為了實現媽媽遺願，我成為了女兒國唐僧: K713

G：「其實…都係用口教啫，邊有分教邊個㗎…知道兩位都係玩開音樂亦學過木結他，所以啲樂理同指法我就skip喇，妳哋自己都識練，電子結他嚟講比較最常用嘅技巧就係bend同vibrato，除咗可以用條弦嚟達成之外呢度重多咗個搖座…」老實講，我唔係唔鍾意音樂，不過音樂係用嚟聽嘅，正如食物係用嚟食嘅而唔係煮嘅。
A：「喂，死人爽，既然嚟到就唔好咁懶，一路聽佢哋練習一路玩個panel啦，佢哋當日嘅最後包裝就靠晒你㗎喇，唔好睇小自己至得㗎，我都會擔心如果佢哋輸咗你嘅下場…」佢一路講一路插電子鼓個聲源落第二部耳機度，由於天王星條line實在悶到嘔泡所以一早就俾我unplug咗…睇嚟團長仍然係關心呢個麻煩嘅女人嘅。
而關於平衡，比較麻煩嘅係QQ嘅琴同虛擬bass都係喺同一個channel，當有琴聲時，係可以啱啱cover住啲bass，但當佢solo bass嘅時候，就硬係唔太夾YY啲提琴聲…
是但啦，我相信佢哋本身都知道個問題而會磨合調節。
喺加百列同Q姐嘅指導下，幽蘭同Zilvia嘅結他聲變得越嚟越有層次，變化同動態明顯大咗無之前咁悶；主要就係幽蘭嘅主音做得好，表現出一教就識嘅外星人實力。
A：「好！大家都練到咁上下，我想聽大家dem一次先。」雖然話個團唔關佢事，但霸氣仍然外露。
佢重專登走去天王星身邊夾硬除咗佢部耳機先講。
U：「但係團長…我真係重未handle到首歌。」
V：「唔緊要啦，好似上次咁打到幾多咪幾多囉。」
U：「因為我嘅甩漏，攪到成個演出東一忽西一忽咁，我會過意唔去…」




A：「唔使咁擔心，我只係需要妳撓埋雙手演出。」
U：「吓？！你講乜話？我唔係好明你乜意思喎！」
團長講嘢永遠都係咁出人意表，深奧程度超越福音直達默示錄，睇嚟有需要請返啲神父牧師嚟幫佢解讀下。
A：「妳咁大反應做乜，好歹妳四肢發達，無咗兩隻手都重有兩隻腳喺度，講到咁妳而家un唔un？」串嘴得佢吖…四肢健全就變咗發達，但我想講佢頭腦一啲都唔簡單。
U：「吓…但得個bass噗噗聲咁，好唔知點咁喎。」
A：「唉，真係同妳講多都嘥口水，大天使你解釋下啦…」
G：「嗯，打鼓嚟講，其實個bass先係重心嚟，佢決定咗個節奏快慢同強弱嘅感受，雖然喺聽覺上啲聲係無咁入耳，好易俾其他高音樂器冚過，但當你個人沉浸緊喺音樂入面嘅時候，佢先係同你體內血液共鳴嘅聲音嚟，可以話bass係要用身體感受而唔係用耳聽。」