為了實現媽媽遺願，我成為了女兒國唐僧: K721

最快食完嗰個係天王星，一嚿扒，一嚿豬骨，三扒兩撥埋啲飯同沙律就去繼續練鼓，似乎唔想浪費可以喺度嘅每一分鐘；而另外班友就繼續喺度風花雪月，大致上講下以前學音樂嘅歷程同埋趣事，而只有我係呢度唯二唔識音樂嘅人士…無計啦，繼續飲湯同食菜，重有三份喺度，都理唔到有無佢哋口水尾，因為加百列哥哥好正經一開波就食晒自己份沙律同湯所以我唔使擔心。
A：「喂，照咁講大小姐妳嘅音樂造詣都唔差喎，有機會爭名校嘅首席鋼琴手，呢啲學校個個鍾意出風頭。」
V：「唔再爭啦，好攰，都唔係為咗彈琴嘅…」
Q：「放心，我哋學校好太平，你想玩就有得玩。」
Y：「如果我唔拉小提琴嘅話，Miss應該會煩爆去邊度搵第二個識拉嘅人…」
A：「但以妳嘅水準，我比較想知妳係技術派定係藝術派，如果想測試一下妳improvise嘅能力得唔得？」
V：「係咪覺得我考ABRSM就剩係識背譜？」
A：「又唔可以咁講，其實每一個人都有佢嘅個性，但我相信喺香港地每一個玩音樂嘅人都會考下ABRSM。」
V：「我諗我無乜偏好，又未至於係好expressive嘅音樂人，但我相信大部份普通需求我都handle到。」
A：「不如Gabriel你就彈一段音樂出嚟，然後到repeat嗰陣大小姐就試下即場幫佢伴奏好唔好？」




V：「可以試下嘅…咁我係用返鋼琴聲？」
A：「無所謂，鍾意嘅話攞起枝bass嚟同佢jam又得。」
V：「唔好喇，我嘅能力始終係喺啲黑白制度。」
話口未完，加百列已經攞起咗Zilvia身邊部結他嚟彈…點解唔攞返幽蘭嗰部？明顯地因為佢嗰部係私伙唔敢掂。
又幾好聽喎，係我第一次聽到嘅音樂嚟，幾有時代感又帶少少激昂，呢個已經係我能力所及最好嘅形容嚟，唔知會唔會係佢作嘅呢？
唔算係一首好複雜嘅音樂，年少無知嘅我亦唔知佢有幾勁，只不過聽起上嚟係順耳無問題嘅。幾位女仔就全神貫注傾聽，幽蘭就更加已經將兩隻手放咗喺琴鍵上面做緊假動作，一路留意住加百列嘅神情想咬人咁，呢啲女仔認真起上嚟個樣認真恐怖。天真嘅我深信大天使嘅技術係高班嘅，但係得一種樂器呢…學佢哋講，有啲單調，無音色。
大概一分鐘之後，加百列望咗一下幽蘭，幽蘭隨即心有靈犀咁將手指㩒落琴鍵上面…我諗我呢世都唔會明點解佢哋可以喺無譜嘅情況下同其他人作出相同嘅反應，總之結果就係首音樂好聽咗好多。