呀，我爸爸好早過左身，咁多年黎都係媽媽一個照顧我，所以我想做個醫生，然後買間屋俾媽咪住」
 
「唔，妳係一個孝順女。妳快d去註冊啦」
 
「知道」
 
正當我想行開果時，果位校工再問我
 
「妹妹，妳叫咩名呀?」
 
「我叫余家琪，Natalie，我係北角官立小學升上黎」
 
我跟住媽媽一齊排隊
 
「傻女，頭先果個唔係校工」
 
「唔?媽媽妳點知呀?」
 
「我睇佢對手就知，佢應該係副校長或者訓導主任果款」
 
「咁我好彩，我冇係佢面前犯事」
 
到我註冊
 
「麻煩身份證、註冊證、家長身份證…」
 
我地經常一大輪手續後，成功註冊
 
不過，總係有事會發生……