thriXt Qantasy 純文字安眠之作 (New: - U2K - 一直上架): K719

A：「好，麻煩大Queenie幫我揸機嘞。」佢遞咗部電話畀Q姐，然後一嘢就塞咗落個空間度，再毫不客氣咁左右開弓，左手搭YY右手搭QQ，將杯嘢飲擺喺YY塊面側邊。
呢個團長…咁嘅款成個黑道頭目，又或者敗家二世祖咁，夠晒入型入格完全無違和感，我諗正常男仔都想過去摏佢幾拳。作為佢師妹嘅YY當然高度配合，而對男仔手段極高嘅QQ亦都回應得體；唓，好叻咩，你慢慢玩飽佢，反正我平時啲福利你係點都唔會得到。
Q姐幫佢哋影咗兩張，排列係ZVQAYU。
A：「呀，不如換一換位再影多幾張無謂嘥。」平時只會啲女喺度車輪轉，男仔講啲咁嘅嘢出嚟實在非常突兀。
A：「細Queen唔使郁喇，媱媱妳同有錢女換位啦。」
YY當然無反抗團長嘅理由，望一望大小姐，幽蘭亦唯有不情不願咁企起身行去換位。
A：「嗯…有錢女請嘅外送茶真係特別好飲，不如我哋一路飲住一路影幅相啦。」對住佢連Q姐都覺得無奈之極。
A：「欸，大小姐，重記唔記得上個禮拜妳哋個個都要出頭救乖乖女嘅，而家係妳找數嘅時間嚟喇。」
V：「今次你又想玩啲乜呀？團長大人。」
A：「得，妳唔好郁，就呢個動作繼續飲嘢就得。」團長用左手穿落去幽蘭嘅下手再攞返個杯繼續飲嘢，呢個動作係叫做合巹交杯…




V：「你係咪黐線㗎？！有病就唔該睇醫生啦！」
Q’：「團長…你會唔會過份咗少少，咁樣對個小妹妹。」
A：「唔會呀，要得我出手相助我實出手嘅，呢啲犧牲係應該預咗嘅。」幽蘭雖然一肚氣但又無從反抗。
Q’：「唔知你啲女朋友見到你對個妹妹仔狠下毒手會點呢？」Q姐㩒下屏幕又一張。
A：「千祈唔好，啲相唔可以流出去㗎，你哋都唔想無咗個團長㗎係咪？」佢一路講一路將QQ嘅身體拉埋去自己身邊，就好似當咗佢係陪酒咁。
結果，Q姐繼續影咗兩張，幽蘭就擰乜面瞇埋眼扁晒嘴嬲爆爆咁飲嘢，另一邊嘅Zilvia就望住佢喺度笑，至於團長就喺度飾演靚仔版紂王示範乜嘢係酒池肉林。
攪完一大輪終於有得開餐，我呢啲做細嘅就讓班女食主菜先，自己企喺bar枱飲碗好好味嘅雜菜湯，以呢班女嘅食量嚟計，我今晚應該可以飲三碗湯。
A：「哎，大小姐，妳話過喂我食嘢㗎喎，我知道妳哋呢啲上等人一定牙齒當金使，言出必行…啊，我唔係想食牛扒呀，不如喂我食羊架呀，呢個難處理我又唔想整污糟隻手喎。」幽蘭無咁好氣之下唯有徒手攞起塊羊架放喺團長嘴邊，而團長就開始擘大個口喺度撕咬。