為了實現媽媽遺願，我成為了女兒國唐僧: K707

而家啲女仔到底乜結構…雖然佢會打潛艇係人所共知嘅事實嚟；無端端攪到個情況有啲尷尬唔知點算好，我哋兩個就好似第一次約出嚟見面嘅兼職男女朋友咁，結果我哋瞇埋眼攬埋一嚿嘴嘴，真係好舒服，每次抱住佢條腰就好似已經擁有咗呢個女仔咁。
或者同佢上床係一件好簡單就可以達成嘅事情嚟，不過我應承咗佢唔可以咁做，呢一刻我剩係想用身體感受佢嘅心跳聲，佢嘅溫暖，佢鼻哥呼出嚟嘅氣體。
Q：「可以咁樣抱住你，其實都…」「咔嚓。」！
我哋兩個即刻分返開，坐喺隔籬咁。
爸：「吖，你哋終於返嚟嗱，乜而家啲學生返學好似重辛苦過返工咁嘅，我買咗瀨尿蝦…咦，你兩個怪怪地咁嘅，唔係鬧架吖嘛？」
Q：「無事呀…啊，係識郁嘅瀨尿蝦，多謝uncle。」
我：「妳去同佢哋玩下先，喂佢哋食埋最後晚餐…」
講真嗰句，我要抱住佢係隨時都可以，只要爹地唔喺度；但我要點樣先可以得到呢個女仔嘅心？我唔知道，正如我唔知道點解人類要食呢啲咁似異形嘅生物，認真睇下重有啲似一隻特大版嘅曱甴。
咁樣一家三口生活都幾有家庭嘅感覺，而QQ有時就會好似媽咪咁監我做功課，而我又可以拖住佢同抱返佢…女人…果然係人生不可或缺嘅；爹地就主要關心佢喺度住得慣唔慣，我好想講佢差唔多已經當咗自己係屋主。
而由於聽日星期四要去練band，所以又浪費咗一個有人煮飯畀我食嘅大好日子，但有得對住QQ無所謂啦。




可惜事與願違地，我而家喺學校同QQ嘅距離經常性咁俾佢啲姐妹拉遠咗，都唔知係好事定壞事嚟。就好似今日放學一齊去band房咁，我哋六條友一齊上咗幽蘭嘅返學車去新蒲崗，幽蘭坐車頭，QQ同Zilvia坐老細位，我同YY重有天王星就迫咗喺最後排。
其實呢啲都唔係重點嚟，重點係我哋喺正學校大門上車…上個禮拜就喺對面馬路攬女嘴嘴，今日就同五大女神上私家車唔知去邊，可想而知其他仔見到有幾火遮眼想殺咗我。其實關我Q事咩，個人嚟講比較想返屋企hea下等QQ返嚟，但班女又點會肯放過我呢條跑腿呢。
話雖幽蘭嘅返學車十分寬敞舒適，但後排咁樣塞三個人喺度就點都會有少少迫，而唔知點解佢哋兩個重要夾住我；你都知佢兩個唔識避忌㗎啦，YY試過肆無忌憚咁嘴落我度，女班長就喺眾目睽睽之下同我肌膚之親咁比武，所以…佢兩個都慣晒㗎喇，好在前面QQ唔理我…好事嚟？