為了實現媽媽遺願，我成為了女兒國唐僧: K710

Y：「哎吔，咪玩住先啦，一係你聽咗我哋彈一次先！」
A：「一直等緊妳哋啦，妳唔係諗住我真係為咗上嚟溝女呀，媱媱？」如果佢無返咁上下樣，應該已經俾人打死咗，因為實在係太過摟打…
幾條女擺好架勢，由YY嘅小提琴開始入奏，團長就自己走咗入錄音室，一邊扭制一邊監聽佢哋嘅示範。
A：「嗱，坦白講，我知妳哋幾個玩開音樂，如果以中學music day嚟講，係夠做㗎喇，重有成個月時間畀妳哋練習，再加埋包裝，我唔覺得會輸比一隊業餘嘅學生哥，不過妳哋都好清楚個問題嘅核心喺邊。」
Z：「其實…重有無其他方法可以幫下佢？」
A：「坦白講，無，呢個已經係最快嘅捷徑嚟，除非做假。」唉，似乎出貓先係呢個世界嘅真諦，正如QQ都成日鬧IVE無個識唱歌，好唔過乃木坂幾多…
Y：「無可能啦，呢個人死都唔會做假，加埋我哋都唔敢，如果爆咗出去好影響我哋形象。」哦，原來妳哋幾個形象重高過啲偶像，無計啦，嗰啲只係商品嚟。
A：「所以睇佢做化喇，就算佢肯賣身都唔識幫佢。」
Y：「你就真係諗都唔使諗，除非你諗住打贏佢啦。」
Q：「我又覺得未必喎，如果賣身可以解決問題，呢個女人或者會有考慮嘅空間。」




Y：「點解咁講？佢平時見到啲仔恨不得打死佢哋咁。」
Q：「點同，啲仔無無謂謂咁佢先咁憎啫，唔好唔記得佢實際到爆先得㗎，如果保證幫到佢贏，少少犧牲有機會接受到。」
Y：「賣身叫少少犧牲？好似到而家都未見過有仔掂到佢咁，除咗打架嗰陣…」我好想同佢哋講聲sorry，因為佢個身體我已經唔知掂過幾多次，重要唔使同佢開打。
Q：「妳要清楚佢真正在意嘅係乜，精神同意志先係佢放喺首位嘅嘢，身體呢啲表象嚟嘅啫，賣身又唔使賣埋心嘅，贏咗之後靈魂一樣可以咁崇高，說服到自己就得，最少…係賣咗畀個靚仔先。」
A：「咪攪，到頭嚟佢輸咗我容乜易小命不保㗎，係呢，Queenie妹妹妳又使唔使賣身咁呀？」
Q：「抱歉，我本身識彈琴，亦唔執著輸贏，所以幫你唔到喇。」
V：「嘻，重以為妳有靚仔實唔會放過嘅添。」
Q：「一對一就話啫，妳哋個個咁樣望住我邊好意思。」
可能會有人問點解佢哋可以咁肆無忌憚討論天王星，原因係班長佢一直戴住個耳機喺佢自己世界入面，無視咗出面嘅一切鳥語花香。