為了實現媽媽遺願，我成為了女兒國唐僧: K702

『喂，同你講呀，你咪再同啲囡囡玩落去囉，好多嘢係這麼近那麼遠㗎咋，條路自己揀，行錯唔好喊。』欸…話時話妳都有份嚟攪亂我哋嘅生活重好講…
的確又係嘅，QQ話雖同我一齊生活唔會管我同啲女仔嘅關係，但如果我再成日都係咁佢又有乜可能鍾意我喎；不過現實又唔到我揀嘅，妳自己有個穩定嘅男朋友，妳啲姐妹又唔知做乜成日走嚟煩住我。與其要我奢求一啲不切實際嘅目標，暫時嚟講不如活得自在好過。
帶住忐忑嘅心情，我又繼續上下一堂即係電腦堂。
「各位同學，嚟緊聖誕前你哋就要交第一份project嘞，就係整一個網頁，用返晒我哋上堂教過嘅嘢，咁就兩至三個人一組，你哋大個仔大個女自己安排啦。」
好多時啲人以為讀IT會好新奇有趣，例如上堂研究下有乜嘢新game，或者學習下啲駭客技能，事實上都幾悶下，重要背埋啲無鬼謂嘅code去改字型大小，或者不停左撞右撞去令到幅圖拍返啱個位，充其量只係叫有趣過中西史少少，加埋教嗰個都幾hea下…
U：「喂，你兩個實一組㗎啦？」佢望住我同阿健。
我：「理論上就應該係嘅，妳有乜嘢打算？」
U：「無，唔阻你哋，細龜呀，你係咪本身就識html同埋css㗎喇？」
龜：「都算係嘅，我小學嗰陣就有寫過下網頁，而家得閒就會去更新下wiki啲內容，喺啲我有興趣嘅頁面…」
U：「咁唔介意同我一組吖嘛？」呢個女人…果然無時無刻都係咁實際，一切以成績為優先目標，上咗咁耐堂我都唔記得咗細龜呢個毒腐宅本來就有一定嘅IT功力，如果唔係點將QQ啲直播cap落嚟重可以剪得咁整齊。




龜：「可以嘅，就得我同埋妳兩個？」
U：「唔係，重有一個隔籬班嘅女仔，以前識落嘅。」
龜：「咁…妳話事啦…妳係班長。」
屌，你講到咁我重點敢問你想唔想同我哋一組，況且在公在私我都唔可以得罪天王星，就係咁樣我哋就喪失咗一個可以俾我同阿健差遣又幫得手嘅傻瓜。果然女班長係唔會理同我熟唔熟，一開始就無諗住理我同阿健，只係一心想mark起個做到嘢嘅…
我同阿健你眼望我眼…其實又無乜嘢嘅，我哋兩個一齊起碼叫有組先，唔會無功課交嘅，細龜唔喺度我哋方便講嘢都可以話係一個好處嚟，算係跌咗落地揦返揸沙。
然後今堂又聽阿sir教點樣起張form鋪啲格仔上去俾人剔，點解可以咁撚悶㗎，做乜唔教下邊張顯卡最抵買喎，又或者邊隻鍵盤軸手感最好都好吖。