為了實現媽媽遺願，我成為了女兒國唐僧: K722

呀！我諗到點形容喇！本來首音樂就同佢本人一樣十足似塊煎牛扒咁，而家加咗幽蘭嘅協奏落去，塊牛扒得到了黑椒汁，得到了粟米粒…紅蘿蔔仔…忌廉薯蓉…重有我手上攞緊嚟飲嗰碗雜菜湯！幽蘭用佢嘅天才幫首音樂著咗件衫！不過呢，呢個世界上有樣嘢唔著衫先係最出色嘅，就係裸女，唯有無添加先係完美嘅表現。
A：「好！夠喇，啱啱repeat完一次嘞。」
G：「啊，我重想彈埋落去…」連佢都要聽團長枝笛。
A：「之後嗰段係你嘅solo嚟，唔好難為大小姐啦…妳做得好好呀下，並唔係照辦煮碗咁跟樂理幫佢彈和音，而係即場作咗一份bass譜塞落去咁滯，高音部份重大膽咁加咗好多撞scale嘅修飾音，我想問…妳本身聽過呢首嘢未？」
V：「多謝，未聽過，今次係第一次聽。」
A：「非常好，我會記住呢個咁有趣版本嘅TRUTH。」
G：「想問下…妳會唔會想試下真夾band，做keyboard手？」今次實在估唔到佢會咁大膽。
A：「你就唔好玩大小姐啦，佢有乜可能得閒應酬你。」
V：「好抱歉…小女子無能為力，實在安排唔到。」
G：「都明白嘅，可以同妳jam過一分鐘算我好彩。」




Q’：「哦，一分鐘，三生有幸，開心啦。」
A：「都話女仔唔識彈琴好驟忌㗎啦，係咪呢？」
Q’：「喂，有無電子中提琴借嚟玩呀？」
A：「有都無用啦，邊有咁多現成中提琴嘅band譜呀，重要同結他搶音域搶到應一應，妳不如專心啲玩好枝bass好過啦，最易適應㗎喇。」
G：「我諗我要去睇下個傻女先…佢再咁落去會刨爛塊鼓pad㗎喇，雖然電子鼓好易配…」呢啲係咪叫君子不立危牆之下？而我就似乎喺度每日走鋼線。
Y：「喂，PK仔，你飲到第幾碗湯呀？雖然我哋唔係留返好多肉畀你啫，都唔使咁呀？」
我：「第三碗啫…唔關事呀，我覺得個湯幾好飲。」
Y：「你條友仔係咪唔記得咗自己身份？做我隻兵都唔可以咁寒酸㗎，邊有上流子弟會咁樣食嘢法。」佢一手攞咗我碗湯然後自己飲，包括埋我啲口水尾。
我：「上流子弟都可以響應環保掛，食得就唔好嘥啫。」
Y：「咪發夢啦，經濟同環保係反義詞嚟㗎，有邊個可以一路使錢一路環保呀，食過量已經係浪費食物啦，你咁想食我搵日請你去食放題嘞，而家好同我收手喇下。」




枱面重有一碗未開嘅湯同兩兜沙律，唉。
我：「知喇，放題就算啦，呢碗湯高質好多唔該。」
Y：「咁呢點我認同嘅，幽蘭管家揀得實有返咁上下水準…」結果佢自己都飲埋呢半碗。
食完飯佢哋又開始研討音樂嘅問題，主要係團長講返佢哋有乜可以改善嘅地方，例如音符嘅感情…