為了實現媽媽遺願，我成為了女兒國唐僧: K711

至於團長對呢幾條女係咪會春心動我就不得而知，記得YY講過以前試過主動親近佢但就無乜反應；啱嘅，佢已經唔止有一個女朋友，重使唔使再去識更加多嘅女去徒添煩惱？假設左右女神都係我條女，我重會唔會去搵YY吖嗱？其實好難講，因為每個人都有佢獨有不可取代嘅地方，例如多到好似著咗黑底嘅毛毛…唉，兩年前嘅YY又點同而家嘅YY吖，只可以話團長絕對無我咁仆街。
A：「講開又講，妳哋係音樂組嘅人，本身唔使玩咩？」
Y：「無話過唔使玩，我哋年年都報樂器組嘅合奏，不過嗰啲手板眼見功夫唔使請你嚟幫手。」
V：「佢哋先係音樂組啫，我係今年嘅插班生嚟。」
A：「得，知妳矜貴喇…咁妳哋今年嘅演出曲目係？」
Q：「係Gazebo嘅I love Chopin。」
A：「咦，經典嚟喎，妳哋點配合呀？」
Y：「照返平時一樣，琴、長笛、violin。」
A：「吓，但人哋首嘢明明係EDM嚟，妳哋咁樣配合會唔會soft得滯呀？」
Y：「無呀，主要都係鍾意呢首音樂，所以想用古典嘅風格帶畀大家，我哋本身又唔係玩開電音或者夾band嘅。」




A：「首嘢叫我愛蕭邦啫，但佢真係唔係古典音樂嚟…如果我無記錯係有交響樂團演過呢首嘢，當中都有用到爵士鼓，而唯一最清嘅版本就係日版河村隆一。」
Y：「呀，個violin譜我有參考過呢個版本。」
A：「人哋呢個版本係sell唱腔，妳哋有無人唱先？就算有人唱，妳哋又唱唔唱到人哋一半？」
Q：「有就唔係樂器組嚟啦，我哋得三個人都無辦法。」
A：「呢首嘢要編鼓譜係相對上簡單，如果妳嘅話應該用一個禮拜就可以handle到。」
V：「我想專心練結他，鼓嘅話不如交返畀啲專業人士嚟啦。」呢個蠱惑左女神即刻望住女班長。
A：「嗱，我只係畀少少意見啫，我就連觀眾都唔係，妳哋鍾意點處理係妳哋嘅決定，但如果因為表達得唔好而浪費咗一首曲目係有啲唔尊重佢嘅原作者。」呢個團長…對音樂係有異於常人嘅執著，講真如果要尊重原作者嘅話，莫講唔應該搞音樂日，首先要取締晒啲卡啦OK場先。
但邪嘅就可以留低，因為呢啲場重點唔係音樂。
A：「其實呢，我今日重搵咗人嚟幫妳哋嘅，佢哋都應該嚟到喇…出嚟啦，曹操。」
G：「嗯，團長果然無講大話，真係好多靚女。」




A：「呃你托咩，好好享受啦，如果有福消受嘅話…」
Q’：「家陣叫你嚟玩音樂定昅女呀，係咪作死？」
G：「哈囉易汪，好耐無見喇。」又係呢個睇落厚實大份同音樂一啲拏更都無嘅哥哥，我見到佢即刻表情僵硬。
Y：「嗯，等咗你哋嚟救命好耐喇，雖然唔係救我。」
Q’：「妳哋好呀！我哋係夾開band嘅，呢位係Gabriel，而我就係佢女朋友Queenie。」介紹通常由女仔嚟做。