為了實現媽媽遺願，我成為了女兒國唐僧: K718

V：「唔要呀！衰人！」
U：「唔好嘈啦，呢度重有好多杯茶，妳可以慢慢揀。」
V：「係吖嘛，明知茶係女仔飲嘅重專登攞嚟飲…」
團長個樣當然不為所動重飲得津津有味，呢個時候我先望下嗰堆嘢飲，除咗團長手上嗰杯之外重有另外五杯唔同顏色嘅茶，加三杯咖啡類物體…呢個時候我就明幽蘭嘅邏輯嘞，但下下都要跟住佢嘅諗法確實又係麻煩。
G：「咁…妳哋揀好咗野飲先，我負責打開啲食物。」
V：「嗱，呢度重有餐具，麻煩晒你喇。」幽蘭攞咗一袋灰色盒出嚟，同我理解中嘅外賣餐具係有少少落差。
加百列一打開，入面有三個槽放咗閃爧爧嘅不銹鋼刀叉羹…估係不銹鋼咋，純銀嘅話應該唔夠硬做餐具。
A：「啪！啪！犀利！有錢女果然係有錢女，食個外賣都要自備餐具，重要一睇就知係名貴嘢。」
V：「乜喎！膠刀膠叉點鋸扒呀？你用下個腦得唔得。」
Q’：「咪講嘢喇你，唔好阻住我哋開餐，好肚餓喇。」




就係咁，六條女一人揀咗一杯嘢飲，由於小咗杯茶嘅關係，Q姐一手就攞咗杯咖啡色物體，然後同其他女一齊坐喺梳化上面影相；梳化只係夠坐四條女，所以天王星就擔咗張Yamaha鼓凳過嚟坐，而Zilvia就坐喺一嚿方形嘅皮凳上面。乖巧嘅加百列已經打開晒啲食物開始切緊嗰條…華爾茲…威路氏？係威斯康辛州牛扒！
Sor，記性差…食都未食過又點會知呢條嘢尊姓大名呢…
除咗條扒，重有…羊架…西冷…豬肋骨…帶子天使麪…波龍扁意粉…雜菌飯同海鮮飯，實在好不豐富。
請原諒我呢個做飲食業嘅小弟無能，唔可以幫啲食物改個更好聽嘅名，因為實在太多嘢。
我：「管家話趁熱食㗎，妳哋幾個影完相未？」你懂的…
V：「先三分鐘未夠，使唔使咁急呀，等多兩分鐘啦。」
影人，影食物，影表情，影唔同組合，十足十廣告studio咁；美人美景…都醫唔到我個肚㗎，但最難得係Q姐一拍埋去就同佢哋玩得埋，可能因為都係音樂人嘅關係啦。
A：「呀，既然我攞錯咗杯茶，如果杯茶入唔到鏡好似有啲可惜，不如換我入嚟同妳哋影兩幅吖。」
Q’：「好呀，既然你嫌命長，我就實成全團長大人你嘅。」Q姐本身喺中間，企起身就空咗個位出嚟。
大天使就望住盒天使麪發怐愗，佢當然唔敢亂嚟，話晒幾步之遙就已經肉蒲團咁，我就話已經慣晒啫；正所謂遠望金瓶梅，近睇水滸傳，入完刀山油鑊重有無全身可以出返嚟都實在係未知之數。