為了實現媽媽遺願，我成為了女兒國唐僧: K687

我：「唓，家陣顯卡同黃金一樣咁保值，留返考DSE先嚟拆都得，唔急於一時，妳呢啲嘢一開就唔值錢，都已經咁靚重成日喺度扮靚唔知為乜。」
爸：「咁女仔係唔會嫌自己太靚嘅，只會想更加靚。」
Q：「聽到未呀，唔啱用嗰啲我自然會處理㗎啦。」
爸：「唉，真係羨慕你哋，青春真係好。」佢托住下巴一面無奈咁講，似乎唔抵得自己個仔有得同女同學一齊住。
我：「有乜好羨慕，你而家都係自由自在，我又唔會阻頭阻勢嘅。」
爸：「唔同嘅，以前得到過嘅嗰種感動係唔會再返嚟，就算你而家畀張4090我又點吖，揀完game睇埋tutor都已經開始瞌眼瞓，邊似得以前紅白機同超任咁好玩。」
我：「我有玩吞食天地㗎…唔通你掛住媽咪？」
爸：「啊…係嘅…咁梗係要掛住啦。」
Q：「唔通uncle諗住以前識過嘅其他女仔？」QQ真係挑通眼眉，一睇就知男人諗緊乜，就連我唔敢講嘅都講埋出嚟；當然啦，我係媽咪個仔，唔應該俾佢諗其他女嘅。
爸：「咁我識過其他女仔…其實一啲都唔出奇㗎喎。」




我：「啊，你又話媽咪係你個中學同學嚟嘅，點解會咁㗎？」唔通我幻想中隔籬位男女同學王子公主童話故事嘅幻想就此破滅？
爸：「唓，中學好多年㗎嘛，嗰陣我重多你一年添。」
我：「係咩，聽聞以前好多人少一年讀五年就算。」
爸：「咁…我讀書唔叻都讀到中七嘅，雖然最尾證實咗係浪費時間，不過有兩三科合格算係咁啦。」
我：「哦，即係你更加早嘅時候，初中就識其他女仔。」
爸：「雖然我同你媽咪係同學，但同佢其實畢咗業先開始㗎，所以你唔使咁多幻想。」
我：「咁就更過份！明明有媽咪喺度你重走去識其他女仔，簡直就係有眼無珠。」
爸：「乜邏輯嚟㗎，邊有人睇一眼就知邊個女仔最好…」
Q：「喂，你唔好講到自己好道德咁喎，你又識幾多女仔呀？有口話人無口話自己。」
爸：「係咩係咩，個衰仔除咗識妳之外重識幾多個？」




Q：「呢層我唔係太清楚喇，又唔係日日喺學校門口觀察佢，可能要問多啲街坊先知。」
我：「喂，妳咪含血噴人，明明我就係非常之乖，識嘅女仔都係朋友嚟咋嘛。」
Q：「係呀係呀，我都係你嘅朋友嚟咋嘛。」
爸：「睇嚟個衰仔都係唔抵幫，所以妳唔使考慮佢㗎喇，做普通朋友已經太過益咗佢。」
我：「關乜事！佢本身就有男朋友，我先唔會諗佢！」
唔好問我哋做乜會咁胡鬧，因為我自己都唔知。