為了實現媽媽遺願，我成為了女兒國唐僧: K709

Y：「我諗妳鍾意嘅話嗰日都可以借嚟用嘅，團長又無話只限結他同bass，妳冧得掂佢咪得囉。」
Q：「冧掂佢唔係問題嚟，但呢部野實在係重得太過交關。」妳肯定唔係問題嚟？佢似係嗰啲妳一日唔表演噴水佢都一日唔安樂嗰啲嚟噃，雖然我知妳專業。
V：「唔得呀，呢部紅噹噹一啲都唔襯呀！Queenie妳係咪無keyboard呀，等我送部藍色嘅畀妳。」欸…幽蘭妳冷靜少少啦，QQ喺度人設都重係有錢女嚟，唔好講到佢買唔起要妳送先得㗎。
Q：「咁又唔使，我有部白色full size唔驚撞色。」
Z：「首嘢我喺屋企用木結他練咗好耐，不如…我哋四個試下夾一次先啦。」佢哋開工，我就無乜嘢好做；其實佢哋唔開工我都無乜好做，因為女仔謦欬我都唔識加把口。
有啲想過去幫天王星加隻腳，但又好似阻住佢咁，所以我都係返錄音室玩下panel算。
經過咗幾日嘅沉澱，我聽得出佢哋嘅表現係有進步嘅，但協調性就重係差緊啲，不過而家先第二日其實已經好勁，佢哋其中有三個夾開確實係唔同啲。
玩完兩次幽蘭同QQ又喺度研究份譜，完全唔知佢哋講乜…
A：「Hello everybodies！成大班學生妹喺度真係不得之了。」你可以咁唔正經先係不得之了…一入嚟就搭住我條女嘅膊頭，雖然我一啲都唔介意。
Y：「喂，妳過嚟還過嚟，有無貢獻嘅先？」佢兩隻手指夾起團長手背嘅皮摵返起佢隻手。




A：「吖，我真係無諗過會咁樣俾自己啲團員懷疑。」
Y：「點同喎，我哋又唔係用你個名嚟表演衰咗唔關你事，點知你係咪嚟玩only。」
A：「講真嗰句我係嚟食花生㗎咋，不過已經連譜都寫埋畀妳哋，妳竟然咁對我。」
Z：「係囉，話晒佢係妳團長嚟…唔好咁話佢啦。」
A：「都係Zilvia妳最乖女，抵讚。」呢條低B團長…真係慣晒手勢，換另一隻手又搭落去Zilvia膊頭度。
雖然Zilvia未至於發癲，但已經夠令佢神色慌張。
Q：「好喇，你係咪嚟幫手都好，都唔應該喺度黐身黐勢。」QQ又用手夾佢手背皮抽返起，好明顯呢個性開放少女係為咗解救姐妹先會講啲咁道德嘅嘢。
A：「唉，難得妳哋個個咁靚女，如果掂下都唔得好悶㗎嘛，妳估我好想上嚟聽歌仔咩？」我都知溝女係需要厚面皮，但呢條友已經進入目無王法人神共憤嘅化境。
V：「團長大人，如果你需要膊頭嘅話我呢度都有嘅。」
A：「唔要，有錢女滿身銅臭，咪污染咗我呢對揸指揮棒嘅手。」呢兩個人唔知做乜火星撞地球咁，而幽蘭就即刻擺咗副嬲樣出嚟，感覺上幽蘭嘅心情對男性無咁敏感。