我是一個學界的灰姑娘: 5. 善良的眼鏡舖老闆

姐姐三姊弟送我地去搭地鐵果時，有兩個生得好靚嘅姨姨同時係地鐵站出黎。其中一個姨姨拖住個小妹妹，佢一見到姐姐最細果個細佬就衝過去拖住人地
 
「媽咪、姑姐」
 
「小敏，妳d朋友?」生得比較高果個姨姨就係姐姐嘅媽咪
 
「佢地係公公d病人，我地送佢地黎搭地鐵」
 
「乖女啦」
 




「呀….姐姐，我未知妳叫咩名….」
 
「我叫程詩敏，Jasmine。我知妳叫余家琪」
 
「係…」
 
「有緣嘅話，我地出年再見啦」佢指一指自己校章
 
就係咁，我同媽媽一齊搭地鐵返屋企
 




我扶左媽媽上樓，幫佢瞓係床上後就煲粥佢食，然後打開個袋拎藥出黎準備俾媽媽食
 
當我一打開個藥袋果時，我見到入邊有五千蚊係到
 
仲有醫生嘅字條，上邊寫住
 
“A simple act of caring creates an endless ripple that comes back to you。”
 
小小善行激起無限漣漪，那會回到你身上
 




呢個醫生，唔收媽媽診金之餘，仲幫我地渡過難關
 
我d眼淚忍唔住，不停咁流出黎。我估唔到而家呢個世界上，仍然會有d咁好嘅人，會去幫一對素未謀面嘅母女
 
媽媽食藥後，媽媽問我發生咩事
 
我坦白咁講哂所有事俾媽媽知道
 
佢聽完之後
 
「妳一定要做到林醫生要妳做嘅事」
 
「知道媽媽….呢五千蚊我聽日去還返俾醫生…」
 
「妳將來，賺到錢再還返俾醫生」




 
「將來呀…」
 
「果個姐姐，佢係醫生個孫女，妳可以去佢學校到讀，再慢慢還錢俾姐姐囉」
 
「不過媽媽…英華女校…..我唔知…」
 
「家琪，妳要對自己有信心先得知唔知?」
 
「知道啦媽媽…..」
 
「妳將妳儲到嘅錢，去配副眼鏡啦，媽媽知道妳有近視」
 
「但係D錢我地屋企用架嘛」
 




「總之，屋企嘅事妳唔好擔心。媽媽知道妳乖女，所以妳乖乖地配副眼鏡，讀書清楚D知唔知?」
 
我拎起d藥黎睇
 
「林紹雄醫生」
 
我望住張字條，將佢拎左返學校拜託老師幫我過膠
 
我聽媽媽講，去間老舖到配眼鏡
 
舖頭老闆好好人，佢好清楚我屋企情況
 
我驗完眼之後一星期，佢拎左兩副眼鏡出黎送俾我
 
「老闆?我配左一副咋喎，而且呢兩個鏡框…….」




 
「家琪，妳黎試眼鏡果日，我就知妳想要呢副眼鏡。但我都知道妳覺得太貴，所以揀左副唔易爛嘅鏡框」
 
老闆幫我戴起副眼鏡
 
「呢副襯妳多D，咁先似返個斯文嘅女仔」
 
我係鏡中望見自己四眼妹果個造型，相對我之前揀果副眼鏡，真係斯文得多
 
「咁老闆…呢一副…」
 
「呢一副嘛….係一副運動用嘅眼鏡，係妳之前揀果一款，但係我搵左D靚D嘅框俾妳，咁妳上運動堂同埋幫媽媽手果時，冇咁易跌眼鏡」
 
突然間由一副變兩副，我仲擔心緊夠唔夠錢俾
 




「兩副眼鏡我都送左俾妳」
 
「送俾我?唔得架老闆!!!!點可以架」
 
當我係銀包拎錢出黎果時，老闆伸手阻止左我
 
「家琪，如果妳想報答我嘅話，就一定要考到間好好嘅中學，努力讀書，好好照顧媽媽」
 
聽到老闆咁樣講，我嘅淚線又忍唔住啦，其實我真係好易喊
 
「知…知道啦老闆」
 
原來我身邊有咁多人對我咁好，可能我住係劏房，並唔係一件壞事
 
其實唔止眼鏡舖老闆
 
我地隔離房D鄰居都係好好人，過時過節會分D野俾大家食
 
樓下小食檔老闆會將賣剩嘅煎釀三寶、仲有其他野分俾我同媽咪，等我地唔洗剩係食麵包
 
老實講，我試過係街到見到煎釀三寶嘅檔口就想掉頭走
 
大家明唔明經常食同一樣野嘅會有幾恐怖
 
但係小食檔老闆又好熱情，所以我地都要照食