為了實現媽媽遺願，我成為了女兒國唐僧: K708

咁嘅環境，咁嘅組合，我哋死晒空氣；QQ就同Zilvia一齊喺度睇彼拉多啲相，我哋就喺後面䚎下咁。Z真係一個好純粹嘅女仔，乖乖讀書，輕量咁做下運動同玩音樂，其餘嘅時間都係留喺屋企陪隻狗，父母係高級公務員生活非常之有規律唔似有乜特別活動，驟眼睇嚟比起幽蘭嘅生活更加刻板，起碼幽蘭有得跟大人周圍去。
呢段路程私家車十分鐘搞掂，嚟到門口就成班柴娃娃落車上樓…佢哋五個女仔，拆開嚟相處都會好開心，但當佢哋喺埋一齊，我就變成一個不折不扣嘅跟班。
V：「嗱，幫我攞住先啦。」佢遞咗個黑箱畀我。
我：「咦，妳準備咗私伙嘢嗱？」
V：「係呀，啱啱先到貨咋，我都重未開嚟睇。」
對佢嚟講，莫講話一個電結他，要準備成隊管弦樂隊嘅樂器都唔係難事嚟，但最重要係希望佢玩得開心。
一上到去，天王星二話不說就開機練鼓，明嘅。
Y：「估唔到妳咁上心，咁快就買埋自己結他。」
V：「係呀，襯返妳吖嘛，搵咗部藍色嘅，費事借人哋嗰啲嚟用啦。」
Z：「嘩，係Fender嘅Strato呀。」我㞗知係乜嚟咩，眼見乜咪乜囉，一部藍寶石色閃爧爧嘅電結他，珍珠白飾面，黑色柄，木色頭，係咁多；正如我都唔太知貨櫃車啲parts有乜用，最緊要銀碼夠大就又靚又勁，係掛。




V：「嗯，係我管家幫我揀㗎，我剩係話過要深藍色，係呢，妳又諗唔諗住買返部自己嘅結他呀？」
Z：「有諗過嘅，但只係短時間用一陣…我屋企部木結他先係啱啱鑲返啲線上去咋，小學到而家…」
Y：「好彩有人借部琴畀我，等我無呢啲煩惱。」
V：「我哋無妳咁幸福嘛，有靚仔哥哥照顧。」
Y：「係鬼，佢平時玩我就有。」
Z：「妳重話人哋玩妳，佢幫妳調好晒音先畀部琴妳。」
Y：「妳唔使羨慕我喎，妳嘅話去煩下佢實幫你㗎。」
Z：「咁又唔使，呢少少嘢我自己識做。」
Q：「可惜吖，keyboard無得調音，這些機會不是我的。」妳個死人QQ，人哋靚仔少少就春心動。
Y：「唔緊要，妳央求下佢上門幫妳屋企部鋼琴…調下『音』咪得囉，無返個零鐘都唔會搞得掂。」呢兩個淫婦…好難想象佢哋開行turbo姣仔嗰陣會係點嘅死款。




V：「嘩，佢咁犀利連鋼琴調音都OK呀？」
Y：「咁我又唔肯定，但以佢份人應該玩下玩下就得。」
Q：「其實我都有個煩惱，就係唔知用唔用學校部keyboard好…」
Y：「嗰部陳年數碼鋼琴？雖然話駁咗電腦之後output都係一樣，同埋有槌，但感覺真係麻麻。」
Q：「係呀，對比起呢度部stage class嘅真係差好遠。」