為了實現媽媽遺願，我成為了女兒國唐僧: K701

U：「係呀，你頭先顧住計數嗰陣我打鼓又進步咗喇，你過嚟吖，我示範畀你睇下。」點諗都唔明呢幾個女仔係用乜做，乜用水做嘅生物係咁有活力嘅咩？我成日都覺得啲水母好懶，永遠剩係識攤開啲觸鬚喺水入面飄，就算八爪魚都重識縮腳游水同噴墨吖。
係訓練模式嘅第二版，今次佢已經打中晒所有音符。
我：「非常唔錯呀下，睇嚟無嘢係妳努力搞唔掂嘅。」
U：「使乜講，其實我玩緊第三關㗎喇，不過就重有少少甩漏，你可以放心，係絕對唔會攪到我嘅。」
我：「傻嘅咩，妳一句唔制我重點會迫妳。」
U：「乜嘢唔制，我而家係要用實力嚟收你皮，唔會再輸。」
我：「知喇知喇，係我自己技不如人，唔好要我同妳再打就得。」唔係擔心輸贏問題，而係我同佢咁玩落去遲早出事，女班長又唔似得Zilvia咁惜身，又及唔上YY咁懂人情世故，又無幽蘭咁愛護QQ。
U：「知就好，你再敢同我打就一定制服到你，然後除埋你條褲打到你屁股變馬騮屎窟，好，今日開心，你個傻瓜就送埋我返屋企啦。」
我：「吓，妳開心點解又關我送你返屋企事呀？」
U：「咪咁多嗲啦，跟我一齊行呀，五分鐘後有巴士。」佢話口未完就拖住我隻手一齊行，點解可以咁亂嚟？




然而我咁樣兜個大圈先返屋企實在係唔知為乜；不過無所謂啦，可以拖住個靚女都叫回返本嘅，反正我都躝開街。
爸：「犀利喎，阿仔可以攪到成十點幾先返嚟，你都得㗎喇。」得？得啲乜，唔好亂講嘢啦。
Q：「咁佢要陪女…同學吖嘛，差唔多係咁㗎啦。」
爸：「明明屋企就有個女同學，可以不假外求，點解重要喺出面浪蕩呢，實在係諗唔通。」
Q：「叔叔你又點會唔明，呢啲叫隔籬飯香，我恨唔嚟㗎喇。」
我：「我再重申一次，由頭到尾我都係被迫唔係自願，對我嚟講絕對係一件苦差嚟。」
爸：「係咩，但我見你返到嚟個樣好似好開心，精神爽利咁，唔通阿仔你係被虐狂嚟嘅？」
呢兩個人真係好無聊，唔Q想理佢哋呀，無乜嘢搞你不如都係盡早返去開工啦；QQ今晚都唔見得有早返嚟啦，又唔見你話下佢女仔唔應該出夜街。
個個都蝦我嘅，不過算啦，有咁多女喺身邊其實幾爽。
星期三又返學，點解成日都要返學？人哋啲故事主角好日都唔使返學，出親嚟都係放學時間，呢個世界實在係太唔公平；係喎，琴日收咗信都未睇晒，繼續先。




『親愛的交叉仔：有見你近日與娘娘相談甚歡，實是美事一樁，預祝你早日再下一城，共美人於校門外相擁依偎，貫徹實踐閣下之優良品德。』…，又我錯囉，好未？