為了實現媽媽遺願，我成為了女兒國唐僧: K723

作為一隻兵，我一路坐喺YY身邊，呢種感覺好奇怪，我望返對面嘅QQ，成個世界好似掉轉晒咁，但你問我係咪好大問題又似乎唔係，彷彿我係可以隨時易手咁。
有一點我係認同嘅，唔計嗰隻怪物幽蘭，YY嘅音樂造詣係喺QQ之上，始終佢有喺公開場合玩音樂，團長同佢講啲乜都可以即時作出修正。
我諗，QQ喺呢堆女仔之間都會感到壓力。
至於我呢個冗員…唉，去八下天王星打鼓打成點先；嗱，唔係我黑心想咒佢攪唔掂份譜然後有得玩佢身體呀，玩我當然想玩，但大家咁熟我寧願佢可以有場good show。
G：「最好唔好用手臂嘅力，個節奏嘅來源唔係嚟自妳隻手臂，而係手腕速度嘅控制同埋枝棍嘅回彈。」
U：「但係…我好似已經慣咗呢種打法。」
G：「妳而家重係訓練嘅beat實跟到㗎，但到妳打正譜嗰陣啲音符就會密好多，重有啲三連擊，如果堅持用臂力嚟達成嘅話係會好傷肌肉，重會失速咁甩beat，所以…妳可以學下我咁，要保持住枝棍嘅自然角度跳動。」
U：「但係咁樣…我好似控制唔到佢幾時落返去咁。」係咪陰力同死力嘅問題？平時出拳嗰陣妳又識收力…
G：「係要啲時間適應，可以再慢少少，唔使在意個拍子，由得隻手腕同枝棍自然咁郁…」
加百列哥哥你大膽喇，竟然以為Q姐佢睇唔到…




Q’：「咦，睇嚟好開心咁喎，教女仔打鼓教到捉住人哋隻手。」唉，而我次次捉住佢手係因為打架咁滯。
G：「欸，如果妳想嘅話其實可以交畀妳教。」
Q’：「玩咩，你都係教過我幾日咋，邊好意思打攪你嘅雅興。」點解佢哋可以乜都玩嘅…
G：「咁…我繼續先喇。」
Q’：「小心教女仔打鼓教到連個女朋友都無埋呀。」
G：「如果係咁嘅話，我又要再溝過女喇…」
Q’：「你識溝先算啦，無鬼用。」講完就走咗去。
家陣啲女仔都唔知興玩乜鬼，係真呷醋定扮出嚟？
U：「Gabriel…乜你真係唔識溝女㗎？」
G：「唔識呀，都未曾成功過嘅…」




U：「你都幾得意，祝你好運啦，我哋繼續先。」妳個天王星…平時喺度扮戀愛絕緣體，而家攪到個姐姐呷醋就喺度奸笑，全部女人都心理變態嘅…
Y：「喂！你條死仔包咪喺度阻住人哋練習啦，無嚟貢獻。」唓，本身叫我呢個琴棋書畫都唔識嘅人過埋嚟就已經係浪費資源，但偏偏妳哋係要搵著我嚟玩。
雖然有靚女睇，有免費大餐食，其實好不亦樂乎。
Y：「喂，幾位靚女，食完鹹嘢有無興趣食返啲甜嘢，整返幾碗滋補糖水嚟潤一潤？」媽呀，點解妳哋可以忙過不停㗎，而且妳…個個望住晒重捉住我隻手想點？