為了實現媽媽遺願，我成為了女兒國唐僧: K724

但又好似無乜問題，佢哋已經見過晒妳惜我；而我只係一個隨街攬女嘴嘅屋邨仔，所有嘢非常合理。
V：「吓…妳咁快又食得落呀？」今次我buy妳。
Y：「甜品係用另一個胃㗎嘛，同埋喺度練咗咁耐有啲寡，想出去行下抖下氣。」
Z：「如果可以，我想要凍嘅蛋白杏仁茶。」
Q：「有嘅話就幫我買個燉桃膠，無嘅話就是但啦。」
V：「我同Queenie食同一碗就得㗎喇，唔該晒。」
Q：「喂…而家啲糖水丁屎咁大碗，分唔到幾多畀妳。」
V：「我兩啖就夠喇，最緊要有妳啲口水尾。」…。
A：「媱媱，我想食燕窩妳唔會反對㗎可？」
Y：「食啦你！咁我哋行喇。」佢強行將我扯埋出去。




我：「吓…原來我都要出埋嚟㗎？」
Y：「有乜可能唔使？你係我隻兵就梗係要幫我攞嘢㗎啦。」而家無論在公在私我都係佢隻兵，唔知好事壞事…
我：「原來又當我工具人搵我笨，幾碗糖水有幾重呀…」
Y：「吖，你坐喺入面都係得個悶字，而家出嚟陪我行下唔係幾好咩？」係幾好嘅，而且佢一嘢就拖住我隻手。
再係咁黐埋落去佢哋幾個度，一方面我會好開心，而另一方面係會人都癲，亦好驚會影響到我同QQ嘅關係。
結果我又要負責開地圖搵間糖水鋪帶佢去，得返我哋兩個喺條夜街度，呢種感覺又非常之拍拖；糖水鋪夜晚好好生意，剔完之後店員嗌我哋十五分鐘之後嚟攞，但呢個地方呢個鐘數重會有乜好行，唯有行行企企咁。
Y：「做乜悶悶不樂咁？成晚對住靚女都唔開心？」
我：「唔關事，見到妳哋成班喺度玩音樂，就連天王星都咁勤力練鼓，而自己牧童笛都唔多識吹，有啲唔知點啫，係咪應該是但搵啲嘢嚟學下好啲…」
Y：「好心你啦，嗰一日半日…咪勉強自己啦，你本身又唔係有興趣，又唔係同人對賭…如果唔係你日日對住QQ又點會乜都學唔識喎。」
我：「晚晚對住佢…最偉大嘅建樹就係令我交齊功課同埋成績好咗少少。」




Y：「已經好好啦，起碼唔係累到QQ無心向學先。」
我：「點會喎，佢乜都係自己搞掂晒唔受我影響嘅，見到妳哋個個多才多藝，而自己就乜都唔識咁，唉。」
Y：「坦白講，你的確無乜長處可言，除咗一樣嘢。」
我：「咦，妳竟然重可以搵到我一樣長處？快啲講嚟聽下。」唔通佢知道我打康樂棋難逢敵手？
Y：「你條友仔咁都好意思問我？咪就係溝女囉。」
我：「無嘢呀…我而家只係一個單身毒撚嚟，溝條毛…」
Y：「毒撚都可以喺學校門口攬女重唔叫溝女叻？」
我：「以前啫…同埋普通屋邨妹不值一提啦。」