我是一個學界的灰姑娘: 4. 第一次俾男仔保護

「小妹妹，妳跟埋入黎」
 
「但係醫生…..我地冇錢…..有嘅話….我就唔洗去偷藥….」
 
我講呢句時好細聲，而且仲開始喊，不過我偷野果句仍然俾媽媽聽到
 
「家琪….妳…妳去偷野!?」
 
「媽…媽媽…..」
 




正當媽媽想伸手打我果時，扶住媽媽果個男仔一手拉我去佢身後，而佢姐姐就立即上前扶住媽媽
 
第一次…有男仔保護我…我抬頭望佢，佢俾到安全感我。同時佢都低頭向我微笑，我塊面立即發燙，個心不停咁愈跳愈快
 
我捉實佢件衫，企係佢後邊
 
「妳個衰女……去….去偷野」
 
「太太，妳囡囡冇偷野，佢有俾錢嘅，妳入去房先，我幫妳檢查下」
 




媽媽俾護士帶入房後，我坐係外邊，忍唔住雙揞面係到喊
 
係我喊緊果時，個男仔遞左紙巾俾我，而佢細佬就摸我，叫我唔好喊之類
 
「妹妹，妳媽媽有冇藥物敏感之類?」
 
問我問題嘅，係果位姐姐
 
「冇….冇呀姐姐…..」
 




「嗯….我幫佢登記先啦，妳地住邊?」
 
「北…北角…..春秧街明秀大廈1樓…8室A房….」
 
「嗯，登記好哂，妳都有埋紀錄。妳可能要等下，妳媽媽病得好辛苦下，醫生要幫佢檢查耐D」
 
「媽媽佢有咩事呀?」
 
「醫生仲檢查緊」
 
咕…………姐姐未講完呢一句話，我個肚嘅聲已經出黎
 
「妹妹，妳未食野?」
 
「我…未….」




 
「等一陣啦」
 
姐姐走返去登記站到，然後，佢叫左我埋去
 
係我眼前出現左一個杯麵，仲要係king size同埋一包檸檬茶
 
「姐姐…我點可以食醫生d野架…」
 
「唔緊要，醫生係我公公，護士係我姑媽，呢到所有野我都可以食，妳放心食啦」
 
「但係….」
 
「妳唔食飽，點樣照顧媽媽?」
 




我聽完姐姐咁講，好快就食完個麵同飲哂盒檸茶
 
同時，醫生都叫左我入去
 
「林醫生…」
 
「妹妹，妳媽媽應該係操勞過度，加上有感冒先咁辛苦，我幫佢打左枝針，佢會舒服好多。我會開足一星期藥俾妳地，另加一星期藥看門口。一陣返屋企食清淡d，仲有妳係便利店買嘅藥就係小感冒同頭痛果時食就可以，如果太病妳地就返黎搵我」
 
「知道醫生」
 
「妳地出去等藥啦」
 
我同媽媽坐係診所內等藥，好快姐姐就執好兩袋藥俾我地
 
佢解釋食藥次數後將d藥放係我書包




 
「姐姐….今次…幾多錢?」
 
姐姐俾我地嘅答案好驚人
 
「公公話唔收妳地錢」
 
「下?唔得架」
 
「妹妹，妳聽住，公公話妳想俾錢，佢唔會收，不過佢要求妳乖乖地讀書，入間好學校當係報答佢同妳媽媽」
 
「係..係!!我一定會」我d眼淚又開始流出黎，因為醫生對我地好好
 
「妳幾多年級?」
 




「我….6年級」我抹一抹眼淚答姐姐
 
「唔…同我細佬一樣喎，妳邊間小學?」
 
「我…北角官立小學」
 
「有冇想入邊間中學?」
 
「我…想入聖士提反女子中學」
 
「妳想讀女校?」
 
「嗯」
 
「咁我俾多間妳做參考丫」
 
「好呀」
 
姐姐指住佢領口上個校章，上邊寫住「寸陰是惜」
 
英華女學校