為了實現媽媽遺願，我成為了女兒國唐僧: K712

A：「啊？！咦！嘩？乜原來妳係佢條女嚟㗎？！幸會幸會！失敬失敬！」要知道…假膠亦係團長一大樂趣嚟。
唉，靚仔就有本錢做任何嘅嘢包括派膠，要知道如果你係樣衰嘅話…如此場面實在係有幾咁柒到貼地。
Y：「唔使咁驚，我提咗佢哋唔好講我同你啲嘢㗎喇。」YY喺度咬我耳仔，但咁嘅環境提唔提對我嚟講一樣弊。
V：「呀！呢個都係Queenie！有兩個添。」
Y：「係呀，真係咁啱得咁巧…」
Q：「Queenie姐姐妳好，叫我茜旎就得㗎喇。」
Q’：「真係可惡，叫親Queenie嘅都係咁靚女嘅。」
A：「嘩，妳咁樣兜個圈嚟讚自己都有嘅，會唔會唔係幾好咁呢？」喺隔籬嘅加百列當然粒聲唔出，自己女朋友講埋啲咁嘅嘢又真係好難幫得落嘅，唔撐又唔得呀。
Q’：「我又無話包埋自己，難得撞名咁就梗係要握下手先啦。」我諗佢哋可以好好相處嘅。
我望住Q姐嘅嘴仔，回想返起當日佢喂我飲嘢嘅情景，而之後QQ都對我做過同樣嘅嘢，假如有一日我可以同時制服兩個王后…唔得，加百列哥哥係好人嚟嘅，我唔可以咁樣送頂綠帽畀佢戴。




喺呢個兵荒馬亂嘅時刻，天王星望咗一眼就繼續敲棍，連少少除耳機溝通下嘅意慾都無，認真服咗佢。
G：「咁唔講廢話喇，想問下邊個要速成電結他呀？」
V：「呢度，我係負責主音結他嘅Vienna！」佢的確係一個好叻嘅女仔，但同人溝通起上嚟就硬係有啲怪，唔知呢個會唔會係佢之前俾其他女同學排擠嘅原因呢…
G：「嗯，見到…妳手上嘅ST幾靚下。」
A：「唔使理佢住，呢個有錢女嚟會搵到人幫手㗎喇，呢位Zilvia就比較乖巧，你可以指點咗佢先。」
V：「喂呀！點解呀？！」其實我都有啲一頭霧水。
Y：「咳，團長…你喺度咁玩法會唔會唔係幾好？」
Q’：「好在你平時喺樂團正正常常無亂咁嚟，如果唔係實攪到團員不和都似…」
A：「呵，呢度又唔係我個團，當然可以放飛自我。」
Q’：「我哋有兩個人，一人幫一個咪得囉。」




Y：「Queenie姐姐，其實妳都可以教下我拉小提琴㗎。」
Q’：「呢度都唔係我個團嚟，係咪想迫我爆粗呀…咁…你想揀邊個嚟教呀，今次益下你嘞。」
G：「呢個…呢個…都係交畀妳揀啦，呢啲情況難分高下我實在揀唔落手，攪到團員不和就唔係幾好啦。」加百列左右望完之後表示無從入手，一邊斯文乖乖女A cup多啲，一邊就怪雞仙女C cup有找，但好明顯問題就唔關啲魚同熊人事，女朋友叫你揀女你真係去揀，下一步就係叫你揀鉸剪定菜刀…係廚師腸刀至啱。
Q’：「咁你教有錢女啦，話晒你先至係熟嗰個。」