我是一個學界的灰姑娘: 3. 第一次去偷野

電車去到堅尼地城，我同媽媽兩個人靜靜地行。不過媽媽開始出冷汗，好似好唔舒服咁樣
 
「媽媽，妳唔舒服?」
 
「係呀家琪，我地去果邊公園坐下啦」
 
於是，我就扶住媽媽去坐低。但係媽媽仲係好辛苦嘅樣…
 
於是，我走去便利店睇下有冇藥買俾媽媽食，等佢舒服d
 




我一入到便利店見到d藥，好貴….真係好貴……我身上都唔夠錢買
 
所以我又走返去公園
 
果時媽媽仍然流緊冷汗，我拎枝水俾媽媽飲下，希望佢可以舒服一d，不過…佢仍然係咁辛苦
 
所以…我決定用自己前途做賭注
 
我走到去便利店，趁店員唔覺，好快將d藥拎走放入我個袋到，點知….我真係天生唔適合做賊…
 




可能因為我近視關係....
 
係我偷野果時，有兩個警察正正企係我後邊飲緊野。我成個偷野過程，佢地都見到哂
 
就係我準備走出便利店果時，佢地叫停我
 
於是我就逃走，我第一次俾警察追
 
我係細個果時，試過俾流浪狗追足兩條街，所以對於同四隻腳嘅犬類生物鬥跑，係有一定嘅心得同經驗
 




我一出便利店，就立即轉彎想避開警察，一轉，就入左間診所到
 
當時佢地準備休息
 
「小妹妹，妳係咪睇醫生?醫生仲係到喎」一個助護問我
 
「呀….冇野啦…」我轉身離開診所之時，兩個警察都黎到
 
「妹妹!打開妳個袋!我地係便行店見到妳偷野」
 
「唔俾!!!」點可以架，媽媽等緊d藥架
 
「立即!!!」
 
「唔俾呀!!!我媽媽等緊d藥架!!!」




 
係呢個時候，有個醫生係房到出黎，佢問一問個護士發生咩事
 
「阿怡，做咩事?」
 
護士講左少少俾醫生聽之後，就叫護士黎我身邊
 
「妹妹，妳俾d藥我睇下，如果妳媽媽唔舒服就應該睇醫生，妳唔應該亂俾藥佢食」
 
我聽到個護士講得冇錯，就拎左d藥出黎
 
「樂信、必理痛、止屙、頭痛、胃藥…」
 
個護士係到講藥名出黎
 




「妹妹，呢d藥唔可以撈埋黎食，食錯會好危險架」
 
「兩位阿Sir，我會幫呢個妹妹去便利店俾錢，咁樣有冇問題?」醫生係我身邊講
 
既然醫生話俾錢，佢地都唔想多事
 
佢地走左之後醫生先問我
 
「妹妹，妳媽媽呢?」
 
我而家先記得媽媽仲係公園等緊我
 
「醫…醫生...媽媽仲係公園等緊我…..我要拎藥俾佢…佢病得好犀利…」
 
「邊個公園?」佢好緊張咁問




 
「呀……果邊呀」我指一指俾佢睇
 
「我同妳去睇下佢」
 
當我地幾個想過馬路果時，見到有人扶住媽媽準備過馬路
 
扶住媽媽嘅，係一個同我差唔多年紀嘅男仔
 
佢身邊有一個女中學生，果個姐姐著住件藍色長衫校服，佢拖住一個小一左右嘅男仔，佢地應該係三姊弟
 
佢地過馬路之後，我立即接手扶住媽媽
 
「媽媽，妳有冇事呀?!」
 




當時媽媽攰到出唔到聲，佢塊面好白
 
而我就急到喊出黎
 
係我身邊嘅姐姐向醫生講發生咩事
 
「公公呀，呢個姨姨好辛苦，出哂冷汗，我地見佢係公園一個人坐，就扶佢黎俾你睇下。佢脈搏快而弱，不過個身有凍同汗，呼吸急促」
 
「冇問題，小敏妳睇住浩翹。浩揚，帶病人入診所。阿怡妳黎幫手」
 
原來，佢地係一家人，所以姐姐先帶媽媽黎診所