我是一個學界的灰姑娘: 2. 俾人睇唔起的童年生活

我拖實媽媽隻手，目送爸爸火化
 
爸爸同媽媽黎自內地，係香港生左我
 
我地一家三口生活係北角舊樓嘅天台屋之中，生活足襟見肘
 
當爸爸離開後，我地為左慳錢，由天台屋搬到租金較為平嘅劏房之中
 
媽媽一個人打工去養活我，一早媽媽就出門，到左晚上先返帶住好攰嘅身體返屋企
 




為左媽媽唔好咁辛苦，屋企三餐都係我煮，但係我地只係清茶淡飯
 
晚上食完飯，媽媽仲會去執紙皮去賣，為嘅就係賺多幾蚊
 
曾經有社工叫我地申請綜援，但係媽媽話佢有手有腳，唔想俾人歧視，所以拒絕申請
 
「乞兒女!!!執垃圾!!!」我係小學時，經常俾其他同學咁樣奚落
 
我所用嘅書包，係媽媽係廢物堆中搵到比較完整嘅舊書包，再加以修補
 




而校服，就係一d同校大姐姐留低嘅舊校服
 
除左內衣褲係會有新之外，我所有野都係用舊後再修補重用，包括我d襪同埋對皮鞋，鞋踭蝕左，就拎去補。如果到真係唔啱著，我地會去d好平嘅舊舖頭買一對
 
運動鞋，我就只係著住白飯魚。但係隨住白飯魚會好傷腳，媽咪儲左好耐錢，先買到對唔傷腳嘅舊款波鞋俾我著
 
就連文具，都係用老師剩低多出黎嘅文具
 
所以當係節日同埋生日果時，我收到老師送俾我嘅文具時，我係非常開心
 




當我俾同學欺負果時，每一次都有老師黎救我，每一次我都係緊握拳頭，我真係好想一把星過去
 
小學時候，我同其他女仔一樣，都有心儀嘅男同學
 
不過佢地連望都唔望我一眼
 
而且冇咩同學會黎同我做朋友，因為係佢地眼中，我係一個大陸妹、執垃圾嘅乞兒女
 
所以我係空閒時間除左幫媽媽執廢鐵廢紙之外，就係溫習
 
娛樂會有少少嘅，我有時會去舊書攤到買小說睇，係好舊嘅金庸小說
 
仲有一樣，媽媽以前有d流行歌嘅cd之類，我會用部好舊嘅cd機黎聽歌
 
有兩首歌我好鍾意




 
一首係默契，另一首係薩拉熱窩的羅蜜歐與茱麗葉
 
舊歌嘅旋律非常好聽
 
「家琪，妳今次又考第一啦」班主任再一次稱讚我
 
「多謝老師」
 
老師將佢手上嘅成績表交俾我，不過我再一次拎唔到…
 
因為….我有近視，但係冇錢配眼鏡…當年係小學6年級
 
因為家境唔好，每日我只可以去街邊坐低溫書做功課，為嘅，係慳多少少電
 




假期日子，好多同學都去迪士尼、海洋公園、去飲茶睇戲
 
而我，就係北角幫媽咪執紙皮鐵罐
 
曾經，我地搵唔夠錢，迫住食麵包皮
 
我知道媽媽經常自己一個人係到喊，所以我更加錫我媽媽
 
我從小嘅志願係做一個醫生，因為我睇住爸爸病死
 
而最大動力，係小學6年級時，媽媽病倒嘅事，果時，遇上我人生中，對我最重要嘅一個家庭
 
回想當日，我同媽媽係街上執完紙皮鐵罐賣完後，媽媽話同我去街
 
雖然只係搭電車慢慢行，但係我已經非常開心




 
經過銅鑼灣、金鐘一帶，名店林立，我真係好想係到買野送俾媽媽，而我嘅眼光亦都吸引到媽媽注意
 
「家琪，妳想買衫?」
 
「唔係呀媽媽，將來，我一定會賺多d錢，然後係呢到買野俾媽媽妳」
 
媽媽見我眼神非常堅決，但係同時佢摸下我個頭
 
「傻女，媽媽邊著得起呢到d衫?媽媽只求妳入到間好中學，可以大學畢業，將來嫁個錫妳嘅男仔，我就好開心」
 
「唔得架!我要照顧媽媽妳一世!!」我撓實媽媽挨住佢
 
「傻女…」媽媽摸一摸我個頭
 




我地兩母女相依為命，我媽媽就係我嘅一切，就算我唔嫁，我都要照顧媽媽一生一世