thriXt Qantasy 純文字安眠之作 (New: - U2K - 一直上架): K688

有時我都會諗自己媽咪係咪世界上最好嘅女人，可能由於佢無乜機會鬧我，所以我覺得佢對我係完美嘅；佢亦係一個靚女，雖然比唔上QQ呢啲，但絕對拍得住YY，而且一定心地好過YY。而對我嚟講QQ應該就係呢個世界上排第二嘅女人嚟，樣靚身材正唔在講，識咗咁耐佢對我都真係好好，無第二個可以比得上佢。
我鍾意同車車玩，亦好惜蚊蚊，但QQ嘅地位實在係無可替代嘅；唉，我真係太花心，所以爹地同媽咪一齊之前識過幾多女仔其實又關我乜春事呢？
唉，又早知如果佢返嚟嘅話我唔使搞咁大場大龍鳳，叫埋佢陪我造證就得，雖然我都覺得好樣衰。
爸：「呀，兩位小朋友聽晚想食乜咁呀，我煮！」
Q：「呵，佢聽晚返到嚟食先算啦，我諗你就唔使預佢…」
我：「應該得嘅，可能夜少少咁…掛。」
爸：「呀，有乜搞呀，唔通係校隊要練波？」
Q：「佢邊有咁神心，除咗陪女之外重有乜建樹。」
爸：「咁犀利嘅你？金屋藏嬌之餘重可以去溫女？」
Q：「咪睇小佢，就連我都不得不佩服佢。」




我：「喂！你唔好聽佢亂講，所有喺我身邊出現嘅女仔又唔係我搵返嚟嘅，就連妳…都係嚟借地方住咋嘛。」
爸：「換言之即係你俾女仔煩住，唔陪佢都唔得？」
我：「梗係唔係，我先唔會咁無用…」
Q：「佢得罪咗女班長，而家人哋當佢咕喱咁用，囈都無得囈，我就無眼睇佢。」呢個QQ真係要搵口水波塞佢…
爸：「哦，你媽咪以前都做過班長㗎，班長唔錯吖。」
Q：「聽到未呀，班長都係好女仔嚟，好好考慮下啦。」
我：「先唔制呀，佢哋最鍾意管呢管路，煩過隻鬼，我係唔會屈服嘅，找埋條數我就唔鬼理佢。」
爸：「哦，你話媽咪煩過鬼，而家係咪作反唔聽話喇？」
…。爹地你唔使返嚟喇，橫掂而家我無禮物得QQ有。
有大人喺度，我哋兩個無得好似平時咁胡鬧，唯有專心做功課溫書，然之後就洗白白上床瞓覺。而爹地就真係放假，通常會開電腦打下機漚到一兩點先瞓。




當然，我會拆返走個D槽，然後將下載folder改埋名，呢度有隻Q已經過於刺激，我避免佢再睇到啲令佢慾罷不能嘅嘢，如果唔係我都唔知佢點解決。
上到床悶悶地，我忍唔住message蚊蚊。
我：『想問下妳有無去學生身體檢查㗎？』
蚊：『好耐無去喇喎，做乜問埋啲咁嘅嘢？』
我：『我都好耐無去，所以咪想瞭解下咁囉，完全唔去又似乎唔係幾好，想問下妳上次去係幾時？』
蚊：『中一暑假前囉，嗰陣同咗妳一齊無耐，整鬼衛生署打嚟追數話我幾個月前無撚去到，攪到我阿媽帶我去返，好彩上年唔知係佢哋懶得追定係無人聽電話我先走得甩咋。』睇嚟大部份學生都鍾意放政府飛機。
我：『點解妳唔鍾意去嘅？』我明知故問。