為了實現媽媽遺願，我成為了女兒國唐僧: K766

我越嚟越搞唔清…乜我同妳之間係有啲乜嘢需要記住㗎咩？無理由吖…雖然我連第一日同QQ坐係幾時已經唔記得咗，唔知女神又會唔會嬲呢？定係…唔通我好細個嗰陣喺條街度蝦過Flora唔記得咗佢個樣？一般嚟講我唔蝦女仔…
我：「我諗…我係咪有啲乜唔記得咗？但係…喺開始做呢份功課之前，好似同妳講過十句嘢都無。」
F：「死人交叉仔！我係話封信呀！」佢應該係第一次用呢個名嗌我，實在係有啲奇怪，但配合返呢個地方又十分親切…可惜嘅係自從QQ嚟咗我屋企我就嚟少咗好多，啲社工姐姐又換咗兩個，已經無乜人嗌我做交叉仔…至於封信，乜嘢信呀？呢個年代重邊有人寄信㗎…信？！乜話！
F：「死人頭！壁報封信呀！你條粉腸唔係無拆過呀？」
我：「有…有…小女子…原來係妳？」身邊太多女仔，我早就無在意過呢回事，甚至以為係某女神整蠱我。
F：「嬲呀！你做乜咁嘅反應㗎？！」佢死死盯住我，十足十我犯咗罪大滔天嘅事情，實情我乜都無做過…
到底攪乜？上年韻婷就話一齊坐慢慢培養咗感情，由一齊食飯，一齊溫書，再到我衰鹹濕成日偷望佢衫袖入面嘅內衣同埋蓻草，成件事尚算合情合理奈何女神當前…
而家係點？只不過係收留妳一齊做project咋喎；咪住，其實係收信先定分組先嘅呢？我已經唔記得咗…
我：「呢個…如果妳封信…唔係玩我嘅話，咁…多謝妳。」
F：「喂，你咁講到底係乜嘢意思呀？」乜意思…我自己都唔知道，但妳個態度唔似係對住自己心上人嘅語氣囉。




我：「欸…暫時嚟講我想保持單身先。」
F：「到底我有乜嘢唔夠佢哋好？」唔夠靚，讀書唔夠叻，家底唔夠好，勢力唔夠大，但全部唔講得出口。
而事實上呢啲又唔係女神們嘅優點，關鍵所在始終係因為QQ嚟咗我屋企搗亂，繼而發生連鎖效應。
我：「邊有話妳唔好呢，唔關好唔好事喇，佢哋都係我朋友嚟咋嘛，只不過係我本身無諗住拍拖。」
F：「Queenie，易汪係有男朋友嘅，女班長應該唔會show你嘅，Zilvia無諗住識男仔，你成日同佢哋玩為乜？」佢專登唔講幽蘭，睇怕因為幽蘭重算係謎之插班生。
我：「無㗎喎，所以我真係當佢哋朋友咋。」
F：「嬲呀！唔鍾意你！」然後佢扁嘴擰乜塊面。
我：「妳唔鍾意我…即係無事發生過啦？」
F：「我可唔可以打你呀？」
我：「可以嘅，就呢度啦，但係唔好太大力就得。」




嗰陣初初識QQ，佢每次打落嚟都係突襲式嘅，而家我調較到啲肌肉啱啱好有彈性，隻大髀又點會屈服喺小妹妹嘅暴力之下呢，所以而家QQ慣咗一出手就直接閹。
F：「都唔好玩嘅，你都唔痛，唔玩喇。」
我：「其實…Flora妳鍾意我啲乜呀？我哋又唔熟…」