為了實現媽媽遺願，我成為了女兒國唐僧: K767

F：「邊個話我鍾意你呀？我而家憎死你呀！」
我：「咁即係無事啦，如果無事我就繼續打code。」
F：「喂呀！」呢啲港女認真向左向右走，如果你對佢無興趣其實都幾煩下，尤其係我本身就一頭煙。
我：「自問我都唔係好男仔，優點欠奉，做乜無端端鍾意我喎。」最最最重要係我都無flirt過佢。
F：「我知你唔係好仔呀，應該話全世界都咁講㗎啦。」
我：「有無咁大鑊呀…而家即係點？男不壞，女不愛？」
掉返轉我諗起欣姐，係咪佢夠晒壞傻仔健先咁死心塌地？
F：「嗯…你明明係衰人嚟，但佢哋日日同你玩得咁開心…」黃子華邏輯，明知魚蛋無益，但隔籬食得開心。
我：「妳唔好睇小佢哋幾隻嘢，全部都係女魔頭嚟嘅。」
F：「我知呀，但點解佢哋得但我唔得喎。」




我：「無話唔得呀，但同我呢啲衰人玩，女仔實有損失㗎知唔知？到時喊就無謂啦。」
F：「唔係，你根本就唔想理我，唔係嗰回事。」
我：「無囉，只係我呢排想做返個好人，唔攞妳著數。」
F：「你講呀，上個禮拜你先又喺條街攬女，大把人見到…你咁樣，即係我連個屋邨妹都不如啫。」
我：「點同…嗰個小妹妹係我EX嚟㗎…」雖然想為細蚊辯護，但齋論外表又好難爭得落，但唔重要吖…
F：「你都識講係EX嚟啦，即係完咗，咁點解我就唔得？」得唔得呢家嘢…Angel我都無上啦，唉。
我：「大佬，我哋同班㗎，萬一有啲乜嘢麻煩就唔好啦。」
F：「講到尾，你同女神玩就得，同我玩就唔得，你都係驚我玩爛你個party啫。」係女神們嘅派對啫…
我：「唉，我都講咗，而家我又無諗住拍拖，我又唔係好男仔嚟，妳同我玩為乜呢…妳咪當我係衰人，俾啲女神迷住咗所以唔同妳玩囉。」
F：「我問你，咁多個女神你最鍾意邊個？」




我：「呢啲嘢…唔太方便講㗎，自己感受下啦。」
F：「茜旎吖嘛，咁你又做乜要同易汪玩？即係你都無乜所謂啦，定係我真係差到你連玩都唔想玩？」
我：「有啲嘢唔到我揀㗎，易汪佢都係黐線嘅女仔嚟。」
F：「咁我都唔俾你揀呀，我又要你同我玩。」
我：「為乜喎…人哋就話有仔想點玩就點玩啫。」
F：「你唔同我玩，我日日嚟搗亂，攪到你啲女神同你反面㗎！」嘩！我好驚呀，我真係驚…
我：「唓，妳係要咁做我嘅話，我同唔同妳玩妳都可以做我㗎啦，等於妳隨時都可以話我非禮妳咋嘛，到時就睇下啲人信邊個…算啦，以我口碑嚟講應該無人信我，唉，到時我又可以搵返個EX猜包剪揼。」